” එතකොට මෞර්යා ඔයා මේ කතාව දැන ගෙන හිටියා ? ”
ඉරිදා දිනයේදී මෞර්යාව මුණ ගැසීමට ආදිත්‍ය පැමිණියේය. අශිකා ගේ අතීතයේ ආදරය මෞර්යා ගේ පියා බව අශිකා ගෙන් දැන ගැනීමෙන් පසුව ආදිත්‍ය උන්නේ නොසන්සුන් බවිනි. ඇවිදින මං තීරුව අසලට මෞර්යාට පැමිණෙන්නයි කී ආදිත්‍යය ඇය පැමිණි පසුව ඇගේ වාහනයට ගොඩ වූයේ ය.
” දැන ගත්තා කියලා මං මොනවා කරන්නද ආදිත්‍යය. තාත්තා ගැනයි අශිකා මැඩම් ගැනයි දුක් වෙනවා ඇරෙන්න මට ඇත්තටම කරන්න දෙයක් තිබුණෙ නැහැ “
මෞර්යා කීවේ ඇත්තටම සංවේගයෙනි. අතීතය ගැන සිතා මොනතරම් දුක් වූවත් දැන් ඒ කිසිවක් වෙනස් කළ නොහැක.
” ඔයා මාත් එක්ක තරහද ආදිත්‍යය ? ”
ආදිත්‍ය නිහඬව ඉවත බලා ගෙන සිටි නිසා මෞර්යා ඇසුවාය.
” ඇත්තටම ඉතින් ඔයා මොනව කරන්නද මෞර්යා. අපි හැමෝගෙම ජීවිත එක එක විදිහට වෙනස් වෙලා ඉවරයි නේ ”
” තාත්තා අශිකා මැඩම්ට වෙලා තියෙන දේවල් ගැන හිතේ අමාරුවෙන් ඉන්නේ. නොකිව්වට එයා ඒ ගැන හුඟාක් හිතනවා ”
” ඔව් ඉතින් එයා හිත හදා ගන්න ඇත්තෙම අපේ අම්මා හොඳින් ඉඳියි කියලා හිතලනේ “
දන්නා තරමින් මෞර්යා තරමටම ඇයගේ පියා ද ඉතා ගුණ යහපත් කෙනෙකි. එක අතකට අතීතයේදී මේ විවාහය කෙරෙන්නට ඉඩ හැරියා නම් තමාගේ මව මේ ලොව සතුටින්ම සිටින ගැහැණිය වන්නට ද ඉඩ තිබුණි.එහෙත් දෛවය විසින් ඇගේ ජීවිතය තීරණය කර තිබෙන්නේ වෙනස්ම සැලසුමකට අනුවය. දැන් ඇයට ඉතිරිව ඇත්තේ තමාත් සහෝදරයාත් පමණි.
” තාත්තා හරි හමන් විදියට මේ ප්‍රශ්න කතා කරලා ඉවරයක් කරන්නෙත් නැහැ. අපිට බිස්නස් ටික බාර දීලා එයා කොහෙද මං දන්නෑ ජීවත් වෙනවා. අඩුම ගානේ අම්මා සනීපෙන්ද කියල වත් එයා හොයලා බලන්න නෑ මෞර්යා. තමන් ගේ හස්බන් තමන් ගෙන් ඩිවෝස් වෙලා වත් නැතුව ජීවතුන් අතරත් ඉද්දි මොන ගෑනිටද ඉවස ගෙන ඉන්න පුළුවන්? අමාරුම දේ කරන්න ඕන මොකක්ද කියලා දන්නෙවත් නැතුව ඉන්න වෙන එකයි මෞර්යා ”
මෞර්යා කල්පනාවක ගැලී උන්නාය. ජීවිතයේ තිබූ සැහැල්ලුව කෙමෙන් කෙමෙන් පලා යන බව හැඟේ.තරුණ වියට පා තබත්ම ජීවිතය බිඳෙන් බිඳ සංකීර්ණ වෙමින් පවතින අතර බොහෝ ගැටලුවලට විසඳුම් සෙවිය යුතුව තිබේ.
” මුලින්ම ඔයා ගේ ඩිවෝස් එකේ ප්‍රශ්නෙ විසඳ ගෙන ඉමු ආදිත්‍යය. මං හිතන්නේ ඊට පස්සේ ඔයා ඔයා ගේ තාත්තත් එක්ක මේ ප්‍රශ්න ගැන කෙලින් කතා කරා නම් හොඳයි. අම්මා උනත් කොච්චර හිතෙන් විඳවනවා ඇතිද ඔය විදිහට තනි වෙලා. මේ යන්නේ එයා සතුටින් සැහැල්ලුවෙන් ඉන්න ඕන කාලේ.එහෙම කාලෙක ඇයි මට මෙහෙම වුණේ කියලා හිත හිත එයා විඳවන්න ඕනෙද ? ”
” මාත් හිතුවේ ඒකම තමයි මෞර්යා. එයා මගේ ඩිවෝස් එක ගැනත් බලනවා කිව්වට එහෙම බලන පාටක් නෑ.ඒක මට මොකක් හරි කර ගන්න පුළුවන් .මට දුක එයා අම්ම දිහා ඇහැක් වත් ඇරලා බලන්නේ නැති එක. අම්මා එයාට ආදරේ කරපු මනුස්සය වත් අත ඇරලා තාත්තව බඳින්න ඇත්තේ කොච්චර බලාපොරොත්තු තියා ගෙනද ? එහෙම එකේ ඒ බලාපොරොත්තුවත් නැති උනහම අම්ම ඔහොම හරි හිනා වෙලා ඉන්න එක පුදුමයක් “
ආදිත්‍ය කම්පා වූයේය. විවාහයක් බිඳ වැටීම වේදනාවකි. තමාද මේ මොහොතේ ඒ වේදනාව විඳිමින් සිටින නිසා මව ගේ වේදනාව තේරුම් ගැනීම කිසිසේත්ම අපහසු නොවේ.
” මං ඔයා ගැන අම්මට කියන්න හිතන් ඉන්නෙ මෞර්යා ”
ආදිත්‍ය එකවරම කීවේ අනපේක්ෂිත මොහොතකය. එවැනි කාරණාවකට ඉක්මන් වීම එතරම් සුදුසු නොවන බව මෞර්යා සිතුවේ එවිටය. අශිකා සිටින්නේ පරම්පරා ගණනකට එහායින් ය. සමහරවිට ඇය මේ බැඳීම ගැන වරදවා සිතන්නට බොහෝ ඉඩ කඩ ඇත.
” මං හිතන්නේ නෑ ආදිත්‍යය ඒක එච්චර හොඳ අදහසක් කියල ”
” ඇයි? ”
” අපි හිතන විදියට අම්මල තාත්තලා හිතන්නෙ නැහැ. අපි එයාලව කොච්චර තේරුම් ගත්තත් සමහර තැන් තියෙනවා එයාලට අපිව තේරුම් ගන්න බැරි. අපි හිතන පතන විදිය තේරුම් ගන්න බැරි . ඔයා අපි ගැන අම්මට කියන එකෙන් සමහර විට අලුත් ප්‍රශ්නයක් ඇති වෙන්න පුළුවන් ”
මෞර්යා පිළිතුරු දුන්නේ බොහෝ දුර දිග සිතා බලාය. ආදිත්‍ය මොහොතකට නිහඬ වූයේය. තමා මෞර්යා සමග බැඳී ඇති බව සත්‍ය නමුත් තවමත් තමා පෙර විවාහයෙන් නීත්‍යානුකූලව වෙන් වී නැත. තමා මෞර්යා පිළිබඳව තම මවට කිවහොත් සමහරවිට ඒ ඔස්සේ අභිමන් මේ දැන ගන්නටද ඉඩ ඇත. එවිට ඔහු විරසක වීමට පවා හැකිය. තමාට වඩා වසර දහයක් ලාබාල මෞර්යාද තමා නොසිතන දේවල් පිළිබඳව බොහෝ දුරදිග සිතා බලා ක්‍රියා කරන ආකාරය ගැන ආදිත්‍ය පුදුම වූයේය.
” මං කල්පනා කරන අනිත් දේ තමයි මෞර්යා අපේ මල්ලි මේ දේ දවසක කොහොම බාර ගනීද කියන එක. එයා ආදරේ කරන කෙල්ල ආදරේ කරන්නේ මට කියලා දැන ගන්න එක එයාට ලොකු ෂොක් එකක් වෙයි ”
එය ඇත්තය.එහෙත් කළ හැකි දෙයක් නැත.හිත් වල ආදරය ඇති වන්නේ පුදුමාකාර ලෙසටය. ඒවා සිදු වන්නේ පෙර සංසාර වල පතාගෙන ආ ආකාරයටය. කෙසේ වුවත් අභිමන් යනු ගතානුගතික අදහස් ඇති නූගත් තරුණයකු නොවන නිසා දිනක ඔහු මෙම තත්ත්වය තේරුම් ගනු ඇත.
” මිස්ටර් අභිමන් මේක තේරුම් ගනියි කියලා මං දන්නවා ආදිත්‍යය. අනිත් එක එයා කවදාවත් ඔයාගේ සතුටට බාධා කරන එකක් නැහැ. එයාට වටින්නේ ඔයාගේ සතුට. මං දැක්කනේ ෂෙහාරා ඔයාට චීට් කරපු වෙලාවෙ එයා දුක් වෙච්ච විදිය ඔයා ගැන. ඒ නිසා එයා මේකත් තේරුම් ගනියි අනිවාර්යෙන්ම ”
” නඩුව ඉවර වෙනකම් මගේ හිතට සැනසීමක් නෑ මෞර්යා. අනිත් එක මං ආස නෑ ඔයා මේ ප්‍රශ්න වලට ගෑවෙනවට. ඒක ඔයා ගේ නමටත් හොඳ නෑ. ඔයා ගේ අම්මයි තාත්තයි උනත් මං ගැන වැරදියට හිතන්න පුළුවන්. අම්ම ගේ ප්‍රශ්නේ නිසා මං ඔයාව එළියෙදි හම්බුනා මිසක මං හිතා ගෙන හිටියේ වැඩිය එළියෙදි ඔයාව හම්බ නොවී ඉන්න. මොකද ෂෙහාරාට උනත් ඒක වාසියට හිටින්න පුළුවන්. අන්තිමට ඔයාට වෙන්නෙත් උසාවි පොලිසි ගානේ රස්තියාදු වෙන්න ”
ආදිත්‍ය වචනයෙන් නොපැවසුවාට තමා හට ආදරය කරන බව සහ තමා ගේ ආත්ම ගෞරවය පිළිබඳව සිතන බව මෞර්යා බොහෝ දුරට තේරුම් ගත්තේ ඒ වදන් වලිනි. ආදිත්‍ය කෙරෙහි වූ ගෞරවය සහ ලයාදරත්වය තවත් වැඩි වන්නට ඒ වචන කිහිපයම මෞර්යාට ප්‍රමාණවත් විය. කලකට පෙර ආදිත්‍යව මුණ ගැසුනා නම් ඔහු අද මෙවන් තත්ත්වයකට පත්ව නොසිටිනු ඇතැයි මෞර්යා කල්පනා කළාය.
” කොහොමත් අපි ඔෆිස් එකේදි හම්බ වෙනවනේ ආදිත්‍යය. ඔයාගේ නඩුව ඉවර වෙනකන් මං නිසා ඔයාට ප්‍රශ්නයක් වෙනවට මම කැමති නැහැ කොහොමත්. අවශ්‍යම දෙයකට ඇරෙන්න අපි මෙහෙම හම්බ නොවී ඉන්න එක හොඳයි ඔයා කියනවා වගේ ”
අනතුරුව දෙදෙනා අතර වූයේ නිහැඬියාවකි. ආදරය කිරීම පහසු වන නමුත් ආදරය ජය ගැනීම සහ ආදරය නිසා පැමිණෙන ගැටලු වලට මුහුණ දීම පහසු නැත. එයට විශාල ආත්ම ශක්තියක් තිබිය යුතුය. ඉදිරියට පැමිණෙන්නේ කාලයකි. තම අතීතයේ පෙම්වතා සමග නෑදෑ කමක් ඇති කර ගැනීමට අනාගතයේ දිනක තම මව වුවද අකමැති වීමට බොහෝ ඉඩ කඩ ඇත. තමා එක ගැටලුවකින් මිදී පා තබන්නට යන්නේ තවත් ගැටලුවකට දැයි ආදිත්‍යය කල්පනා කළේය.එහෙත් මෞර්යා තමා සමග එක සිතින් සිටිනවා නම් ඕනෑම දෙයකට මුහුණ දීම පහසු වනු ඇත. අනෙක් අතට තමා තුළ නොවන ආත්ම ශක්තියක් සහ ධෛර්යයක් මෞර්යා තුළ තිබෙන බව දැනටමත් රහසක් නොවේ.
” මං දෙයක් අහන්නද මෞර්යා ? ”
” මොකද්ද ? ”
” ඩිවෝස් වෙච්ච මිනිහෙකුට තමන්ගේ එකම දුවව දෙන්න ඔයාගේ අම්මයි තාත්තයි කවද හරි කැමති වෙයිද ? ”
