මෙච්චර අහංකාරකමක් …නිලංගා කළකිරීමෙන් සිතුවාය.
“කූඩුවක දාගෙන ඉන්න කුරුල්ලෙක්ට කොච්චර කන්න බොන්න දුන්නත් එයාලට ඕන නිදහස නැත්නම් එයාලාගෙ වැඩීම බාල වෙනවා…
මනුස්සයෙක්ගෙ වුණත් එච්චරයි …හිතේ සතුට නැත්නම් කන කෑමක් වත් ඇඟට හරියකට පෝෂණයක් දෙන්නෙ නෑ…”
නිලංගා හිතේ නැගී එන කෝපය මැඩගන්නට උත්සාහ දරමින් පැවසුවාය.ස්ටීව් නිහඬවම බලා උන්නේය.
“මිස්ටර් ස්ටීව් හිතන්නේ මේරි මැඩම් මෙහෙම එකතැනකට වෙලා ඔක්කොම සැප සම්පත් මැද තියන එකයි එයාට දෙන හොඳම දේ කියලා…ඒත් මම හිතන්නෙ වෙනස් විදියකට..හැම කෙනාටම තමන් ආස දේවල් තියනවා…මේරි මැඩම් අවුරුදු අසූපහක් වුණත් එයා ආස දේවල් ඇති ..එයාගෙන් අහන්නෙ නැතුව කන්න බොන්න දුන්නම එයාට ඒකට ආසාවක් නැතුවත් ඇති…”
“මෙමරි එකේ ගැටලු තිබ්බට එහෙම කෙනෙක්ගේ autonomy එක නොසලකා ඉන්න හොඳ නෑ…ඒ වගේම….”
තමා නොනවත්වා කතාකරගෙන යන බව නිලංගාට වැටහුණේ මඳක් පමා වීය.ඇය වහා සිය කතාව නවතා ගත්තාය.
“ඕකේ…ඕකේ…එහෙනම් එහෙම කරලා බලන්නකො…දැන් ඔය චිකන් මෂ් රූම් සුප් එකයි ගාලික් ටෝස්ට් එකයි හදන්නෙ කවුද?පෝලාද? හෙල්පර්ද ? ඔයාද?”
ස්ටීව් මැඩගත් සිනාවෙන් යුතුව විමසීය.
“ඒක ගැන කතාකරකර ඉන්නකොට තමයි බෙල් එක රිංග් වුණේ…මම දන්නෙ නෑ හදන්නෙ කවුද කියලා…වෙන කෙනෙක් නැත්නම් මම හදනවා…”
නිලංගා සටහන් පොතද රැගෙන කාමරයෙන් නික්ම ගියාය.ස්ටීව් සිය අත්ලෙන් මුව වසා ගත්තේ ආච්චී විමසුමෙන් ඔහු දෙස බලනු දැනීය.තමා සිනාවෙනු දුටුව හොත් ඇය ප්‍රශ්න ගොඩකට මුල පුරනු ඇත.කාලයකට පසු තමාගේ සිතටද කුමක් හෝ සැහැල්ලු බවක් ගෙන එන්නට ඇය සමත් ව ඇත.
“ඔයා හදනවා නම් මටත් සුප් එක්ක ගාලික් ටෝස්ට් ටිකක් රෙඩි කරන්න ගෙනියන්න…” යැයි නිකමට මෙන් කියන්නට සිතට ආවද එය අනවශ්‍ය කතාවක් බව යළිත් සිය ආඩම්බරකාර මනස ස්ටීව්ට මතක් කර දුන්නේය. පෝලා ගේ තේ එකක් විනා කෑමක් බීමක් ක්ලිෆර්ඩ් මැදුරෙන් ස්ටීව් ගත්තා නම් ඒ ආච්චී අනතුරට පත් වන්නට පෙර පමණි. ඉතින් මෙවන් කතාවක් නිකමට හෝ කීම පෝලාගේ විමසුමට ද තමා ලක්වන්නට හේතුවනු ඇත.
අනෙක් අතට නෙලී යනු ආච්චී බලාගන්නට ආ රැකබලාගන්නියක් පමණි.ඇය තමා ගේ අතලොස්සක් වූ මිතුරු කවයේ අයෙක් ද නොවේ. අඩුම තරමේ ඒ කවයේ මෙලා ද නැත. ඉතින් ආගන්තුක තරුණියක හා අනවශ්‍ය තරමේ කතාබහ අවශ්‍යද නැත. ඇය ආ රාජකාරිය නිසියාකාරව ඉටු කරනවා නම් ඒ ප්‍රමාණවත්ය.
ස්ටීව් , ක්ලිෆර්ඩ් මන්දිරයෙන් බැහැර ව යනතුරු යළිත් නිලංගාහට හමු නොවීය.ඇය වරක් මේරිගේ කාමරයට යන විට ඇය කෙටි නින්දකට වැටී තිබුණි. කාමර උෂ්ණත්වය නිසියාකාරව සකසා නිලංගා යළි කාමරයෙන් පිටතට එන විට ස්ටීව් ආලින්දයේ දුරකතන ඇමතුමක සිටිනු දුටුවාය.යළිත් සවස් වී විනා මේරි වෙත යාමේ අවශ්‍යතාවයක් නොමැති හෙයින් නිලංගා පෝලා සමගින් මුලුතැන් ගෙයෙහි රැඳුණාය.
ක්ලිෆර්ඩ් මන්දිරයේ මුලුතැන්ගෙය ඉතා විශාල එකකි. නිවැසියන්හට මෙන්ම සේවක මණ්ඩලයටද කෑම සැකසෙන්නේ එහිය.පෝලා සහ සහායක සේවිකාවක විසින් නිවැසියහට කෑම සකසන අතරේ සෙසු සේවකයන් වෙනුවෙන් ආහාර සපයන්නට වෙනත් සූපවේදියෙක් උන්නේය.ක්ලිෆර්ඩ් මන්දිරයේ රියැදුරන්, ගෘහ සේවිකාවන් ,පිරිසිදු කරන්නියක් සහ උද්‍යාන සේවකයන් දෙදෙනෙකු විය.පෝලා හැරුණ විට අනෙක් සේවකයන්ගෙන් නේවාසිකව ඉන්නා අයට වෙනම නිවස්නයක් ක්ලිෆර්ඩ් මන්දිරයට තරමක් දුරින් තිබිණ.සිටුවරයකුට සමාන ධනස්කන්ධයක් හිමි මේ පවුලේ ව්‍යාපාර ජාලය එක්සත් රාජධානිය පුරා පැතිර තිබුණි.
“පෝලා කැමති නම් මම මේරි මැඩම් ගෙ සුප් එකයි ටෝස්ට් එකයි හදන්නම්”
නිලංගා ඇසුවේ මඳක් කල්පනාකොටය. තමා මෙහි පැමිණි ගමන් අනෙක් අයගේ වැඩකටයුතුු අතරට යෑම එතරම් සුභදායක නොවන බව ඇය දැනඋන්නාය.සමහරක් විට තමා කෙතරම් සද්භාවයකින් යුතුව කටයුතු කළද ඔවුන් එය වැරදියට වටහා ගන්නට ඉඩ ඇත.අනෙක් අතට පෝලා යනු මෙම නිවසේ පැරණිම සේවිකාවක් වන අතර ඇයට තරමක ආධිපත්‍යයක්ද මෙම නිවස තුළ තිබේ.ඇය තමා වරදවා වටහා ගතහොත් එය තමාට අවාසියක් වන බව නිලංගා දැනඋන්නාය.
” අනේ හොඳයි නෙලී..ඒත් ඔයාගෙන් අහන්නමයි හැදුවේ ඔයාට පුළුවන්ද කියලා..මට මේරි මැඩම්ගේ කෑම හදන එක නම් මහා ෆෙඩප් වැඩක්..කොච්චර හැදුවත් ඉතින් කවදාවත් හොඳක් අහන්න නෑ නේ.ඔය ඉන්ජරි එකට කලින් නම් එයා ඔහොම නැහැ.වැටුනයින් පස්සේ මෙන්ටලිත් අවුල් ගියා.”
“ඔයා ටික ටික එයාට approach කරන එක හොඳයි.එයා විතරක් නෙමෙයිනේ එයාගේ මුනුපුරත් හැම එකටම ඇඟිලි ගහනවනේ.ඉවසීමෙන් වැඩ කරන්න නෙළී…ඒ දෙන්නා මොනවා කිව්වත් ඔයා ගණන් ගන්න එපා..අද මොනවාද මිස්ටර් ස්ටීව් ඇහුවේ….”
පෝලා මේ වන විටත් නිලංගාට බෙහෙවින් සමීපව උන්නාය.වයසින් අවුරුදු විස්සකත් පමණ පරතරයක් දැරුවද ඇය නිලංගා වටහා ගනිමින් උන්නාය.
“මම මේරි මැඩම් එක මීල් ප්ලෑන් එකක් හද හද හිටියේ…ඒ අතරේ තමයි මම ආවේ පෝලාගෙන් අහන්න අද රෑ මීල් එක කොහොමද කියල.. මට අමතක වෙලා ඒ නෝට් බුක් එක එතන දාලා ඇවිල්ලා. මිස්ටර් ස්ටීව් ඒක දැකල..ඒ ගැන ඇහුවා..”
නිලංගා පිළිතුරු දුන්නාය.
“මීල් ප්ලෑන් කීවේ….?”පෝලා සමගින් ඒ කතාව කියන්නට ඉඩක් නොලැබුණ බව නිලංගාට මතක් වූයේ ඒ ප්‍රශ්නයද සමගිනි.
“හා මට කියන්න බැරි වුණානේ.. මම පොඩි ඩිස්කෂන් එකක් ස්ටාට් කරා මේරි මැඩම් එක්ක.. එයාගේ කෑම ගැන…ගොඩාක් කියෙව්වා. කියවලා කියවලා ඉවර වෙලා..අද රෑට සුප් එකයි ටෝස්ට් එකයිි ඉල්ලුවා…කාවිද කියන්න නම් බැහැ….නමුත් අපි පොඩ්ඩක් ට්‍රයි කරමුද එයා කැමති දේ අහලා දෙන්න…මට හිතෙනවා පෝලා එයා පොඩ්ඩක් එයාට කැමති දේම අපි කරනවා නම් හෙමිහිට අපේ පැත්තට නම්මගන්න ප්‍රෝග්‍රෑම් එකකට ගන්න පුළුවන් කියල…”
නිලංගා පැවසුවේ කල්පනාකාරීව ය.
“ඒක හොඳ අදහසක් නෙලී…මොකද එයාගේ කලින් ආව කෙයාරර්ස් ලා පවරපු වැඩේ ඕනවට එපාවට කලා…ඉන්පස්සෙ යන්න ගියා…බෑ කිව්වොත් බලෙන් කිසි එකක් කරන්න බෑනේ මෙහෙ ලෙඩෙකුට.. ඔයා බලන්න…මම දන්නෙ නෑ ඕක සක්සස් වෙයිද නැද්ද නම්…බලමුනේ…”
“ආ …ඉතින් අර අති පණ්ඩිත මුනුපුරා කිව්වේ නැද්ද ඕව වැඩක් නෑ..ආච්චිට හොඳට කන්න දෙනවා නම්.. එයාගෙන් අහන්න ඕන නෑ කියලා..”
පෝලා සිනාසී ඇසුවාය. නිලංගා ඒ සිනාවට එකතු වෙමින් පිළිතුරු දුන්නාය.
“ඔයා කිව්ව එකම තමා වුණේ.මිස්ටර් ස්ටීව්ට දෙයක් පැහැදිලි කරලා තේරුම් කරන්න අමාරුයි.එයා ඇහුම්කන් දෙන්නේ නැහැ…ඒකට කමක් නැහැ.. මම ට්‍රයි කරන්නම්.සිල්වියා මැඩම්ටත් කියලා..මං හිතුවා මේක කොහොමහරි කරනවාා කියලා..”
නිලංගා සිය අදිටන අත්නොහැරියාය.පෝලාගේ අවසරය ද ඇතිව මේරිගේ රාත්‍රී ආහාරය සකසන්නට ඇය සූදානම් වූවාය.
ලී බන්දේසියක තැබූ සමර පැහැති අතුරණුව මත ලා කහ පැහැ සුප් බඳුණද ,ලා කහ පැහැ දිගු පිඟානක ගාලික් ටෝස්ට් පෙති කිහිපයද තබා අත් පිස්නාවන් නවා කෙළවරක තැබූ නිලංගා පෝලා වෙත එය පෑවේ අනුමැතිය ලබන්නටය.පෝලා දෑස් විශ්මයෙන් මහත් කොට ගත්තාය.
“වාව් නෙළි..ඒ ප්‍රසන්ටේශන් එක හරිම ලස්සනයි…මටත් බඩගින්නක් ආවා ඒක දැක්කම…”
පෝලා පැසසුම නිර්ලෝභීව කළාය.නිලංගා හිතේ සතුට නිරහංකාර සිනාවක දැවටුවාය.
“මොකක්ද පෝලා ප්‍රසන්ටේෂන් එකක් ගැන කීවේ…”
නිලංගා කෑම කාමරයෙන් නික්මෙන්නට සූදානම් වන මොහොතේම සිල්වියා ක්ලිෆර්ඩ් කෑම කාමරය වෙත පැමිණියාය.
“නෑ මැඩම් මං මේ කිව්වේ නෙලීගේ ෆුඩ් ප්‍රසන්ටේෂන් එක ගැන…” පෝලා නිලංගාගේ අත වූ බන්දේසිය දෙසට අත දිගුකොට සිල්වියාගේ අවධානය යොමු කළාය.
“ෂා මේ මොකද අද වෙනසක්…මේ අම්මගෙ ඩිනර් එකද? අහ්….ඒකෙ සුවඳ…මටත් ඒකෙන්ම කන්න හිතුණා අද නම්…”
සිල්වියා නිලංගා අතවූ බන්දෙසිය වෙත සමීප වූවාය.
“නෙළී අලුත් වැඩක් කරන්නනෙ යන්නේ මැඩම්…නෙලී ඔයාම කියන්නකො මැඩම් එක්ක..”
පෝලා සිනාසී පැවසුවාය.
“නෑ මැඩම් මේකයි…මම මේරි මැඩම් එක්ක පොඩ්ඩක් කතා කලා ශේප් එකේ..එයා කෑම එච්චර ගන්න කැමති නැති නිසාත්..නිතරම කෑම විසි කරන නිසාත්..මට හිතුණා එයාගේ චොයිසස් මොනවද කියලා චුට්ටක් කතා කරල බලන්නන.ඒ වෙලාවේ මේරි මැඩම් කිව්වා අද රෑට මෙන්න මේවා තිබුනොත් එයා කනවා කියලා..”
“මං දන්නවා ඔය කිව්වට සමහරවිට මේකත් විසි කරාවි.. හැබැයි මේරි මැඩම්ගෙ කැමැත්තට මුල් තැන දීලා හදපු එක නිසා සමහර වෙලාවට පිළිගන්නත් ඉඩ තියෙනවා..මම පොඩි ට්‍රයල් එකක් විදියට මේක උත්සාහ කරන්නම්..”
සිල්වියා ක්ලිෆර්ඩ් මෙම තරුණියගේ උත්සාහයේ සාර්ථකත්වය ගැන අබමල් රේණුවක විශ්වාසයක් තබාගන්නට නොහැකි වුවද එම කැපවීම අගය කළාය.අම්මා ගේ හැසිරීම එක්සත් රාජධානියේ කාලගුණයට හා සමානය.මේ මොහොතේ සිටින ආකාරය තව මොහොතකින් සපුරා වෙනස් වෙයි.එහෙත් ඇය වෙනුවෙන් මේ තරුණිය දරනා වෙහෙස ගැන සිල්වියා පැහැදුනාය.
“අම්මගේ හැටි ඔයා දන්නවනෙ නෙලී….ඒත් ඔයා ඔය කරන්න හදන දේට මම කැමතියි….අපි උත්සාහ කරන්නේ නැතුව ඒක හරියයිද වරදීද කියන්න දන්නේ නැහැනේ..ගුඩ්ලක්…ඔයා වැඩේ කරන්න..පෝලා ඒ සුප් එහෙම තව ඉතුරු වෙලා තියෙනවද?මටත් ඒක බීලා බලන්න හිතුනා..”
නිලංගා බන්දේසියද රැගෙන මේරි මර්ෆි ඉන්නා කාමරය වෙත පියමනිනා අතර සිල්වියා පෝලා වෙතින් විමසුවාය.
