සාර්ථක, ශක්තිමත් සහ සෞඛ්‍ය සම්පන්න සම්බන්ධතාවයක් කියන්නේ දෙදෙනෙකුගේ කැපවීම් සහ පරිත්‍යාග කිරීම් වල එකතුවක්. ඒ වගේම ශක්තිමත් සම්බන්ධතාවයක් සඳහා තව බොහෝ දේ වැදගත් වනවා. ප්‍රීතිමත් විවාහයක් සහ සාර්ථක සම්බන්ධතාවයක් පවත්වාගෙන යාම සඳහා දෙදෙනාම එක්ව ඉතා හොඳ අවබෝධයකින් කටයුතු කළ යුතු වන අතර ඔබේ සබඳතාවය තවත් ශක්තිමත් කර ගැනීම සඳහා ඔබට කළ හැකි දේවල් කීපයක් ගැනයි මේ ලිපිය.
වැඩ බෙදා ගන්න
විශේෂයෙන්ම විවාහ ජීවිතයකදී ගැහැණියට සහ පිරිමියාට වෙන් වූ වශයෙන් වගකීම් සහ යුතුකම් ඇති බව බොහෝ දෙනා සිතනවා. ගෙදර දොරේ වැඩ කටයුතු ගැහැණිය අනිවාර්යයෙන්ම කළ යුතු බවත් මුදල් ඉපයීම වැනි කටයුතු පිරිමියා විසින් කළ යුතු බවත් අතීතයේ පටන් පැවත එන සම්මතයක්. නමුත් මෙම සම්මතය බිඳ වැටිය යුතු කාලය එළඹ ඇති අතර නිවසේ වැඩ කටයුතු , දරුවන්ගේ වැඩ කටයුතු සහ මුදල් ඉපයීම ඇතුළු නිවසේ සියලු කටයුතු ඔබේ සහකරු හා බෙදා ගන්න. නිවසේ ඇති වගකීම් සහ යුතුකම් සම්බන්ධයෙන් ඔබේ අදහස් සහ ගැටලු නිරන්තරයෙන් ඔබේ සහකරු සමග සාකච්ඡා කරන්න. විවෘතව සන්නිවේදනය කිරීම විවාහ ජීවිතයකට සහ ඕනෑම සම්බන්ධතාවයකට වැදගත් වන අතර එක් සහකරුවෙකුට වැඩි වගකීමක් යෙදෙන විට නොදැනීම අමනාපකම් සහ ගැටුම් මතුවීම සිදුවනවා. ගෙදර දොරේ සහ අනෙකුත් වැඩ කටයුතු වලදී සහයෝගයෙන් කටයුතු කිරීම සහ සම්මුතියකට එළඹීමට ක්‍රම සොයා ගැනීම ආතතිය අඩු කර ගැනීමට සහ වඩාත් ප්‍රීතිමත් සහ තෘප්තිමත් සම්බන්ධතාවයකට මඟ පාදනවා.
ආදර සටහන් ලියන්න
නවීන තාක්ෂණයත් සමඟ කෙටි පණිවිඩ හුවමාරු වීම හැරුණු කොට ආදර සටහනක් හෝ ලිපියක් හුවමාරු වීම වර්තමානයේදී සිදු වන්නේ නැහැ.නමුත් මෙවැනි කුඩා දේවල් ඔබේ සබඳතාවය තවත් ශක්තිමත් කරන අතර ඔබ අනෙකා කෙරෙහි ඇති කෘතඥතාවය සහ සෙනෙහස හෘදයාංගමව ප්‍රකාශ කිරීමක් සිදුවනවා. ඔබේ සහකරුට ඔබෙන් අහඹු ලෙස මෙවැනි ආදර සටහනක් හෝ ලිපියක් ලැබීම මගින් ඔහුට ඔබ කෙරෙහි ඇති ආදරය වෙනස් ආකාරයකින් දැනවීම සිදුවන අතර එය හොඳ සිහිවටනයක් ද වනවා. වර්තමානයේදී මෙවැනි දේවල් ආදරවන්තයන් සහ අඹුසැමි යුවළවල් අතින් ගිලිහී යන අතර ඇත්ත වශයෙන්ම ඒවා ඔබ දෙදෙනාගේ සම්බන්ධතාවය ශක්තිමත් කර ගැනීමට සහ වර්ධනය කර ගැනීමට හැකිවන ක්‍රම වලින් හොඳම එකක්.
ඕනෑම තැනක ආදරය පෙන්වන්න
සමහර ආදරවන්තයන් පොදු ස්ථානයක හෝ වෙනත් ප්‍රසිද්ධ ස්ථානයක තම පෙම්වතාගේ හෝ පෙම්වතියගේ අතින් ඇල්ලීම පවා ප්‍රතික්ෂේප කරනවා. ඔබට ඔබේ ආදරය පිළිබඳව විශ්වාසයක් සහ ඔබ ඒ පිළිබඳව වගකීමක් සහිතව සිටිනවා නම් ඔබ කිසිම විටක ඔබේ සහකරුට හෝ සහකාරියට ඕනෑම තැනක ඔබේ ආදරය පෙන්වීමට පැකිලෙන්නේ නැහැ. ඔබ එසේ පැකිලෙන විට ඔබේ ආදරය පිළිබඳව අනාරක්ෂිත බවක් සහ විශ්වාසය රහිත බවක් ඔබේ සහකරුට හෝ සහකාරියට දැනෙන්නට පටන් ගන්නවා. එවැනි තත්ත්වයන් ඔබේ සම්බන්ධතාවයට සෘජුවම බලපානවා.
ප්‍රශංසා කරන්න
ප්‍රශංසා කිරීම ඕනෑම සම්බන්ධතාවයක ශක්තිමත් භාවයට බලපානවා. ඔබේ සහකරු ඔබට ලබා දෙන්නේ මිල අධික ත්‍යාගයක්ද එසේ නැතිනම් කුඩා කැලෑ මලක්ද ? ඒ කුමක් වුවත් එය අගය කරන්න. ප්‍රශංසා කරන්න. ඔබේ සහකරු ඔබ වෙනුවෙන් කරන ඕනෑම කුඩා දෙයක් ප්‍රශංසාවට ලක් කරන්න. එය ඔබ ඔබේ සහකරු වෙනුවෙන් ලබා දෙන විශාලම වටිනාකමයි. ඔබ වෙනුවෙන් ඕනෑම දෙයක් කිරීමට ඔබේ සහකරු පෙළඹෙන්නේ එවැනි ප්‍රශංසා ලැබෙන විට වන අතර එවැනි ප්‍රශංසා කිරීම් මගීන් ඔබ දෙදෙනා අතර ඇති චිත්ත වේගීය බැඳීම වඩාත් ශක්තිමත් සහ ගැඹුරු එකක් බවට පත්වනවා.
ආදරය ප්‍රකාශ කරන්න
විවාහ ජීවිතයකදී හෝ ඕනෑම සම්බන්ධතාවයකදී ඇති වගකීම් සහ යුතුකම් සමග බොහෝවිට දෙදෙනාටම මගහැරෙන දෙයක් තමයි ආදරය ප්‍රකාශ කිරීම. නමුත් ඔබ විසින් කිසිවිටෙකත් අමතක නොකළ යුතු ප්‍රධානම කාරණයත් එයමයි. ඕනෑම සම්බන්ධතාවයකදී අනෙකා ඔබෙන් ආදරය අපේක්ෂා කරන අතර එය පැවසීම හා පෙන්වීමද අපේක්ෂා කරනවා. කුඩා ත්‍යාගයකින් , කෙටි පණිවිඩයකින් , ආදර සටහනකින් හෝ අහඹු ලෙස ආදරය ප්‍රකාශ කිරීමකින් ඔබ දෙදෙනාගේ ආදරය වඩාත් ශක්තිමත් කළ හැකියි.
විශේෂ දින මතක තබා ගන්න , සමරන්න
ඔබ දෙදෙනා එකිනෙකාව මුලින්ම දුටු දිනය, කතාබහ කළ දිනය , දුරකථන අංක හුවමාරු කර ගත් දිනය, ආදරය ප්‍රකාශ කර ගත් දිනය සහ විවාහ වූ දිනය වැනි ඔබ දෙදෙනාගේ ආදරයේ සුවිශේෂී දින මතක තබා ගන්න. එවැනි කුඩා දේවල් මතක තබා ගැනීම සහ ඒවා සැමරීම මගින් ඔබේ ආදරය නැවත නැවුම් වන අතර ඔබ දෙදෙනා මුණ ගැසුණු මුල් සමයේ දැනුණු ආදරයම නැවත ඔබට අත්විඳිය හැකියි. මෙවැනි සැමරීම් සඳහා ඉතා කුඩා යාගයක් වුවත් ප්‍රමාණවත් වන අතර අවශ්‍ය වන්නේ ඔබ දෙදෙනා තුළ ඇති ආදරය පළුදු නොවී ඉදිරියටත් ශක්තිමත්ව පවත්වාගෙන යාමයි. ඔබේ සම්බන්ධතාවයට වැදගත් වන වැදගත් අවස්ථා මතක තබා ගන්නා බව පෙන්වීමෙන් සහ අගය කිරීමෙන් ඔබ ඔබේ සහකරු කෙරෙහි ඔබ තුළ ඇති කැපවීම සහ අගය පෙන්නුම් කරන එමගින් ඔබේ සම්බන්ධතාවයේ අත්තිවාරම ශක්තිමත් කරනවා.
අනෙකාගේ ඉලක්ක වලට සහයෝගය දක්වන්න
බොහෝ වේලාවට සම්බන්ධතාවයකදී තමාගේ ඉලක්ක සහ අපේක්ෂාවන් වෙනුවෙන් අනෙකාගේ සහයෝගය බලාපොරොත්තු වීම මිස අනෙකාගේ ඉලක්ක සහ අපේක්ෂාවන් වෙනුවෙන් සහයෝගය ලබාදීම සහකරුවන් අතින් සිදු වන්නේ නැහැ. මෙවැනි අවස්ථා වලදී සිත් තුළ අමනාපකම් ඇතිවීම සහ වර්ධනය වීම සිදුවන අතර ඒවා සම්බන්ධතා පළුදු වීම දක්වා සංකීර්ණ වීමේ අවස්ථා තිබෙනවා. ඒ නිසා ආදර සම්බන්ධතාවයකදී හෝ විවාහ ජීවිතයේදී පවා අනෙකාගේ ඉලක්ක සහ අපේක්ෂාවන් අමතක නොකරන්න. එය ඔබේ සහකරුගේ වෘත්තීය ජීවිතය හෝ හැකියාවක් පිළිබඳව හෝ වේවා ඒවා අගය කරන්න , සහයෝගය දක්වන්න.
සම්බන්ධතාවයක් ශක්තිමත් කර ගැනීම සඳහා දෙදෙනාගේම කැපවීම සහ උනන්දුව අත්‍යවශ්‍ය වන අතර එය ඔබ දෙදෙනාගේම ආදරය නොනැසී පවත්වාගෙන යාමට විශාල රුකුලක් වෙනවා. මේ ලිපියෙන් අපි ඔබට කරුණු ගෙන ආවේ ඔබ දෙදෙනාගේ ආදරය ශක්තිමත්ව පවත්වාගෙන යාම සඳහා ඔබට කල හැකි සරල දේවල් කිහිපයකුයි.
