ඔබේ සමස්ත සෞඛ්‍යයට වගේම ඔබේ සමටත් හොඳ ප්‍රතිලාභ ලබා ගන්නට පුළුවන් පානයක් ගැනයි අද අපි ඔබට කියන්නට සූදානම් වන්නේ. ඉතා පහසුවෙන්ම සොයාගන්නට පුළුවන් අමු ද්‍රව්‍ය කිහිපයක් එකතු කරලා දිනපතාම පානය කරන්න පුළුවන් මේ පානය ඉතා කෙටි වේලාවක් ඇතුළත ඔබට සකස් කරගන්නට පුළුවන්. ඒ තමයි Turmeric Pineapple Orange and Ginger wellness shot. මේ වන විට ලෝකය පුරා ජනප්‍රිය වෙමින් පවතින මේ අපූරු පානය ගැන ඔබට කියන්න අපි හිතුවෙ ඒ නිසයි.
මේ Wellness shot එකෙන් ලැබෙන ප්‍රතිලාභ මොනවද ?
කහ
ආයුර්වේද වෛද්‍ය විද්‍යාවේ ප්‍රතිඔක්සිකාරක ගුණ සඳහා වසර සිය ගණනක් තිස්සේ කහ කියන අපූරු අමුද්‍රව්‍ය භාවිතා කරනවා. කහ වල ඇති කර්කුමින් මොළයේ ක්‍රියාකාරීත්වය වැඩි දියුණු කිරීමට , හෘද රෝග , පිළිකා , වැනි නිදන් ගත රෝග වැළඳීමේ අවදානම බොහෝ දුරට අඩු කරනවා. ඒ වගේම ඔබේ සමේ අනවශ්‍ය තෙල් නිෂ්පාදනය පාලනය කර කුරුලෑ ඇතිවීම අවම කිරීම සහ සම පැහැපත් කිරීමටත් කහ දායක වනවා.
අන්නාසි
තන්තු වල ඉතා හොඳ ප්‍රභවයක් වන අන්නාසි ප්‍රතිඔක්සිකාරක බහුල ප්‍රභවයක්ද වනවා. මීට අමතරව ආහාර දිරවීමේ ක්‍රියාවලිය වැඩි දියුණු කිරීමද , තුවාල සුව වීම ප්‍රවර්ධනය කිරීමද ,ප්‍රතිශක්තිකරන පද්ධතිය වැඩිදියුණු කිරීමද ,ආතරයිටීස් රෝග ලක්ෂණ සමනය කිරීම කිරීමට උපකාරී වීමද ඇතුළු සෞඛ්‍යමය වාසි රැසක් අන්නාසි මගින් ලැබෙනවා.
දොඩම්
මෙම පානයට හොඳ රසයක් එකතු කිරීම වගේම ඔබේ ශරීරයට විටමින් සී ඉතා හොඳ ප්‍රමාණයක් ලබාදීම දොඩම් වලින් සිදුවනවා. ප්‍රතිශක්තිකරන පද්ධතිය වැඩි දියුණු කිරීමට වගේම සම පැහැපත් කිරීමටද , සමේ නිෂ්පාදනය වැඩි දියුණු කිරීමටද මේ විටමින් සී වලට හැකියාව තියෙනවා.මීට අමතරව ශරීරයට යකඩ අවශෝෂණය කර ගැනීමට ත් , නිදන් ගත රෝග වලින් ශරීරය ආරක්‍ෂා කිරීමටත් , පිළිකා අවදානම අඩු කිරීමටත් දොඩම් වල අඩංගු විටමින් සී උපකාරී වනවා.
ඉඟුරු
ආහාර දිරවීමේ ක්‍රියාවලිය වැඩිදියුණු කිරීමට ඉඟුරු වල ඇති සංයෝග වලට හැකියාව තිබෙන අතර කොලෙස්ටරෝල් සහ සීනි මට්ටම අඩු කිරීම , ඔක්කාරය අඩු කිරීම , මල බද්ධය සහ බඩ පිපීම වැනි තත්ත්වයන් අඩු කිරීම වැනි සෞඛ්‍යමය ප්‍රතිලාභ මෙම පානයට ඉඟුරු එකතු කිරීම මගින් ඔබට ලබා ගත හැකි වනවා.
මේ අපූරු Wellness shot එක සකස් කරන්නේ කොහොමද ?
අවශ්‍ය වෙන්නේ මේ දේවල්
නැවුම් කහ තේ හැඳි 1
නැවුම් අන්නාසි කැබලි කෝප්ප 1
දොඩම් ගෙඩි 1
නැවුම් ඉඟුරු කැබැල්ලක්
සකස් කරන්නෙ මෙහෙමයි
සියලුම අමුද්‍රව්‍ය ඉතා සිහින් වන තෙක් හොඳින් බ්ලෙන්ඩ් කර ගන්න. අවශ්‍ය නම් අවසානයට කළු ගම්බිරිස් ස්වල්පයක් එකතු කර ගන්න.
මිශ්‍රණය ඉතා ගණනක් වතුර ස්වල්පයක් එකතු කරන්න.
මෙය ශීතකරණයක් තුළ දින දෙකක් හෝ තුනක් දක්වා ගබඩා කර භාවිතා කල හැකියි.
භාවිතා කළ යුතු ආකාරය
ඉතා කුඩා ප්‍රමාණයක් දිනපතා උදෑසන පානය කරන්න.
ඔබට සෞඛ්‍යමය ප්‍රතිලාභ රැසක් ලබා දෙන මේ අපූරු Wellness shot එක ඔබේ සමස්ත සෞඛ්‍ය වැඩි දියුණු කිරීම කෙරෙහි ක්‍රියා කරනවා. නමුත් මෙය කිසිදු රෝග තත්ත්වයකට ප්‍රතිකාරයක් නොවන නිසා ඔබට කිසියම් සෞඛ්‍ය ගැටලුවක් තිබේ නම් වෛද්‍ය උපදෙස් මත මෙය භාවිතා කළ හැකියි.
