නින්ද කියන්නේ ජීවිතවල සෞඛ්‍ය සම්පන්න බවට ඉතාම වැදගත් දෙයක්. සාමාන්‍ය නිරෝගී පුද්ගලයක රාත්‍රී කාලයේ නින්ද පැය අටක්වත් ලබාගන්න ඕන කියලා කියන්නේ අන්න ඒ ඒ නිසා.
ඒත් අපි එදිනෙදා ජීවිතයේ මුහුණ දෙන අධික කාර්ය බහුලකම වගේම , විවිධ ප්‍රශ්න නිසා අපට සුවපහසු නින්දක් ලබා ගන්න එක අතපසු වෙනවා. ආතතිය , කාන්සාව, මානසික පීඩනය, බිය, ඒත් එක්කම ඇතැම් ස්ටරොයිඩ්ස් වර්ගයේ ඖෂධ ,දිවා කාලයේ නිදා ගැනීම, හෝමෝන අසමතුලිතතාවය , රාත්‍රී කාලයේ අධික ලෙස දහඩිය දැමීම, විවිධ රෝගී තත්ව, දරා ගත නොහැකි ශාරීරික වේදනාවන්, රාත්‍රී කාලයේ වේලාසන නිදාගන්නට නොහැකි පුරුදු, එක්කම ඝෝෂාකාරී පරිසර තත්ත්ව වගේ විවිධ හේතු කාරණා නිසා ඔබේ නින්ද ඔබට අතපසුවෙන්නට පුළුවන්. මේ විදියට රාත්‍රී නින්ද අතපසු වීම ඔබට ශාරීරිකව වගේම මානසිකවත් ඇති කරන්නේ අස්ථාවරත්වයක් බව නම් අමතක කරන්න එපා.පෙර දිනයේ හරි හැටි නින්දක් නොලැබුනම පහුවෙනිදාට එලැඹෙන ඔබේ දිනයේ සියලුම වැඩ කටයුතු අඩපණ වෙන අත්දැකීම ඔබට මතක ඇති.
ඒ හින්දාම මතක තියාගන්න ආහාර සහ අනෙකුත් මූලික අවශ්‍යතා වගේම නින්ද කියන්නෙත් ඔබේ ජීවිතය සෞඛ්‍ය සම්පන්න විදියට පවත්වාගෙන යන්න අත්‍යවශ්‍ය සාධකයක්. ඔබ දන්නවා අපගේ ශරීරයත් කර්මාන්තශාලාවක් වගේ. කර්මාන්තශාලාවක් ඇතුළෙ වෙන නිෂ්පාදන ක්‍රියාවලිය වගේම අපේ ශරීරය තුලත් මයිටොකොන්ඩ්‍රියා කියන සෛලීය අවයව ඇතුලේ යම් යම් නිෂ්පාදන ක්‍රියාවලියන් සිද්ධ වෙනවා. විශේෂයෙන්ම අපගේ ශරීර වර්ධනයට , ඒත් එක්කම ශරීරයේ තුවාල වෙච්ච සහ හානි වෙච්ච සෛල අලුත් වැඩියා කරන්න ඔවුන් විශාල කාර්යභාරයක් ඉෂ්ට කරනවා. ඉතින් මෙන්න මේ ක්‍රියාවලීන් වෙනුවෙන් ඔබ සුව නින්දක් ලබාගැනීම අත්‍යාවශ්‍යයි.
අධික ලෙස ස්ථුල වීම අඩු කරගන්, ඒත් එක්කම අපගේ මානසික යහපැවැත්ම පවත්වාගන්න , මනසේ රඳවා ගන්නට අවශ්‍ය කරන කාරණා මනසේ තහවුරු කරගන්නට , ශරීරයට අහිමි වෙන ශක්තිය ලබා ගන්නත් නින්ද අත්‍යාවශ්‍ය වෙනවා.
නිදිමත ඇතිවෙන්න අපට බලපාන හෝමෝන දෙකක් තියෙනවා. ඒ තමයි මෙලොටොනීන් සහ සෙල්ටොනින් කියන හෝමෝන දෙක. රාත්‍රී කාලය ශරීරය විසින් හඳුනා ගන්න කොටම මේ මෙලොටොනීන් කියන හෝමෝනය ශරීරය විසින්ම ස්වභාවිකවම නිපදවනවා. මේ මෙලොටෝනීන් මට්ටම ඉහල නම් ඔබේ ශරීරයේ ඔබට නිදාගන්න එක ඉක්මන් කරනවා. මෙලටොනින් මට්ටම අඩුයි නම් ඔබට නිදාගන්න එකට බාධා සිද්ධ වෙනවා.
විදුලි පහන් දල්වලා තියෙනවා නම් , ඔබ නිතරම ඩිජිටල් තිරවලට ඇස් යොමු කරගෙන ඉන්නවනම්, ඒත් එක්කම රූපවාහිනි නරඹනවා නම් , ශරීරයේ මෙලටොනීන් නිපදවීම අඩුම වෙලා යනවා. නිදාගන්නට පැයකටවත් කලින් ඉලෙක්ට්‍රෝනික උපාංග වලින් ඉවත් වෙන්න කියලා කියන්නේ අන්න ඒ නිසා.
සෙරොටීන් කියලා කියන්නේ ශරීරයේ ස්වභාවිකව නිෂ්පාදනය කරන රසායනිකයක්. මෙම රසායනිකය ආතති කළමනාකරණය වගේ කාරණා වලට බොහොම වැදගත්. මේ සෙරොටීන් මට්ටම ප්‍රවර්ධනය කරගන්න නම් බිත්තර, සැමන්, චීස්, තක්කාලි , ඇට වර්ග වගේ ආහාර ඔබේ ආහාර වලට වැඩිපුර එකතු කරගන්නට ඔබට පුළුවන්.
ඉතිං අපි ඒ කිව්වේ නින්දේ වැදගත්කම ගැන. මේ කොච්චර කොහොම කිව්වත් ඔබට නින්ද ළඟා කරගන්න එක පහසු නැත්නම් අපි අද ඔබට කියන්නේ නින්ද පහසුවෙන් ළඟා කරගන්න ඔබට පුරුදු කරන්න පුළුවන් යෝග ක්‍රමයක් ගැන. ඔබ සුව නින්දක් නොලබන කෙනෙක් නම්, ඔබ මේ මේ ක්‍රමය උත්සාහ කරලා බලන්න. ඒ වගේම ඔබ මේ වෙනුවෙන් යම් පළපුරුදු කෙනෙක්ගේ මූලික උපදෙස් ගන්න කියලාත් අපි සිහිපත් කරනවා.
මේ සඳහා වන යෝග ආසන කිහිපයක් තියෙනවා.
දෙපා එකිනෙකට ලංවනසේ තබාගෙන, අත් දෙකේම අත්ල ඉදිරියට වන සේ තබාගෙන, හොඳින් හුස්ම ගන්න. අල්ල හැකි තරම් පොළව දෙසට රැගෙන එන අතරේ, නළල දණිස් මත ගාවන්න. යළි හොඳින් හුස්ම ගන්න අතරේ අත් ඔසවා අත්ල ඉදිරියට වන සේ ගෙන පිටුපසට බර වෙන්න. ඉන් පශුව හුස්ම පිට කරන අතරේ , නළල සෙමින් දණහිසේ ගාවන්න. අල්ල බිම ගාවන්න. එලෙසින් රැඳී ඉන්න.
අල්ල බිම තිබියදීම දකුණු පාදය පිටුපසට ගේන්න. වම් පාදයත් පිටුපසට ගන්න. පාද දෙක අතර අඩියක පමණ දුරක් තබා ගන්න. ඉණ ප්‍රදේශයෙන් උස්ව තබාගන්න.
පා දෙක නවා, (හිඳගන්නා ආකාරයට) නළල පොළවට තබන්න. අත් දෙක ක්‍රමයෙන් දණහිස් මතට ගන්නා අතරේ කෙලින් වෙන්න.
ඇස් පියාගෙන, හෙමින් හුස්ම ගෙන හුස්ම පිට කරන්න.
දණහිස් දෙක ඈත් කර, අත් දෙක ඔසවන්න. හුස්ම ගන්න. හුස්ම පිට කරන අතරේ නළල පපුව දෑත් පොළවට සිටින සේ දිග ඇදෙන්න. ඇදී සිටින්න. යළි මුල් ඉරියව්ව ට එන්න. ( හිඳගෙන,දෙපා මත දෑත් තබාගෙන )
මේ යෝග ආසන ක්‍රම පුරුදු කරනකොට අනිවාර්යයෙන් ඔබේ ශරීරයේ නම්‍යශීලි බව වැදගත්. ඒත් එක්කම ක්‍රම ක්‍රමයෙන් හුරු වීම වැදගත්. ඒ නිසා යෝජ කරන්න කලින්, අනිවාර්යයෙන් ඒ වෙනුවෙන් උපදෙස් නිසි පරිදි ගන්න කියලත් අපි ඔබට මතක් කරනවා.
