“එදා ඇයි ඔයා එහෙම මැසේජ් එකක් එව්වෙ?” කියා අහන්න පණක් ජාන්විගෙ හිතට තිබ්බේ නැත.
“වට් එවර් හැපන්ස්, ඔයාට එහා පැත්තෙන් මම හිටගෙන ඉන්නවා” යැයි කියා චිත්‍රා ගෙදර ඇවිත් උන් වෙලාවේ තුරුණු විසින් එවන්නට යෙදුණ පණිවිඩය මලිත් ගැන දෙමව්පියන්ට මූණටම කියන්න ඕන දේ කියන්න තමන්ට රුකුල් දුන් බව ජාන්වි මුලු හදවතින්ම පිළිගත්තාය. ඒ පණිවිඩය එවෙලේ නොආවා නම් තමන් සුපුරුදු මෝඩකම ආයෙ කර “මං මලිත් එක්ක කතාකරන්නම්” කියා කියන බවද ජාන්වි දැනගෙන උන්නාය.
“මං හිතන්නෙ නෑ අම්මේ මං මොන තරම් දේවල් කතාකරත් මලිත් වෙනස් වෙයි කියලා” තමන් කියද්දිත් චිත්‍රා එයට විරුද්ධ වෙච්ච විදිය ජාන්විගේ හිත අස්සේ තවම රැව් පිලිරැව් දේ.
“ගෑනියෙක්ට තමයි පුලුවන් ළමයො පිරිමියෙක්ව වෙනස් කරගන්න. ඔය ළමයා දැනගන්න එපාය තමන්ගෙ කසාද මනුස්සයව වෙනස් කරගන්න. පිරිමි ළමයො උපතින්ම අයාලෙ යන්න සූදානම් වෙච්ච උදවිය. ගෑනු තමයි දැනගන්න ඕන නාස් ලණුව දාලා පිරිමින්ව තමන් ළඟ ගාල් කරගන්න” කියා චිත්‍රා කියද්දී ජාන්වි හිනා උනේ ඒ කතාවටය.
“නාස් ලණුව දාලා මං ලඟ ගාල් කරගන්න තිබ්බා අම්මේ මලිත් හරකෙක් උනා නම්. අනික මට වඩා හොඳට නාස් ලණුව දාලා ගාල් කරගන්න පුලුවන් වෙච්ච ගොනෙක් ළඟ තමයි මලිත් මේ දවස්වල ගාල් වෙලා ඉන්නේ. මලිත් ගෙ ඇඟේ හණ ගහලා තියෙන්නෙ මගෙ නම උනාට මලිත් ගිහින් ලඟින්නේ වෙන වත්තක නම්, කන්නෙ ඒ වත්තෙ තණකොල නම් මං ඒ මගෙ හරකා කියලා කොච්චර කිව්වත් වැඩක් වෙන්නෙ නෑනෙ.
මට ආයෙ මලිත් එක්ක පෑහෙන්න උවමනාවක් නෑ අම්මේ. අනික ඔය සිංදු කෑලියි, එක එක ඉන්ටවිව් වලයි මලිත් මගේ රෙදි මොන විදියට ගැලෙව්වත් මට ප්‍රශ්නයක් නෑ. හැබැයි මලිත් කොච්චර ජනප්‍රිය මනුස්සයෙක් උනත් මට මගේ නම්බුව උකස් කරගෙන මලිත්ව ලඟ තියාගන්න උවමනාවක් නෑ. අනික ඔය අම්මා ජනප්‍රියයි කියන මහ ලොකු පුත්‍රයා ජනප්‍රිය උනෙයි, ඔච්චර ඉස්සරහට ඔච්චර පොඩි කාලෙකින් ගියෙයි තමන්ගෙ තියෙන දක්ශකමකට වඩා එක එක නාකි ගෑනු ලඟ ඇඳුම් ගලෝලා කියන එක දැනගත්තයින් පස්සෙ කොහොමත් මට එහෙම ඉන්න උවමනාවක් නෑ.
මලිත් මං ගැන මොන බොරු කතන්දර කිව්වත් මට ප්‍රශ්නයක් නෑ. මටත් ඕන නම් මලිත් ගැන ඇත්ත කතන්දර කියලා දික්කසාදෙදි මලිත් සහමුලින්ම වැරදිකාරයා කරලා, ඉන්ඩස්ට්‍රි එක අස්සෙත් මලිත්ගෙ රෙදි ගලෝලා මේක ඉවරයක් කරන්න පුලුවන්. ඒ උනාට මට එහෙම කරන්න උවමනාවකුත් නෑ. මොකෝ මලිත්ව මට එච්චරක්වත් වටින්නෙ නෑ. ඒ හන්දා අම්මා කොච්චර බලාපොරොත්තු උනත් ආයෙ මලිතුයි මමයි එක්කාසු වෙන්නෙ නෑ. මොකෝ මට කිසිම උවමනාවක් නෑ අම්මේ පිරිමි ගණිකාවක් එක්ක දීග කන්න” කියලා ජාන්වි උඩ තට්ටුවට යන පඩිපෙල නැගගෙන යද්දී චිත්‍රා උන්නේ අතේ තිබ්බ තේක කටට ගන්නට පණක් නැතුවය.
“මං එදා එහෙම මැසේජ් එකක් එව්වෙ ඔයාම කිව්ව විදියට ඔයාට මේ ප්‍රශ්නෙ එක්ක ගෙදර අයවත් කවුරුවත් නෑ කියල මට තේරිච්ච හන්දා.මෙතනදි මම ඔයාට සපෝට් කරන්නෙ ලෝයර් කෙනෙක් විදියට තමයි. හැබැයි අපි අතරෙ මොකක් හරි යාලුකමක් තිබ්බා නම් අන්න ඒ යාලුකම හන්දා මම ඔයාව මේ ප්‍රශ්නෙන් බේරලා දෙන්නං කියන පොරොන්දුවක් විදියට තමයි ජාන්වි මම ඒක එහෙම එව්වෙ. එහෙම නැතුව ඔයාගෙන් වෙන දෙයක් බලාපොරොත්තුවෙන් නෙවෙයි” කියා තුරුණු කිව්වද ඒ සියල් වචන පිටිපස්සේ සැඟවී තිබුනේ ආදරයක සේයාවන් බව තේරුම්ගන්න ජාන්විට අපහසු උනේ නැත.
එහෙත් දෙදෙනාම උන්නේ ඒ ගැන නිහඬ වෘතයක් පුරමිනි. මේ වනාහී ආදරය කරන්නට සුදුසු කාලයක් නොවේ. අනික් අතට තමන්ගෙ ආදරය තුරුණුගේ තරුණ ජීවිතයෙන් වසර ගණනාවක්ම ගිනිබත් කරන්නට හේතු උන ගිනි පුපුරක් වූ අතීතයක, වර්තමානයේ සහ අනාගතයේ එය එසේ නොවෙතැයි කියා කියන්නට විශ්වාසයක් ජාන්විට තිබ්බේ නැත.
ඉතින් නිහඬතාවය තිබුනේ දෙහිතක් පරිස්සම් කරන්නට කටයුතු කරමින් ය.
“කිසිම හේතුවක් උඩ මම ආයෙ ඔයා එක්ක සෙට්ල් බැක් වෙන්නෙ නැ මලිත්, ඒවගේම තමයි ඔය සිංදුවලිනුයි, එක එක ඉන්ටවිව් වලිදියි මට නිකන් බාල්දි අදින්න ලෑස්තිවෙන්න ආවොත් ඔයයි මේධාංගනියි ගැන මම දන්න දේවල් මට පුලුවන් විදියට මම එලියට දානවා කියන එකත් ඔයා අමතක කරන්න එපා” කියා ජාන්වි විසින් දුන් එකම එක දුරකතන ඇමතුමෙන් පස්සේ මලිත් “වෙන් වී ගිය ආදරයක වින්දිතයා” ලෙස කරන්නට යෙදුන රඟපෑම මදකට නතර කර බව ඇත්තකි. එහෙත් ඉරණම තමන් වෙනුවෙන් සූදානම් කර තිබුනේ කුමනාකාරයේ ජීවිතයක්ද කියා තේරුම්ගන්න ජාන්විට පුලුවන්කමක් තිබ්බේ නැත.
ජාන්විට රැකියාවක් සොයා දෙන්නට තුරුණුට උදව් කරේ මධුරය.
“උඹ කියන හන්දා මම ඒකිව අපෙ ඔෆිස් එකට ගත්තට මං ඕකිගෙ මූණවත් බලන්න කැමති නෑ” කියා මධුර තුරුණට කිව්වට ජාන්වි ඉදිරියේ ඒ කිසිත් හැඟීමක් එලිදරව් කරන්නට මධුර උත්සහ කරේ නැත.
අනෙක් අතට කුමක් හෝ හේතුවක් නිසාවෙන් තුරුණු බීමෙන් මදක් ඈත් වී හිඳීම ගැන මධුර උන්නේ එක්තරා දුරකට සන්තෝසයකිනි. ඒ සන්තෝසය සීයට සීයක සන්තෝසයක් නොවුනේ ඒ පිටිපස්සේ ජාන්විගෙ සෙවණැල්ලක් ඇඳී තිබීම පමණකි.
“මං කියන හන්දා හරි උඹ ගනිංකො. උදව්වක් කරපං බං අසරණ කෙල්ලෙක්නෙ කියල හිතලා”
“අනේ අනේ මේ ඔය කසාද කඩන් ආව ගෑනුන්ට උදව් කරන්න උඹට නිකන් මාව මේ එන් ජි ඕ එකක් වගේ පේනවද? අනික මේ ඒකි උඹව මෙතන අඬවලා කරවලා දාලා ගියාට පස්සෙ ඒකිව අනුකම්පා කරන්න උඹට වගේ මට අතීතේ අමතක වෙලා නෑ. උඹට ඩිමෙන්ශියා උනාට මට තාම සිහිය තියෙනවා හිච්චි පුතේ.
ඒ හන්දා අර උඹේ කීමට රස්සාවක් දෙනවා මිසක මම මේ මනුස්සකම පෙන්නන්න හදනවා කියලා හිතන්න එපා. මම ඔය වගේ ගෑනුන්ට මනුස්සකම පෙන්නන්න යන්නෙ නෑ” කියා මධුර කිව් කිසිවක් ජාන්විට කියන්න තුරුණූ කටයුතු කරේද නැත.
ඒ අනුව ජාන්විට නාවල පාරේ ඇඩ්වටයිසින් ඒජන්සි එකක වඩා සැහැල්ලු, කුඩා රැකියාවක් සොයා දෙන්නට තුරුණුට පුලුවන් විය. ජාන්වි උන්නේ ද ඒ ගැන සන්තෝසයෙනි. තමන්ගේ අධ්‍යාපන සුදුසුකම් අනුව තමන් හිඳිය යුත්තේ මෙවන් තැනක නොවන බව දන්නා නමුත් ජීවිතයේ කිසිම දිනයක රැකියාවක් නොකල තමන්ට මෙවන් තැනක මෙයාකාර සුන්දර, සරල, සැහැල්ලු රැකියාවක් කරන්නට ලැබීම ගැන ජාන්වි උන්නේ සන්තෝසයෙනි. අනෙක් අතට තමන්ට වඩා අවුරුදු පහ, හත, දහය වැනි අඩු වැඩි වයස් ප්‍රමාණයන්ගෙන් යුතු වෙනස්ම පිරිසක් සමග රැකියාවක් කරන්නට ලැබීම ගැන ජාන්වි උන්නේ සන්තෝසයෙනි.
“අක්කව මට කොහේදි හරි දැකලා පුරුදුයි” කියා දහවල් ආහාරය අතරවාරයේ කිසිවෙක් අසද්දී තමන් පිළිබඳ ඇත්ත කියන්නට ජාන්වි පැකිලුනේ නැත. අනෙක් අතට දැන්ම ඇත්ත කියා තිබෙන එක, කාලයකට පෙර සෝශල් මීඩියාවල වයිරල් ගිය ප්‍රේම කතාවකට උරුමකම් කියූ තමන් ඒ ප්‍රේම කතාවෙන් මිදී යන්නට පාර සොයමින් ඉන්නා බව තමන්ගේ වටේ සිටින අයට තේරුම්කරවන්නට ලේසි කර දෙන බව ජාන්වි සිතුවාය.
තුරුණුගේ බෝඩිම තිබුණේද නාවල පාරේ ජාන්විගේ රැකියා ස්ථානය අසබඩමය.
ජාන්වි රැකියාවට යද්දිත්, වැඩ ඇරී නිවස බලා ආපසු යද්දිත් මෝටර් සයිකලයේ නැගී තම නවාතැන බලා එන තුරුණුව ඇස ගැටුණූ වාර අනන්තය.
ජාන්විව නොදැක්කා සේඑ බයිසිකලයේ වේගය වැඩිකරමින් තුරුණු ඒ වෙලාවට පියඹා ගිය බවද ඇත්තකි.
එහෙත් ආදරය තිබුනේ දෙහිතක් අස්සේ ඊටත් වඩා වේගයකින් දළු ලමින් ය.
