දික්කසාද නඩුවේ ඊළඟ නඩු වාරයට තෙදිනක් ඉතිරිව තිබියදී දේවක ෂෙහාරා ගේ නිවසට ගොඩ වැදුනේ ආදිත්‍ය ගේ පියා ලෙස යම් වගකීම් කොටසක් තවමත් ඉතිරිව ඇති බැවිනි. පැමිණෙන බව දැනුම් දී තිබුණු නිසා රවින්ද්‍ර , ශීලා මෙන්ම ෂෙහාරා ද බලා උන්නේ දේවක පැමිණෙන තුරුය.
දේවක නිවසට ගොඩ වැදුනේ ඉතාම සිනාමුසු මුහුණින් නිසා මෙය සාමදාන වීම පිණිස කෙරෙන කතාබහක් වේ යැයි රවින්ද්‍ර එක සිතින්ම බලාපොරොත්තු වූයේය.
” දේවක කාලෙකට පස්සේ ආපු එක නම් ලොකු සතුටක්. ළමයින් ගේ ප්‍රශ්න කියලා අපි විරසක වෙන්න ඕනෙ නෑනේ ”
දේවකගේ හිත වෙනස් වී ඇතැයි රවින්ද්‍ර සිතුවේ අවසාන කතා බහට පසුව ඔහු මේ දික්කසාද නඩුව පිළිබඳව තව දුරටත් කතා නොකිරීම නිසාය. අනෙක් අතට දේවක ජීවත් වන්නේ නිවසින් පිට නිසා ආදිත්‍ය, අභිමන් සහ අශිකා දරන අදහස් වලට වඩා වෙනස් අදහසක් මේ වන විට දේවක සතුව ඇතැයි රවින්ද්‍ර බලාපොරොත්තුවෙන් සිටියේය.
” අපි දැන අඳුන ගත්තේ මේ කසාදට කලින් නේ රවින්ද්‍ර. ඉතින් මෙහෙම දෙයකට විරසක වෙන්න තරම් අපි පරිණත නැති මිනිස්සු කියලා මම හිතන්නේ නැහැ. හැබැයි ඉතින් තාත්තා කෙනෙක් විදිහට මේ ප්‍රශ්නෙට මේ වෙලාවේ මැදිහත් වෙන්න ඕනි කියලා මම හිතුවා. මොකද පවුල ඇතුළෙ මොන ප්‍රශ්න තිබුණත් ආදිත්‍යය කියන්නේ මගේ ලොකු පුතා. එයාට අවැඩක් වෙන දෙයක් වෙනවා බලා ගෙන මට ඉන්න බෑ එයාගේ තාත්තා විදිහට ”
ෂෙහාරා ඉතාම කීකරු දියණියක ලෙස රවින්ද්‍ර අසලින්ම අසුන් ගෙන සිටි අතර ශීලා සිසිල් බීම වීදුරුවක් ගෙන විත් දේවක හට පිළිගැන්වූවාය.
” ඒක ඇත්ත දේවක. මේවා මේ ගෙවල් ඇතුළෙම විසඳ ගන්න පුළුවන් ප්‍රශ්න නේ.නිකං බොරුවට උසාවි ගානේ රස්තියාදු වෙන්න ඕනේ නැහැ. මේ දෙන්නට කතා කරලා ඕක විසඳ ගෙන ඉස්සරහට යන්න පුළුවන්නේ ”
රවින්ද්‍ර පිළිතුරු දුන්නේ බලාපොරොත්තු සහගතවය. තම එකම දියණිය ගේ විවාහය බිඳ වැටීම බලා සිටිය නොහැක. ඇය අතින් විශාල වරදක් වූ බව සැබෑවක් වුවත් විවාහය දික්කසාදයකින් කෙළවර වීම යනු ඇයගේ ජීවිතයට විශාල කැළලකි. ඊටත් වඩා එවැන්නක් පවුල තුළ සිදුවීම තමාටද විශාල ලැජ්ජාවකි.
” මං හිතන්නේ මං කියන්න ආපු දේ රවින්ද්‍ර වැරදියට තේරුම් අරගෙන ”
දේවක කීවේ ඉතාම සන්සුන්වය. මේ ගැටලුවට තමා මැදිහත් විය යුත්තේ ද ,රවින්ද්‍ර සමග ගනුදෙනු කළ යුත්තේ ද ඉතා ඉවසීමෙනි. නිවැරදිකරුවන් නිහඬව සිටින ලෝකයක වැරදිකරුවන් හඬ නැගීම ඉතා සාමාන්‍ය දෙයක් නිසා එසේ හැසිරීමට දේවක මුල සිටම සිතා ගෙන සිටියේය.
” ඒ කිව්වෙ දේවක ? ”
ශීලා ද පැමිණ ෂෙහාරා අසලින් අසුන් ගෙන කතාවට සහභාගී වූවාය.ආදිත්‍ය ගේ තීරණය කෙසේ වුවත් වසර ගණනාවක මිතුදමට පින් සිදු වන්නට දේවක ගේ හිත වෙනස් කර ගත හැකි වනු ඇතැයි ඇයද බලාපොරොත්තුවෙන් උන්නාය.
” මට ආරංචි වුණා පහුගිය නඩු වාරෙදි වෙච්ච දේ ”
ගෙවුණු නඩු වාරයේදී උසාවියද නොමඟ යවමින් කටයුතු කළ ආකාරය ආදිත්‍ය තනිව විඳ දරා ගනු ඇතැයි මිසක එය දේවකට ආරංචි වේ යැයි රවින්ද්‍ර සිතා තිබුණේ නැත.
” මේකනේ දේවක. ආදිත්‍ය කලබල වෙලා ඔය නඩුව දැම්මට අපිට ඕන උනා එයාට හිතන්න තව ටිකක් කල් දෙන්න. ඒකයි එහෙම දෙයක් කරන්න සිද්ධ වුනේ ”
රවින්ද්‍ර කීවේ හදවතට දැනුණු වරදකාරී බව සඟවා ගන්නට උත්සාහයක් දරමිනි.
” මෙතන කිසිම කලබලයක් වෙලා නැහැ රවින්ද්‍ර. වෙලා තියෙන්නේ මගේ පුතා රැවටිච්ච එක. ඒ නිසා එයා බොහොම සාධාරණ තීරණයක් ගත්තා කියලා මම හිතනවා. හැබැයි තාත්තා කෙනෙක් විදිහට ඔයා කරලා තියන වැඩේ සෑහෙන්න වැරදියි.මං රවින්ද්‍ර වගේ බොහොම සාධාරණ විදිහට බිස්නස් කරන කෙනෙකුගෙන් ඒ වගේ දෙයක් බලාපොරොත්තු උනේ නැහැ ඇත්තටම. මොකද අපි දෙමව්පියෝ විදිහට දරුවන්ට හරි වැරැද්ද කියලා දෙන්න ඕන මිසක් ඒ වැරදි වලට තවත් උදව් කරන එක නරකයි ”
රවින්ද්‍ර අසා උන්නේය. තම දියණිය වෙනුවෙන් කරන්නට සිදු වූ දෙය වැරදි බව වටහා ගත්තේ එය කරන්නට පෙළඹුණු පළවන මොහොතේමය. එහෙත් ෂෙහාරාගේ පියා ලෙස ඒ මොහොතේ ඇයට උදව් කිරීම හැරුණු කොට වෙනත් මගක් තමාට පෙනුනේද නැත.
” ෂෙහාරා ආදිත්‍යයට කළේ වංචාවක්. ඒ මදිවට මේ නඩුවෙදි කරෙත් වංචාවක්. ඒක හරි කැතයි රවින්ද්‍ර. එක වැරැද්දක් වෙලා තියෙද්දි තව වැරැද්දකට ඉඩ දෙන එක තාත්තා කෙනෙක් විදිහට ඔයාට නොකර ඉන්න තිබුණා. මමත් තාත්තා කෙනෙක් විදිහට හස්බන්ඩ් කෙනෙක් විදිහට පර්ෆෙක්ට් කෙනෙක් නෙමෙයි. හැබැයි මගේ දරුවෙක් අතින් මේ වගේ වැරැද්දක් වෙන්න මම ඉඩ තියන්නේ නැහැ.එයා වැරැද්දක් කරනවනම් අනිවාර්යෙන්ම ඒක පෙන්නලා දෙන්න මම බැඳිලා ඉන්නවා ”
පවුල් ජීවිතය සාර්ථක කර ගන්නට නොහැකි වූ දේවක තම වැඩිමහල් පුත්‍රයා ගේ ගැටලුවක් පිළිබඳව මේ ආකාරයෙන් උපේක්ෂා සහගතව කතා කිරීම පවා පුදුම සහගත බව රවින්ද්‍ර මෙන්ම ශීලා ද සිතුවෝය.
” හරි මං පිලි ගන්නවා දේවක මේ වැරැද්ද උනේ මගේ අතින් කියලා.මං හිතන්නේ අපිට තාමත් වෙලාව තියෙනවා මේ නඩුව නවත්තන්න. ඔයාම හිතන්නකෝ අපි ජයටම ලොකු මගුලක් අර ගෙන නෑදෑයෝ යාළුවො ඔක්කොටම කියලා මෙහෙම දෙයක් වුණාට පස්සේ ඒගොල්ලන්ට මුහුණ දෙන්නේ කොහොමද කියලා ? අනිත් දේ ඔයා හිතනවද මේකෙන් පස්සේ ෂෙහාරාට ජීවිතේ හදා ගන්න පුළුවන් වෙයි කියලා ? එයාට කොච්චර ඩැමේජ් එකක්ද වෙන්නේ ? “
” ඔය හැමදේම ෂෙහාරාට හිතන්න තිබුණනේ වැරැද්දක් කරන්න හිතන්න කලින්. කොහොම උනත් මං ෂෙහාරාට දොස් කියන්න කැමති නැහැ.මොකද එයා තාමත් මගේ පුතා ගේ වයිෆ්. හැබැයි මම හිතනවා තවදුරටත් මේ නඩුව අනවශ්‍ය විදිහට ඉස්සරහට ගෙනියන්නෙ නැතුව බොහොම සාමදානයෙන් ඉවර කරොත් හොඳයි කියලා. ”
දේවක කියන්නට ආ කාරණාව කියා දැම්මේය. මොහොතකට සියලු දෙනා අතර පැවැතියේ නිහඬියාවකි.ෂෙහාරා උන්නේ කිව යුත්තේ කුමක් දැයි සිතා ගත නොහැකි තත්ත්වයකය. දේවක ගේ තත්ත්වය ද ඊට දෙවැනි වූයේ නැත.
” ඉවර වෙච්ච නඩු වාරේ දවසෙදි ඕගොල්ලෝ ඉදිරිපත් කරපු documents බොරු කියන්න සාක්ෂි මං ළඟ තියෙනවා. ඒ විතරක් නෙමෙයි එදා ෂෙහාරා ගෙදරමයි හිටියේ කියන්නත් සාක්ෂි තියෙනවා. ෂෙහාරා හවස යාළුවොත් එක්ක එළියට ගිහිල්ලත් තියෙනවානේ . බැරි වෙලාවත් මං ඔය සාක්ෂි ඔක්කොම උසාවියට දුන්නොත් පවුල පිටින්ම ඇතුලට යන්න තමයි වෙන්නේ.මොකද උසාවියක් නොමග අරිනවා කියන්නේ ලේසි පහසු දෙයක් නෙමෙයිනේ රවින්ද්‍ර ”
දේවක යනු සිතා සිටිය තරම් ලෙහෙසි පහසු පුද්ගලයෙක් නොවන බව රවින්ද්‍ර තේරුම් ගත්තේ මේ මොහොතේය . තමා පියෙකු වශයෙන් ෂෙහාරා වෙනුවෙන් කළ දේවල්ම ඉතාම සාධාරණ ලෙස දේවක තම පුත්‍රයා වෙනුවෙන් ද කිරීමට සූදානම්ය. යම් අයුරකින් ඇත්ත වශයෙන්ම ඔහු එවැනි නීතිමය පියවරක් ගත හොත් සිදු වන්නේ තමාගේ මුළු පවුලම නීතියේ රැහැනට කොටු වීමය.
” මං හිතනවා මං කියපු දේ රවින්ද්‍ර තේරුම් ගන්න ඇති කියලා. මම මේ ප්‍රශ්නෙට මැදිහත් වෙන්න නෙමෙයි හිටියේ. හැබැයි මේ වෙලා තියෙන දේවල් ඇහුවහම මට මේකට මැදිහත් වෙන්න සිද්ධ වුණා. තාත්තා කෙනෙක් විදිහට ඔයා ඔයාගේ දුව වෙනුවෙන් පෙනී ඉන්නවා වගේම මටත් මගේ පුතා වෙනුවෙන් ඕනෙම දෙයක් කරන්න පුළුවන් රවින්ද්‍ර.ඒක නිසා කරුණාකරලා මේ නඩුව ඒ විදිහට වෙන්න අරින්න. නිකරුණේ ඔයාල ගෙත් අපෙත් කාලෙ නාස්ති නොකර මේක ඉවරයක් කරා නම් අපි දෙගොල්ලන්ටම හොඳයි. එතකොට මේ ළමයි දෙන්නටම පුළුවන් නේ ඒ ගොල්ලන්ට ඕන විදිහට ඒගොල්ලන් ගේ ජීවිත ඉස්සරහට ගෙනියන්න. එකට ජීවත් වෙන්න බැරිනම් වෙන් වෙන එක තමයි හොඳම විසඳුම. ඒක ලැජ්ජාවට කාරණාවක් නෙමෙයි. මොකද මේ ලෝකෙ ඩිවෝස් වෙන්න යන පළවෙනි කපල් එක මේ දෙන්නා නෙමෙයිනේ ”
දේවක කියනා කාරණාව සීයට දාහක් සාධාරණය. එහෙත් තමා සිතා බැලිය යුත්තේ තම එකම දියණියගේ ජීවිතය පිළිබඳවය. මේ සියල්ල කරන්නේ ඇයව සතුටින් තැබීම උදෙසාය. එහෙත් ඒ සියල්ල දැන් ගඟට කැපූ ඉනි මෙන් වී ඇත.
ෂෙහාරාද මේ මොහොතේ උන්නෙ කිසිවක් කරකියා ගත නොහැකිවය. සම්පූර්ණ වරද තමා අතේ තබා ගෙන තව දුරටත් මේ විවාහයේ රැඳී සිටීමද කළ නොහැක. ජීවිතය වරද්දා ගත්තේ තමා ගේ වරදිනි. තමා දුරදිග නොබලා ක්‍රියා කිරීම හේතුවෙන් වූ අතර ඒ කිසිවකට තම දෙමව්පියන් වැරදි නැත.ඔවුන් මේ ආකාරයෙන් කිසිවෙකු ඉදිරියේ හෝ අපහසුතාවයට පත්විය යුතුද නැත.
” එතකොට අංකල්ට ඕනේ ඉක්මනට මේ ඩිවෝස් එක ඉවරයක් වෙන්න නේද ? ”
