පැවතිය යුතු නියමිත ප්‍රමාණය ඉක්මවා ශරීර බර වැඩිවීම කොලෙස්ට්‍රෝල්, දියවැඩියාව සහ හෘද රෝග වගේ රෝග ගණනාවක් ඇති කරන්න හේතු වෙනව කියල ඔබ දැනටමත් දන්නව ඇති.
හෝමෝන ක්‍රියාකාරීත්වයේ ඇති ගැටළු, විවිධ රෝගාබාධ සහ ඒවාට ගන්නා ඖෂධ, මානසික අස්ථාවරවීම්, ජීවන රටාව සහ ව්‍යායාම හිඟවීම වගේම ප්‍රධාන වශයෙන් අපේ ආහාර රටාවත් මේ සිරුරේ අනවශ්‍ය බර වැඩිවීමට හේතු වෙනව කියල හොයාගෙන තියෙනවා.
බර පාලනය කරල හැඩැති සිරුරක් ලබාගන්න බොහෝ දෙනෙක්ට ඕන වුනත් ඒ සඳහා තියෙන ප්‍රධානම බාධාව විදිහට කෑම කන්න ඇතිවෙන ආසාව, බඩගින්න හඳුනාගන්න පුළුවන්.
ඉතිං, ඔබටත් නිතරම බඩගිනි එනව නම්, මොනවහරි කන්නම හිතෙනව නම්, ඒකට විසඳුමක් අරගෙන තමයි smart lady අපි ඔන්න අද ඔබව හමුවෙන්නෙ.
අද අපි කතා කරන්නෙ බඩගිනි එන්නෙ නැතුව බඩ පිරිලා වගේ ගොඩක් වෙලාවක් දැනෙන්න කන්න පුළුවන් කෑම වර්ග මොනවද කියලයි.
ආහාර පාලනය කරන ඔබට හරිම වැදගත් වගේම පෝෂ්‍යදායි මේ ආහාර වර්ග මොනවද කියල දැනගන්න එහෙනම්, මේ ලිපියත් එක්ක එකතු වෙන්න කියල අපි බොහොම ආදරෙන් ඔබට ආරාධනා කරනවා.
ප්‍රෝටීන් අඩංගු ආහාර
ස්වභාවික ප්‍රෝටීන් අඩංගු ආහාර වල ඉතාම ඉහළ ප්‍රෝටීන් ප්‍රතිශතයක් අඩංගු වෙනව වගේම දිගු කාලයක් කුස පිරී ඇති හැඟීමක් ඇතිකර බඩගින්න ඇතිවීම වළක්වන්නත් ඒවාට හැකියාව තියෙනවා.
මේ ආහාර වර්ග අතර,
හම ඉවත් කළ කුකුළු මස් (විශේෂයෙන්ම පපුව කොටස)
ධාන්‍ය සහ ඇට වර්ග
කොටේජ් චීස්
ග්‍රීක් යෝගට්
මාළු වර්ග (Omega 3 අඩංගු මාළු වර්ග නම් වඩාත් හොඳයි0
කළුකුම් මස්
හරක් මස්
ටෝෆු
බිත්තර සුදුමද වගේ ආහාර ප්‍රධාන ස්ථානයක් ගන්නවා.
සංකීර්ණ කාබෝහයිඩ්‍රේට් සහිත ආහාර
සංකීර්ණ කාබෝහයිඩ්‍රේට් අඩංගු ආහාර වර්ග ශරීරය තුළ බිඳවැටී ශක්තිය ජනනය කිරීම සඳහා වැඩි කාලයක් ගත කරනවා.
ඒ නිසා සංකීර්ණ කාබෝහයිඩ්‍රේට් අඩංගු,
ඕට්ස්, රතු සහ නිවුඩ්ඩ ඉවත් නොකළ සහල් වැනි සම්පූර්ණ ධාන්‍ය,
කඩල, කව්පි, පරිප්පු වැනි ඇට වර්ග,
රතු අල සහ බතල වැනි අල වර්ග වගේම
බ්ලූබෙරි, ඇපල්, කෙසෙල්, අඹ, ස්ට්‍රෝබෙරි වැනි පළතුරු වර්ග ආහාරයට ගන්න ඔබට පුළුවන්.
තන්තුමය ආහාර වර්ග
තන්තු බහුල ආහාර නිසා ආමාශය හිස්වීම ප්‍රමාද වී බඩගින්න ඇතිවීම ප්‍රමාද කරනවා.
ඒ නිසා,
ඕට්ස්,
අලිගැටපේර,
කෙසෙල්,
කැරට්,
බීට්,
කොහිල,
වම්බටු,
කඩල වගේම කොළ පාට කොළ එළවළු ආහාර වේලට එකතු කරගන්නත් ඔබට පුළුවන්.
හොඳ මේදය
ආහාර පාලනය කරන අපි මේදය නරක දෙයක් කියල හිතුවත් හොඳ මේදය ලබාගැනීම අපේ සිරුර නීරෝගීව පවත්වා ගන්න අනිවාර්‍ය දෙයක්.
ඒ නිසා,
Omega 3 අඩංගු සැමන් වැනි මාළු වර්ග,
බිත්තර,
අලිගැටපේර,
ඔලිව් ඔයිල්,
ඇට සහ බීජ වර්ග ඔබේ ආහාර වේලට එකතු කරගන්න පුළුවන්.
වතුර
බර පාලනයට විතරක් නෙමෙයි වතුර කියන්නෙ අපි හැම කෙනෙක්ම ඉතාම උවමනාවෙන් වගේම අනිවාර්‍යෙන්ම අපේ ශරීරයට ලබාදිය යුතුම දෙයක්.
ඔබේ සිරුර විජලනයෙන් තොරව පැවතීම අනවශ්‍ය බර අඩුකිරීමට අනිවාර්‍ය සාධකයක් බව අපි ඔබට මතක් කළ යුතුමයි.
වැඩ්පුර නොකා ඉන්න කියල කන්න කලින් වතුර වීදුරුවක් බොන පුරුද්ද ඔබටත් තියෙනව නම්, ඒ පුරුද්ද ඔබේ ආහාර ජීර්ණයට බාධාවක් කියලත් අපි මතක් කරන්න කැමතියි.
ඒ නිසා අපි කලින් https://smartlady.lk/article/34519/health-25/ ලිපියෙන් කතා කරා වගේම කන්න පැය භාගෙකට කලින් වතුර වීදුරුවක් බීල කාල පැයකට පස්සෙ තව වතුර වීදුරුවක් බොන්නත් ඔබට පුළුවන්.
මේ ආහාර වර්ග ගැන කතා කරද්දි ඔබ අනිවාර්‍යෙන් දැන සිටිය යුතුම සහ මතක තබා ගත යුතුම කාරණාවක් තිබෙනවා.
අපි එකිනෙකාගේ ශරීර එකිනෙකාට වෙනස් වගේම අපි එකිනෙකාගේ වර්තමාන සෞඛ්‍ය තත්වයනුත් එකිනෙකට වෙනස්.
ඒ නිසා ඔබේ සෞඛ්‍ය තත්වය මත මේ සමහර ආහාර වර්ග ආහාරයට ගැනීම සෞඛ්‍ය ගැටළු ඇති කරවන්න පුළුවන්.
සියළු පෝෂක වලින් යුතු සමබර ආහාර වේලක් මේ ආහාර එකතු කරගෙන නිර්මාණය කරගනිද්දි ඔබේ වෛද්‍යවරයාගෙන් ඒ පිළිබඳව උපදෙස් ලබාගන්නත් ඔවුන් නිර්දේශ නොකරන ආහාර ගැනීමෙන් වළකින්නත් ඔබ හොඳින් මතක තබාගත යුතුමයි.
එහෙනම්, මේ වගේම වැදගත් ලිපියකින් අපි නැවත හමුවෙමු.
සටහන – දුලානි නවෝද්‍යා
 | ReplyForwardAdd reaction |
