සෑම සම්බන්ධතාවයකදීම දෙදෙනා එකඟ නොවීම් ඇතිවිය හැකි නමුත් කෙනෙක් නිරන්තරයෙන් ආවේගශීලී වීම අනෙකා තුළ ආතතිය, බිය සහ මානසික පීඩනය ඇති කළ හැකියි. සෞඛ්ය සම්පන්න සබඳතාවයක් ගොඩනගා ගත හැක්කේ ගෞරවය, සන්නිවේදනය සහ මානසික ආරක්ෂාව මතයි. ඔබේ සහකරු නිරන්තරයෙන්ම ආවේගශීලී වනවා නම් ඔබේ මානසික යහපත්ම ආරක්ෂා කර ගනිමින් එම තත්ත්වයන් කල්පනාකාරීව කළමනාකරණය කිරීම වැදගත් වනවා.
සන්සුන්ව සිටින්න
ඔබේ සහකරු ආවේගශීලී වන විට ඔබත් ඒ හා සමානම ආවේගයකින් ප්රතිචාර දක්වනවා නම් තත්ත්වය වඩාත් නරක අතට හැරීමට ඉඩ තිබෙනවා. ආවේගයට පත් ඔබේ සහකරු ඉදිරියේ හැකිතාක් සන්සුන්ව සිටිමින් ස්ථාවර ස්වරයකින් කතා කිරීමට සහ ඉදිරිපත් කිරීමෙන් වැළකීමෙන් ඔබට තත්ත්වය තරමක් දුරට පාලනය කර ගත හැකි වෙනවා.
සන්සුන්ව සිටීම යනු අනෙකාගේ නරක සහ ආවේගශීලී හැසිරීම් පිළිගැනීම නොවේ. එය ඔබ දෙදෙනා අතර පවතින ගැටුම උත්සන්න වීම වැළැක්වීමට උපකාරී වන ක්රියාමාර්ගයක් වන අතර නිවැරදිව ප්රතිචාර දැක්විය යුතු ආකාරය පිළිබඳව වඩාත් පැහැදිලිව සිතීමට ඔබට ඉඩ සලසනවා.
පැහැදිලි සීමාවන් සකසන්න
සෑම කෙනෙකුම ගෞරවය ලැබීමට සුදුසු වන අතර අනෙකාට ගෞරවයෙන් සැලකීමද සෑම කෙනෙකුගේම යුතුකමක්.එම නිසා කෑගැසීම්, අපහාස, තර්ජන හෝ බිය ගැන්වීම් වැනි ඔබ නොඉවසන හැසිරීම් මොනවාදැයි ඔබේ සහකරු සමග සාකච්ඡා කරන්න.
උදාහරණයක් ලෙස, ඔබට මෙසේ පැවසිය හැකිය, “මට මේ ගැන සාකච්ඡා කිරීමට අවශ්යයි, නමුත් මට කෑ ගැසුවොත් මම සංවාදය දිගටම කරගෙන යන්නේ නැහැ.” යනුවෙන් ඔබට ඔබේ සහකරුට පැවසිය හැකියි. සෞඛ්ය සම්පන්න සීමාවන් ඔබේ මානසික යහපැවැත්ම ආරක්ෂා කිරීමට සහ ගෞරවනීය සන්නිවේදනය සඳහා මග පාදා ගැනීමට උපකාරී වෙනවා.
ප්රධාන හේතුව තේරුම් ගැනීමට උත්සාහ කරන්න
ආවේගශීලී වීම සමහර විට ආතතිය, නොවිසඳුනු ගැටළු, කලකිරීම, මූල්ය පීඩනය හෝ පෞද්ගලික අරගල සමඟ සම්බන්ධ විය හැකි වෙනවා. හේතුව තේරුම් ගැනීම හැසිරීමට නිදහසට කරුණක් නොවන නමුත් එය ඔබට ගැටලුව වඩාත් ඵලදායී ලෙස විසඳීමට උපකාරී විය හැකියි. ගැටලුවකදී ඔබේ සහකරුට හැඟෙන ආකාරය, ඔහුගේ කෝපයට නිශ්චිත හේතුව සහ ඔහුට ඒ මොහොතේදී දැනෙන දේ පිළිබඳව විමසීමට සන්සුන් මොහොතක් ලබාගන්න.
විවෘතව සහ අවංකව සන්නිවේදනය කරන්න
ඔබේ සහකරුගේ හැසිරීම ඔබට බලපාන ආකාරය ඔහු සමඟ සාකච්ඡා කරන්න.එහිදී ඔහුට දොස් පැවරීම වෙනුවට ඔබට හැඟෙන ආකාරය ඔහුට අවබෝධ කර දීමට උත්සාහ කරන්න.
උදාහරණයක් ලෙස,
“සංවාදය කෑ ගැසීමක් බවට පත් වූ විට මට රිදෙනවා.”
” ඔබ නිතර ආවේගශීලී වූ විට මට කනස්සල්ලක් දැනෙනවා.”
මෙවැනි ප්රවේශ වීමක් ඔබේ සහකරු ආවේගශීලී වීම අවම කරන අතර වඩා ඵලදායී සාකච්ඡාවක් සඳහා ප්රවේශය ලබා ගන්නවා.
කෝපය පාලනය කර ගැනීමට හැකි සෞඛ්ය සම්පන්න ක්රම ගැන කියා දෙන්න
ආතතිය සහ කෝපය පාලනය කර ගැනීම සඳහා සෞඛ්ය සම්පන්න ක්රම බොහෝමයක් තිබෙනවා.
දිනපතා ව්යායාම කිරීම
ගැඹුරු හුස්ම ගැනීමේ ක්රම
භාවනාව
විවේක ගැනීම
සෞඛ්ය සම්පන්නව ගැටළු වලට මුහුණ දීමේ කුසලතා ඉගෙන ගැනීම මගින් කාලයත් සමඟ ආවේගශීලී ප්රතික්රියා අඩුකර ගැනීමට හැකියාව ලැබෙනවා.
අවශ්ය නම් වෘත්තීය සහාය ලබා ගන්න
ආවේගශීලි බව නැවත නැවත ඇතිවන රටාවක් බවට පත්වෙමින් තිබෙනවා නම් ඔබේ සහකරු සිටින්නේ වෘත්තිමය සහාය අත්යවශ්ය තත්ත්වයක විය හැකියි. සුදුසුකම් ලත් වෘත්තිකයෙකුට අභ්යන්තරයේ පවතින ගැටළු හඳුනා ගැනීමට, සෞඛ්ය සම්පන්න සන්නිවේදනයට සහ ගැටුම් නිරාකරණ කුසලතා ඉගැන්වීමට හැකියාව තිබෙන නිසා අවශ්ය අවස්ථාවකදී එවැනි පියවරක් කෙරෙහි යොමු වන්න.
උපකාර පැතීම අසාර්ථක වීමේ ලක්ෂණයක් නොවන අතර එය බොහෝ විට සම්බන්ධතාවය වැඩිදියුණු කිරීම සඳහා ගත හැකි ධනාත්මක පියවරක්.
ඔබේ ආරක්ෂාවට සහ යහපැවැත්මට ප්රමුඛත්වය දෙන්න
ඔබේ සහකරුගේ ආවේගශීලී බව නිසා ඔබට අනාරක්ෂිත බවක් දැනෙනවා නම් තත්වය බැරෑරුම් බව ඔබ පිළිගත යුතු වන අතර සම්බන්ධතාවයකදී වුවත් ඔබ සෑම විටම ඔබේ චිත්තවේගීය හා ශාරීරික ආරක්ෂාවට මුල් තැන දිය යුතුයි.
ඔබට උදව් අවශ්ය නම් විශ්වාසවන්ත මිතුරන්, පවුලේ සාමාජිකයන් හෝ වෘත්තීය සහාය වෙත ළඟා වන්න. කිසිදු සම්බන්ධතාවයකින් ඔබට නිරන්තර බියෙන් හෝ චිත්තවේගීය පීඩාවකින් ජීවත් වීමට අවශ්ය නොවිය යුතුයි.
සහකරුවෙකුගේ ආවේගශීලී බව කිසි විටෙකත් නොසලකා හැරිය යුතු හෝ සාමාන්යකරණය කළ යුතු වන්නේ නැහැ . ඉවසීම, සන්නිවේදනය කිරීම සහ සහයෝගය සමහර ගැටළු විසඳීමට උපකාරී වුවද, සෑම සම්බන්ධතාවයකම ගෞරවය සහ මානසික ආරක්ෂාව පවත්වා ගත යුතු වනවා. එම නිසා ඔබේ යහපැවැත්ම සම්බන්ධතාවය තරම්ම වැදගත් බවත් මතක තබා ගන්න.
