ස්ටීව් ක්ලිෆර්ඩ් කැමරා පද්ධතිය ඔස්සේ උදෑසන කාලයේ අලුතින් බඳවා ගත් “නෙලී” සිය මිත්තණියගේ කටයුතු පටන් ගන්නා සහ පවත්වාගෙන යන ආකාරය මැනවින් නිරීක්ෂණය කළේය. ආච්චී කවදත් හිතුවක්කාරය.දන්නා කියන හැමදෙනාම පවසන්නේ ආච්චීගේ හිතුවක්කාරකම එහෙම පිටින්ම මුනුපුරාටද ලැබී ඇති බවය. ඇය ස්වභාවයෙන්ම අහංකාරය. අනිකා පාලනය කරන්නට මෙන්ම අණ දෙන්නට බොහෝ සෙයින් කැමතිය.තවකෙකුට සවන් දීමේ කැමැත්තක් නොදක්වන මේරි මර්ෆි සිය අභිමතාර්ථයන් කෙසේ හෝ අන් අය ලවා ඉටුකරගන්නට හුරුව උන්නාය.
නාන කාමරයේ ඇද වැටී උකුල් අස්ථිය බිඳී සැත්කමකටද ලක්ව ඇය නිවසට ගෙනආවේ වෛද්‍ය නිර්දේශය මත ඇයව යොමු කළ වෛද්‍ය පුනරුත්ථාපන අංශයට යෑමට තරයේම ප්‍රතික්ෂේප කළ හෙයිනි.රෝගියා අකමැති නම්..ප්‍රතිකාර සේවාවන් බලෙන් ලබාදිය නොහැක.අනෙක් අතට මේරි මර්ෆි සහ පවුලේ අයට සැලකිය යුතු තරමේ ධනස්කන්ධයක් හිමිවූ කාන්තාවක් හෙයින් ඇයට පෞද්ගලික ව්‍යායාම ප්‍රතිකාරයන් නිවෙසට කැඳවා ලබා ගැනීමට කටයුතු සැලැස්විය හැකි බවද අවසානයේ ඒකමතික තීරණය විය.
එතැන් පටන් බලාපොරොත්තු වූ ආකාරයට කිසිවක් නොවීය.නිවසට පැමිණි පසු ආච්චි ව්‍යායාම ප්‍රතිකාරයන් ප්‍රතික්ෂේප කළාය.ඇවිදීම ප්‍රතික්ෂේප කළාය.දවසේ වැඩි කාලයක් ඇඳට වී සිටීම නිසා ඇයගේ යටිකය ප්‍රදේශයේ පීඩන තුවාලයක් පවා ඇති වී තිබුණි. එහෙත් ඇය රැකබලා ගන්නියන් මතම යැපෙන්නට පටන්ගත්තාය.ඉඳහිට පැමිණිි තැනැත්තියක් රැකබලා ගන්නියක් ඇය එම රටාවෙන් මුදාගන්නට තැත් කලද ඇය බොහෝ සෙයින් ආවේගශීලී වන්නටවූවාය.ඇය කියන දෙයක් කිරීම විනා ඉන් ඔබ්බට යෑමක් කිසිදු රැකබලා ගන්නියක් අතින් සිදු නොවීය.
ස්ටීව් කැමරා පද්ධතිය නැවත නැවතත් බලා ආච්චී සම්බන්ධයෙන් ඇය කටයුතු කරන්නා වූ ඉවසීම නිරීක්ෂණය කළේය. ඇය ආච්චිට පවිත්‍රතා කටයුතු සහ ආහාර පාන ගැනීම සම්බන්ධයෙන් කළ යෝජනාද එයට ආච්චී දැක්වූ ප්‍රතිචාරයන්ද හොඳින් බලා උන්නේය. ඇයගේ කාරුණික හැසිරීම සහ ඉවසීම මේ තාක් ආච්චි රැක බලා ගන්නට පැමිණි විවිධාකාර අන්දමේ රැක බලාගන්නියන්ගෙන් ඔහු දුටුවේ නැත.
“මේරි ගර්ල්…ඔයා මේ පාර නම් ඇත්තෙන්ම මට්ටු වෙන්නයි යන්නේ…”
ස්ටීව් තමාටම සිනාසෙමින් පවසාගත්තේය.
අද හවස් වරුවේ ඇය බලන්නට ගියවිට පැමිණිලි රාශියක් ලැබෙනා බවද ස්ටීව් දැන උන්නේය. සිය ආධිපත්‍යය රැක ගන්නට ආච්චී ලොකු රඟපෑමක් කරනු ඇත. නමුත් “නෙලී” ඇය සම්බන්ධයෙන් කුමක් හෝ වෙනස් රටාවක් ගෙනයනු ඇතැයි ස්ටීව්ට සිතුවිල්ලක් ඇතිවිය.
“පෝලා…මේරි මැඩම්ගේ ඩයට් ප්ලෑන් එක කොහොමද ? එයා විශේෂයෙන් කන්න කැමති දේවල් තියද?”
මුලුතැන්ගේ තුළ සහායක සේවිකාවකට යම්කිසි දෙයක් කියා දෙමින් උන් පෝලා නිලංගා දෙස විමතියෙන් හැරී බැලුවාය.
මේ තාක් කාලයක් එවැන්නක් කිසිවෙක් ඇයගෙන් විමසා තිබුනේ නැත.සාමාන්‍යයෙන් නිවැසියන්ට සාදන ආහාරම මේරිටද ලබාදෙයි.මේරි ද කිසිවිටෙකත් ආහාර පාන සම්බන්ධයෙන් ඉල්ලීම් නොකළාය.නමුත් හිතේ හැටියට ප්‍රතික්ෂේප කිරීම් නම් කළාය.
“ගෙදර අයට හදන කෑමම තමයි මේරි මැඩමුත් කෑවේ.. එයා ස්පෙශලි කිසිම දේකට ඉන්ටරෙස්ට් එකක් පෙන්නන්නේ නැහැ.නමුත් ඔයා දැක්කනේ ඕනම දෙයක් රිජෙක්ට් නම් කරනවා…”
පෝලා පැවසුවේ සිනාසෙමිනි.
“මම සාමාන්‍යයෙන් තියෙන රටාවට බලපෑමක් කරනවා කියලා හිතන්න එපා පෝලා. මම චුට්ටක් එයාව ගැලපෙන ඩයට් එකකට කැමති කරවාගත්තොත් ඒක ඔයාට කරදරයක් වෙන එකක් නැහැ නේද? මට මීල් හදන්නත් සපෝර්ට් එකක් දෙන්නත් පුළුවන්….”
නිලංගා පැවසුවාය.මේරි මහත්මියගේ ආසන්නයේ රැඳී සිටීමට අවශ්‍ය නොවන නිසා පෝලා සමග එක්වී ඇයගේ ආහාර නිසි අන්දමින් සැකසීමද කළ හැකි වනු ඇත.
“ඒක කරන්න පුළුවන් වෙයිද කියලනං මම දන්නේ නැහැැ නෙලී. හැබැයි ඔයා ට්‍රයි කරනවා නම් මම ඕන සපෝට් එකක් දෙන්නම්.එයා මේ ජීවිතේ ගෙවන හැටියට නම් මමත් කැමති නැහැ. අසනීප වෙන්න කලින් මේරි මැඩම් මටත් ගොඩාක් උදව් කළ කෙනෙක්.එයා ඔය විදියට ඇඳට වෙලා ඉන්න ඕන නැහැ කියන එක මාත් හිතනවා.නෙලීට ගොඩක් මහන්සි වෙන්න වෙයි එයාව වෙනස් කරන්න.හැබැයි ඒක බැරි වෙන එකකුත් නැහැ කියලා මට හිතෙනවා.”
පෝලා තමා ඉදිරිපස සිටිනා යුවතියගේ උරහිසට සෙමින් තට්ටු කරමින් පැවසුවාය.නෙලී “යම්කිසි”දෙයක් මේරි සම්බන්ධව කරනු ඇතැයි ඇයටද විශ්වාසයක් ඇතිවෙමින් තිබුණි.
දිවා ආහාරය රැගෙන පෝලා කාමරයට පැමිණෙන වේලාවටම නිලංගා ද පැමිණියාය. පෝලා ඇසක් ඉඟිකර ගුඩ් ලක් කියමින් සිනාසී පිටව ගියාය.කෑම බන්දේසිය කුඩා මේසය මත තබා මේරි සයනයේ කොට්ට තබා හිඳවා ගත් නිලංගා ඇයට කෑම කවන්නට පටන් ගත්තාය.කෑම කන අතරතුරේ ඇය තමා හොඳින් නිරීක්ෂණය කරන අන්දම දුටුවද නිලංගා ඒ නුදුටුවා සේ සිය කාර්යය ඉටු කළාය.
“මොකක්ද තමුන්ගේ නම කිව්වේ?”
කවමින් උන් ගෑරුප්පුව පසකට කොට මේරි නිලංගා විමසුවාය.
“නෙලී…මැඩම්…”
නිලංගාගේ පැහැදිලි ස්වරය මේරිගේ සිත්ගත්තේය.
“මොකක්ද කන්ට්‍රි එක..?”
නැවත ප්‍රශ්නයකි.
“ශ්‍රී ලංකා…මැඩම්..”
මේරි හිස වනා නිහඬවම කෑම කන්නට ගත්තාය.
“ඒ කියන්නෙ ඉන්දියාවෙ එන්ඩ් එකනේ…ඩිස්ගස්ටින්…මට කලින් ආව කෙයාරර් කෙනෙක් ඔයාලගෙ රටෙන්… මට කරදර කළා හරියට…මගෙ කෑමත් එයා කෑවා…මම දන්නව නම් ස්ටීව්ට තමුන්ව ගන්න එපා කියනවා…”
සන්සුන්වූ කත ඇවිස්සීගන්නට මහවේලාවක් නොගියේය.
“නෑ මැඩම්…..මම ඉන්දියා නෙවේ…ශ්‍රී ලංකාවෙ… ඒක වෙනම රටක්…අයිලන්ඩ් එකක්”
කලබල කරන්නට පෙරම නිලංගා වහ වහා පැවසුවාය. කෑ ගස්සන්නට පෙරම නිලංගා යළිත් පැවසූ නිසා මේරි මොහොතක් කල්පනා කළාය.
“ආ දැන් මතක් උනේ…ඒ කියන්නේ සිලෝන් නේද…මගේ හස්බන්ඩ් කීප පාරක් ම එහේ ගිහින් තියෙනවා..ඔයාලගේ ටී හරි ෆේමස් නේද…මගේ හස්බන්ඩ් කිව්වා දවසක මාවත් එක්ක යනවා කියලා..ඒත් එයා නැති උනානේ..ස්ටීව්ට කියන්ඩ ඕනෙ ස්ටීව් මාව එක්ක යාවි..”
මේරි තමන්ටම මෙන් කියවූවාය.
අම්මෝ මේරි මැඩම්ගේ අර නපුරු මුණුපුරා නම් ලංකාවට නොයන එකමයි හොඳ…
මැඩගත් සිනහවෙන් යුතුව නිලංගා තමාටම කියා ගත්තාය.
“මැඩම් , මේ කෑම හොඳයිද? එහෙම නැත්නම් මැඩම් ආස කෑම වෙන මොනව හරි තියද?”
මේරිගේ හැසිරීම් රටාව තරමක් යහපත් බව දැනුණ මොහොතේ නිලංගා ඇසුවාය.මේරි සිය ඉදිරිපස හිඳගෙන සීරුවෙන් කෑම කවනා අතර එසේ ව්මසූ යුවතිය දෙස දෙබැම රැළි කොට බලා උන්නාය.
“අපෝ , මේ කෑමද..? කිසි රහක් නෑ…ජරාව….මම ම නිසා කනවා…මම කන්න ආස විදියට කිසිම කෑමක් හදන්නෙ නෑ මුන්…”
මේරි අතවූ අත්පිස්නාව දමා ගැසුවාය.මේ කාන්තාව කිනම් මොහොතක කලබල වන්නේදැයි සිතාගන්නට නොහැකි හෙයින් ඉතා ප්‍රවේශමින් කටයුතු කල යුතුව ඇත.
“අපි මෙහෙම කරමුද මැඩම්…දැන් කෑම කාලා ඉවර වෙලා අපි මේ එන සතියට මැඩම් කන්න ආස මීල් ප්ලෑන් එකක් හදමුද? එතකොට මට පෝලා එක්ක එකතුවෙලා පුලුවන් මැඩම් ආස විදියට මීල්ස් හදන්න..”
නිලංගා සීරුවට වදන් හැසිරවූවාය.
“බලමු..”
තනිවචනයෙන් පිළිතුරු දුන්නද මේරි මර්ෆිගේ සිත ඇතුළේ තරමක පෙරළියක් එවදන් වලින් ඇතිවී තිබුණි.මෙතුවක් කල් ඇයට ඉස්තරම් ගණයේ ආහාර පාන ලැබී තිබුණි. පෝෂණය ,රස ගුණ ඇති කෑම බීම සැපයුණි.
එහෙත් කිසිවෙක් ඇයගෙන් ඇය කැමති දෙය අසා නැත.ඇයගේ ආහාර පාන සම්බන්ධ ආශාවන් ,රුචි අරුචි කම් විමසා නැත.දෙන දෙයක් කවනා තුරු ඔහේ ඉඳීමෙන් ඇයට කෑම බීම එපා වී තිබීම නිතර සිදුවන ආහාර වර්ජනයේ මූලිකම හේතුව විය.
එකඟතාවයකට නොපැමිණුනද මේරිගේ කලබලයකින් තොර හඬ නිලංගාහට ධනාත්මක ලකුණක් ගෙන ආවේය.ඇය කිසිදු කලබලයක් නොමැතිව මේරිගේ කෑම කැවීම නිම කළාය.සියලු අස්පරස් කිරීම්, පිරිසිදු කිරීම් වලට අනතුරුව සිය කාමරයෙන් අලුත් කුඩා නෝට්බුක් එකක් රැගෙන පැමිණි නිලංගා මේරි ගේ ඇඳ අසලට පුටුවක් ගෙන ඉඳගත්තාය.
“හරි මැඩම්,අපි හදමු දැන් මේ වීක් එකේ ප්ලෑන් එක…
මට කියන්නකො අද ඩිනර් එකට මැඩම් කන්න ආස දේ….
ඊට පස්සෙ හෙට මීල් තුන….අන්න එහෙම… වීක් එකක් වැඩි වගේ නම් අපි දවස් තුනකට වගෙ හදමුකො…”
මේරි මුව අයා ඇය දෙස බලා උන්නාය.ප්‍රතික්ෂේප කරන්නට පෙරම මේ යුවතිය වැඩ අරඹා ඇත.හිතුවක්කාර චරිතය පරාජය කරන්නට ඇය සමත්ව ඇත.
“චිකන් මෂ් රූම් සුප් එකක්…ගාලික් ටෝස්ට්…එච්චරයි “
මේරි පැවසුවාය.නිලංගා එය සටහන් කර ගත්තාය.
“වෙනදට කන්න බැරිතරම් බොයිල්ඩ් වෙජිටබලුයි බිත්තරයි චිකනුයි…මට පේන්න බෑ…රෑට එහෙම කාලා මට නින්ද යන්නෙ නෑ..හුස්ම ගන්නත් බෑ…”
මේරි කුඩා දැරියක සේ සිය පැමිණිල්ල ගෙන ආවාය.
“හරි ..ඔන්න අද රෑට ඒක කන්ෆර්ම්…ඉන් පස්සෙ හෙට උදේට…?”
නිලංගා හෙමින් සීරුවේ මේරි සිය සැලසුමට එක්කොට ගත්තාය.දින දෙකකට පමණ සැලසුම හදාගෙන අවසන් වෙද්දී කාමරයේ දොර විවර විය.
අනපේක්ෂිත අන්දමින් ස්ටීව් සිය මිත්තණිය බලන්නට මඳක් වේලාසනින් පැමිණ උන්නේය.නිලංගා පුටුව පසෙකට කොට නැගී උන්නාය.
“එක්ස්කියුස් මී මැඩම්..අපි ඉතුරු ටික පස්සේ හදාගම්මු..මම කිචන් එකට යන්නම් එහෙනම්…”
ස්ටීව් ආච්චීගේ ඇඳ මත හිඳගෙන හිස ඔසවද්දී නිලංගා කාමරයෙන් පිටව ගොස් තිබුණාය.
