මල්සර හී සර – 2

0
3642

“යාලුවො දෙන්නම ආවද ඔඩිශන් එකට?” කියලා කියන ගමන් තමයි එතන උන්නු මනුස්සයා දෙන්නගෙම ඇඳුමෙ අංක දෙකක් ලියපු ටැග් දෙකක් එල්ලුවෙ. සප්තමී නම් හැදුවෙම “අනේ මං ආවෙ ඔඩිශන් එකට නෙවෙයි, මේ මෙයාගෙ තනියට” කියලා කියන්න හැදුවට මොකෝ මාලවී නම් පෙරැත්ත කලේම ආතල් එකට හරි ඔන්න නිකමට ඕකට ඇවිත් පොඩ්ඩක් මූණ දාලා බලන්න කියලා. 

“අනේ බං, මං මේ ගෙදර ඉන්න ගමන් වගේ ආවෙ. මට ඔය රඟපාන සීන් එහෙම තේරෙන්නෙ නෑ කියල උඹ දන්නවනෙ. අනික ලිප්ස්ටික් ටිකක්වත් හරියට ගාලා පව්ඩර් ටිකක්වත් දාන් නෙවෙයි ආවෙ. මේ මිනිස්සු හිතාවි පිස්සු කියල. අනික මං ඇඳන් ආව එක බලපංකො” කියල සප්තමී ඥරු ඥුරු ගගා උන්නට මාලවී හිටියේ ඒව ඇහිච්ච ගමන් නෙවෙයි. හිත අස්සෙන් තමන්ගෙ වෙලාව ආවම ඔඩිශන් එකේ රඟපාලා, ඒකෙන් තේරිලා, නිළියක් වෙලා සෑහෙන ටෙලි නාට්‍ය, ඇඩ්වටීස්මන්ට්, ෆිල්ම් වල එහෙම රඟපාලා, ලක්ස් ෆිල්ම් අවෝඩ්ස් වල හොඳම නිළියට සම්මානෙත් දිනලා.

“මේකප් දාන ආව චරිත වගේම නැති ඒවත් මේ කතාවෙ ඇතිනෙ. යාලුවා මේන් කැරැක්ටර් එකට තේරිලා ඔයා පොඩි චරිතෙකට හරි තේරුණොත් දෙන්නටම බැරිය රඟපාන්න එන්න” කියලා එතන උන්නු තේ අල්ලන මනුස්සය හිනා වෙවී කියද්දි නම් සප්තමීත් හීන් සැරේ හිනා උනා. වෙන ඉතින් මොකක් කරන්නද? අඬන්න කියලය.

මාලවී නම් උන්නෙ එක එක විදියට මූණෙන් ඇක්ශන් හද හද මොන විදියෙ චරිතයක් රඟපාන්න ආවත් ඒක ආයෙ ඇඬෙන ලෙවල් එකෙන් කරන්න බලාපොරොත්තුවෙන්. සප්තමී හිටියෙ මාලවීට ළමයි දෙතුන් දෙනෙක් පිටිපස්සෙන්. සප්තමී නම් තමන්ට ඉස්සරහින් ඉන්න මාලවී දිහාවට ඇහැ දාන් උන්නට මොකෝ පිටිපස්සෙ තමන් එක්ක ආව සප්තමී කෙනෙක් ඉන්නවද කියන එකවත් මාලවීට ඇත්තටම මතක තිබ්බෙ නෑ.

මේ අද ඔඩිශන් කරන ටෙලි නාට්‍යයේ නිශ්පාදකවරයා වෙන සමුද්‍ර මාකලන්ද ඒ වෙද්දිත් ඇවිල්ලා තිබ්බෙ නැතුවට මොකෝ නිශ්පාදනේ සමුද්‍රගෙ උනාට අධ්‍යක්ශනේ කරන්නෙයි ඔක්කොම නලු නිලියන්ගෙ තේරීම් භාර කමිටුවෙ බර දරන්නෙයි වසන්ත කලුආරච්චි අධ්‍යක්ශක තුමා හන්දා උන්දැ නම් උදේම ඇවිල්ලා, තමන් එක්ක නිළියන්ව තෝරන්න උන්නු අනිත් කාණ්ඩෙ එක්කල කතා කර කර තමා උන්නෙ. සමහරක් ගෙ පෙනුම ලස්සන එක ගැනයි සමහරක් එච්චර ලස්සන නැති එක ගැනයි කතා කර කර උන්නට මොකෝ තමන් මහන්සි වෙන එකේ කතාව ආයෙ ටොප් එකට තියෙන්න ඕන කියල කොලිටිය ගැන හිතන කලුආරච්චි මහත්තය නම් උන්නේ “පෙනුම තරම්ම වැදගත් නෙ රඟපාන්න පුලුවන්ද බැරිද කියන එක” කියල හිතන ගමන්. 

“ඇවිල්ලා ඉන්න සමහර අය නම් ටිකක් ටූ මච් වගේ නේද?” කියලා අධ්‍යක්ශකල් තුමා ළඟම කැරකි කැරකි උන්න එක්කෙනෙක් කියද්දි උනත් වසන්ත කළුආරච්චි නම් කලේ හිනාවෙන එක.

“අනිත් මොන ඒව ටූ මච් උනත් මොකෝ රඟපාන එක ගාණට මිම්මට කරනවනම්”

“මිස්ට කළුආරච්චි මහත්තයා මොකෝ දැනටම ඉන්ඩස්ට්‍රි එකේ ඉන්න හොඳට පලපුරුදු නිළියක් අරගන්නෙ නැතුව මේ කතාවට අලුත් මූණක් හොයාගන්න හිතුවෙ?”

“මෙහෙමනෙ රූපා මිස්, පරණ පුරුදු පලපුරුදු අය හොඳයි. අපිටත් දැන ඇඳුනුම්කම් මත වැඩේ කරගෙන යන්න ලේසි. ඒ උනාට මම මේකට අලුත් මූණක් ගන්නම ඕන කියල හිතුවෙ ඇත්තටම තනි තීරණේකට නෙවෙයි සමුද්‍රගෙනුත් අහලා. අපේ දැන් ෆීල්ඩ් එකේ ඉන්න නිළියො දාගන්න කේස් රූපා මිස් දන්නවනෙ. එහෙම පෞද්ගලික ජීවිතෙයි රස්සාවයි කියලා අපි බැමි දාගෙන උන්නට බලන මිනිස්සුන්ට එහෙම නෑනෙ. අපේ කතාවෙන් තමයි මිනිස්සු නලු නිලියො දකින්නෙ. එතකොට උන් ඇත්ත ජීවිතේ දාගන්න කේස්වල කලු පැල්ලම් අපේ කතාවල ඉන්න චරිත වලටත් ගෑවෙන එක නතර කරන්න බෑ. මේ කතාව ලියන්න පටන් ගත්ත කාලෙම සමුද්‍රයි මායි කතාකරේ මේක හොඳට සම්මාන දිනන්න පුලුවන් කතාවක් වෙන හන්දා අපි කේස් නැති කට්ටියවම දාගෙන මේක කරමු කියල.සමුද්‍රගෙ ස්ක්‍රිප්ට් එක වෙන බව ඇත්ත. ඒ උනාට අරගන්න නලුවො නිලියො චොකා සීන් දාගත්තොත් අන්තිමේ කලු පැල්ලම මගෙ නමෙත් ගෑවෙනවා.

අනික ඉතින් අපිත් මොකෝ ආස නැද්ද අලුත් නිලියෙක් දෙන්නෙක් එහෙම පොඩ්ඩක් හුරතල් කරලා ෆීල්ඩ් එකට අරගන්න කියලා ” කියන ගමන් වසන්ත මහත්තය ජජ් බෝඩ් එකට වාඩිවෙන්න තියෙන දිහාවට ගියේ පොඩි පැණි බේරෙන හිනාවකුත් දාගෙන. වසන්ත කළුආරච්චි කියන්නෙ මේ ටෙලි ඩ්‍රාමා ඉන්ඩස්ට්‍රියෙ දේවල් දෙහෙකට ප්‍රසිද්ධ වෙච්ච හාදයෙක් විත්තිය නොදන්න කෙනෙක් උන්නෙ නෑ. එක පැත්තකින් උණු කැවුම් වගේ විකිණෙන ටෙලි නාට්‍ය, චිත්‍රපටි හදන හන්දයි, ඒ වගේම ඔය ලස්සන තරුණ නිළියො වටකරෙගන, ඒ කෙල්ලන්ව හොඳට මාකට් කරල අරගන්න හන්දයි වසන්තව දෙවිදියකට ඉන්ඩස්ට්‍රියෙ මාකට් වෙල තිබ්බෙ.

“අනේ ඇයි රත්තරං ඔයා මාව දාලා යන්නේ? ඔයාට පුලුවන්ද මං නැතුව ඉන්න. කොහොමද කොහොමද කියන්න ඔයා මාව රැවැට්ටුවෙ? මාත් එක්කම යාලුවෙලා ඉද්දි තව කෙනෙක් එක්ක යාලුවෙලා ඉඳියා කියන්නෙ? බොරු නේද මේක? මට ඇත්ත කියන්න? බොරු නේද මහත්තයො මේක? ඔයා මාව බඳිනවා කියල පොරොන්දු උනා නේද? දැන් ඇයි මට කියන්නෙ ගෙදරින් වෙන කෙනෙක්ව හොයලා දුන්නේ කියලා” ඔඩිශන් එකට ආව හැමෝම ඉස්සර අඬන ගමන් තමන්ට ලැබිච්ච “පෙම්වතා විසින් වංචාකර අත හැර හමන ලද පෙම්වතියකගේ චරිතය” කරපු මාලවී නම් අනේ මන්දා ඇක්ට් එකට ගැලපෙන විදියටම කඳුලු හොයාගත්තෙ කියලා. මාලවී අඬ අඬ එවෙලෙ පෙම්වතා විදියට දාලා උන්නු ඩමි නලුවා කියන කියන දේට අඬා වැලපි වැලපි ඉද්දි වටේ උන්නු කට්ටිය උන්නෙත් හුරේ දාන ගමන් මාලවීව තව තව චියර් අප් කර කර. ඒ චියර් කිරිල්ල හන්දම මාලවී හිතුවෙ තමන්ට මේ පාට් එක ලැබුණම තමයි කියල. එතන ආපු හැම කෙල්ලම වගේ කිව්වෙ කරේ ඔය වචන ටික උනාට මොකෝ තමන් වගේ ඕන වෙලාවට ඇහැට කඳුලක් ගන්න උන්ට බැරිවෙච්ච එකම තමන්ට මේ පාට් එක ලැබෙන්න හේතුවක් වෙන විත්තිය මාලවී දැනං උන්නා. 

“මරු, මරු, මරු” කියල තමන්ගෙ ඇක්ට් එකෙන් පස්සෙ වසන්ත කලුආරච්චි ඉඳගෙන උන්නු පුටුවෙන් නැගිටල අත්පුඩි ගහද්දි නම් මාලවී හිතෙන් ඒත් හිතුවත් එක්ක “වැඩේ හරි” කියලා.

“උඹ සුපිරියටම කලානෙ බං? කොහෙන්ද එහෙම එකපාර ඇස් දෙකට කඳුලු ගත්තෙ?” කියලා සප්තමී අහද්දි මාලවී නම් කලේ මූණට ආයෙම අර ආඩම්බර පාට එක්කහු කරගෙන මුකුත් නොකිය ඉන්න එක. ඒ උනාට මූණෙ ඇඳිලා තිබ්බේ “ඒව ඉතින් මං වගේ වෙල් ට්‍රේන්ඩ් අයට විතරයි පුලුවන්” කියන කතාව අඳුරගත්ත සප්තමී එතනින් එහාට ඉතින් මුකුත් දෙයක් කියන්න හිතුවෙ නෑ. 

“උඹ මොන වගේ එකක්ද කරන්න යන්නෙ මේ පාට් එකම තමයි මං හිතන්නෙ හැමෝටම දෙන්නෙ?”

“අනේ බං මට ඔය උඹට වගෙ අඬන දොඩන සීන් බෑ කියල දන්නවනෙ. ඇත්තටම ඇඬෙන එකකට උනත් මට ඇඬෙන්නෙ නැති එකේ මෙහෙම එකකට බොරුවට අඬන්න මට කොහොමත් බෑ. අනික මම මේ ජොලියට වගේනෙ ගිහින් බලන්නෙ. එහෙම එකේ නිකන් ඔය පොඩ්ඩක් එහෙට මෙහෙට කැරකිලා බලල එනවා” කියල සප්තමී කියද්දි මාලවී හිනාවෙලා ඔලුව වනලා හා හා කියල කිව්වට මොකෝ හිත අස්සෙන් නම් හිනාවෙච්ච එක නම් ඇත්ත. 

සප්තමීට ඉස්සරහ උන්නු ගෑණු ළමයි කීපදෙනා උනත් කලේ මාලවී කලා වගේම අඬන එක එහෙම නැත්තම් යස්සනී වගේ තරහා ගිහිල්ලා අර “පෙම්වතා” චරිතෙ කල කොල්ලගෙ බොටුව මිරිකන්න ට්‍රයි එකක් දුන්නු එක. එච්චර දුක්බර සීන්වත් ආවේග සීන්වත් කරන්න තමන්ට බැරි විත්තිය දැනගෙනම තමයි සප්තමී තමන්ගෙ අංකෙ කතා කරාම ඉස්සරට ගියේ.

“හරි දැන් මෙච්චර අවුරුදු ගාණක් යාලුවෙලා ඉඳපු මම තමුසෙව රවට්ටල වෙන ගෑණියෙක් බඳින්න යනවා කියලා දැනගත්තම උනත් තමුසෙට කිසිම ගාණක් නැද්ද ඕයි?” කියලා පෙම්වතා චරිතෙ අහද්දි උනත් සප්තමී නම් උන්නෙ ඩෝන්ට් කෙයා සීන් එකේ.

“මං මොකටද මේ මාව රවට්ටපු මිනිහෙක් වෙනුවෙන් හිත රිද්දගෙන අඬන්නෙ? තමුසෙ අඬනවකො. අඩුම තරමෙ මට නැතිවෙන්නෙ මාව රවට්ටපු මිනිහෙක්. තමුසෙට නැතිවෙන්නෙ එහෙම ගෑණියෙක් නෙවෙයිනෙ” කියලා සප්තමී අත් දෙකත් බැඳගෙන කිසි ගාණක් නැතුව තමයි කියලා දැම්මෙ.

“තමන් ලව් කරපු මිනිහා තමන්ව දාලා යනවා කියල දැනගත්තම ගෑණුන්ට ඇඬෙනවා ඕයි. තමුසෙට එහෙම ඇඬෙන්නෙ නැත්තෙ තමුසෙ කවදාවත් මට ආදරේ කරලා නැති හන්දා”

“මං ආදරේ කරාද නැද්ද කියන එකෙන් ඔහේට තියෙන ප්‍රයෝජනේ මොකද්ද කියනවා? ඔහේ දැන් හිතන්න ඕන මං ගැන නෙවෙයි ඔය බඳින්න යන මහ ලොකු ගෑණි ගැන නෙ. මං හිතන පතන ඒව ගැන දුක්වෙන්න යන්නෙ මොකටද?”

“එතකොට තමුසෙ දැන් හිතාගෙන ඉන්නෙ මං එහෙම ලේසියෙන් තමුසෙට මාව අතාරින්න ඉඩ දෙයි කියලද?”

“අනේ නෑ මං දන්නවා තමුන් මට එහෙම දේකට ඉඩ දෙන්නෙ නෑ කියලා. ආන් ඒකයි මම තමුන්ව අතාරින්න හිතුවෙ. එහෙම කරල මම නතරවෙන්නෙත් නෑ හැබැයි”

“එහෙනම්? එහෙනම් මොකක් කරන්නද තමුසෙගෙ ප්ලෑන් එක?”

“ප්ලෑන් එකද? ප්ලෑන් එක තමයි මම ෆේස්බුක් එකේ පෝස්ට් එකක් දානවා තමුසෙ නෙවෙයි මාව ඇතෑරියේ. මමයි තමුසෙව අතෑරියෙ. මොකද තමුසෙ ආස කෙල්ලන්ට නෙවෙයි කොල්ලන්ට කියලා” සප්තමී අත් දෙක බැඳගෙන ලොකු සීන් එකෙන් පෙම්වතා චරිතෙ කරපු නලුවාගෙ ඇරිච්ච කට දිහා බලන් ඉද්දි තමයි පිටිපස්සෙන් ඒ අත්පුඩි ගහනවා ඇහුණෙ.

“කට් කට් කට්” කියල කියන ගමන් වසන්ත කලුආරච්චිත් එක්කම ඔක්කොම උන්නෙ ඔලුව හරවලා ඒ කවුද කියලා බලන ගමන්!

LEAVE A REPLY

Please enter your comment!
Please enter your name here