” ෂෙහාරා ඩිවෝස් එකට කැමති උනා “
දේවක එම පුවත ගෙන ආවේ අශිකා වෙතය. වන්දි සහ නඩත්තු අවශ්‍ය පොරොන්දුව මත ෂෙහාරා දික්කසාදය ලබා දීමට එකඟ වූයේ රවින්ද්‍ර සහ ශීලා ගේ විරෝධය ද නොතකාය.
” වැරැද්ද මගේ කියලා මං දන්නවා අංකල්. මට ඒ වැරැද්ද ආපහු හදන්න බැහැ. ලෝකෙට පේන්න වත් එකට ඉන්න එකේ තේරුමක් නෑ කියලා මං දන්නවා. ඉස්සරහට මොනවා උනත් මේ නඩුව තව ඇදගෙන යන්න මටත් ඕනේ නැහැ ”
ෂෙහාරා කීවේ සිතේ තිබූ පසුතැවිල්ල සඟවා ගැනීමට වෑයම් කරන අතරේය. ඇගේ මේ තීරණය රවින්ද්‍ර සහ ශීලා අසා සිටියේ පුදුමයෙනි.මෙවැන්නක් මේ තරම් ඉක්මනින් ෂෙහාරා ගෙන් කිසිසේත්ම බලාපොරොත්තු නොවූ නිසා ඔවුන් දෙදෙනාම සිටියේ ෂෙහාරා ගේ හැසිරීම අදහා ගත නොහැකි තත්ත්වයකය.
” හැබැයි ඉතින් මම මොකක් හරි විදිහකට සෙට්ල් වෙනකන් මට වන්දියකුයි නඩත්තුවකුයි ඕනේ ”
ෂෙහාරා තවදුරටත් කීවාය. රැකියාවක් කර හෝ පලපුරුද්දක් නොමැති නිසා ජීවිතය කෙසේ හෝ විසඳෙන තුරු තමාට අවැසි ආකාරයට ජීවිතය තව දුරටත් ගෙවන්නට ෂෙහාරා තීරණය කර තිබුණාය. ඒ සඳහා දෙමව්පියන් ගෙන් පෙර තිබූ සහය ඒ ආකාරයෙන්ම නොලැබෙන බව දන්නා නිසා අවස්ථාව ලද ඇසිල්ලේ ආදිත්‍යය ගෙන් වන්දි සහ නඩත්තු ලබා ගැනීම ෂෙහාරා ගේ සැලසුම විය.
” වන්දියක් නම් ලැබෙයිද කියලා මම දන්නෙ නෑ ෂෙහාරා. මොකද මෙතන ආදිත්‍ය ගේ වැරැද්දක් නැහැනේ. හැබැයි එයා ඔයාට අනිවාර්යයෙන්ම නඩත්තුවක් දෙනවා කියලා මම දන්නවා. මොකද ආදිත්‍ය කියන්නේ තමන්ට මොන වැරැද්ද කරත් සමාව දෙන ළමයෙක් මිසක් පළිගන්න ළමයෙක් නෙමෙයි.එයා අභිමන් ටත් වඩා අහිංසකයි ”
මුදල් මත ඕනෑම දෙයක් කිරීමට සූදානම් වූ ෂෙහාරා දික්කසාදයට එකඟ වී තිබුණේ ඒ ආකාරයටය. කෙසේ වුවත් ෂෙහාරා දික්කසාදයට එකඟ වීමම අශිකා ගේ සිතට ගෙන ආවේ සැනසීමකි.
” දෙයියනේ මගේ දරුවට දැන් වත් සැනසීමක් තියෙයි ”
අශිකා සැනසුම් සුසුම් හෙලන ආකාරය දේවක බලා උන්නේය. තමා ගෙන් කිසිදු සැනසීමක් නො ලද බිරිඳ දරුවන් තුළින් ඒ සැනසීම සොයන ආකාරය දුටු විට දේවකට අශිකා පිළිබඳව ඇති වූයේ අනුකම්පාවකි. යෝජනාවක් මගින් කෙරුණු විවාහයෙන් පසුව අශිකා ගේත් තමා ගේත් නොගැලපුණු අදහස් ගලපා ගන්නට අශිකා බොහෝ වෑයම් කළද තමා කලේ ඒ සෑම මොහොතක දීම අශිකා ගෙන් දුරස් වී සිටීමය. ඒ මගින් ඇය කොතරම් මානසිකව කඩා වැටුණාද කියා තමා තම දෑස් වලින්ම දුටුවද නිවස හැර ගොස් තනිව ජීවත් වීම සහ පැන නැගුණු ගැටලු මගහැර යාම හැරුණු කොට වෙනත් විකල්පයක් කරා නොයාම පිළිබඳව දේවකට දැනුනේ තරමක පසුතැවිල්ලකි.
” ඔයා මේ ප්‍රශ්නේ මේ විදිහට විසඳුවාට පින් සිද්ධ වෙනවා දේවක.මං හිටියේ මගේ දරුවා විඳවනවා බලා ගෙන ඉන්න බැරුව ”
” ඒ ඔයාගේ වගේම මගෙත් පළවෙනි දරුවා අශිකා ”
දේවක කීවේ සංවේගයෙනි. පවුල තුළ පැන නැගුණු ගැටලු මීට වඩා හොඳ ආකාරයකින් විසඳ ගන්නට තිබුණා දැයි දේවකට ඒ මොහොතේ දීත් සිතුනි.එහෙත් තමා එයට පෙළඹුණේ නොමැති කාරණාව සිතා ගත නොහැකිය. අවසානයේ දී එයින් සිදු වී ඇත්තේ සියලු දෙනාගේම හදවත් බිඳී යාම පමණි.
” කසාදයක් කර ගන්න එක තරං ලේසි නෑ දේවක ඒක පවත්ව ගෙන යන එක. ඊටත් වඩා අමාරුයි එකට ඉන්න බැරි උනාම දෙන්නෙක් දෙපැත්තකට වෙන එක. ආදිත්‍යයට ඒක කොච්චර අමාරු වුනත් එයා ඒක දරා ගනියි කියලා මම හිතනවා ”
අශිකා මේ නොකියා කියන්නේ දෙපසකට වී ජීවත් වීම කටුක බවය.යම් අවස්ථා වලදී තමාටද එය නොදැනුනා නොවේ. ගැලපීම් ගලපා ගන්නට උත්සාහ කරමින් ජීවත් වනවාට වඩා දෙපසකට වීම හොඳ බව තමාට සිතුනේ කොයි මොහොතේදී දැයි දේවක කල්පනා කළේය. අශිකා තරම් ධෛර්යය කින් ජීවිතයට මුහුණ දී පවුල තුළ නැගුණු ගැටලු විසඳා ගත්තා නම් අද මේ වහල යට සතුටින් පිරුණු පවුලක් වාසය කරනු ඇත. එහෙත් එය එසේ නොවූයේ තමා ගේ ඉක්මන් තීරණ නිසාය.
” අපි දෙන්නගේ ප්‍රශ්නත් අපිට තිබුණා අශිකා මීට වැඩිය හොඳ විදිහකට විසඳ ගන්න ”
දේවක මිමිනුවේය.ඔහු ගෙන් මෙවැනි කතාවක් පිටවේ යැයි අශිකා සිතුවේම නැත. ඒ නිසා ඇය දේවක දෙස බැලුවේ පුදුමයෙනි.
” දෙන්නෙක් කසාදයක් බඳින්නෙ කවද හරි දවසක වෙන් වෙන්න හිතා ගෙන නෙමෙයිනේ අශිකා. මැරෙනකල් එකට ඉන්න බලා ගෙන. මෙහෙම ජීවත් වෙන එක අපා දුකක් කියල ඔයාටත් ඕන තරම් හිතිලා ඇති. මේ හැමදේටම මුල මම කියලා මම දන්නවා. මොකද ඔයා වුනත් එක තැනකින් ගැලවිලා මගේ ළඟ නතර වුණේ කවදාවත් මේ විදිහකට දෙපැත්තට වෙලා ජීවත් වෙන්න නෙමෙයිනේ ”
දේවක මේ පය තබන්නට සූදානම් වන්නේ අතීතයටය. එය කෙතරම් කටුක වුවද වෙනස් කළ නොහැකි සත්‍ය එයය. තමා ඉතා සතුටින් දිවි ගෙවූ තැනකින් මිදී නතර වූයේ ආගන්තුකයෙකු ළඟය. ඒ ජීවිත කාලය පුරාම ජීවත් වන්නට දහසකුත් බලාපොරොත්තු තබා ගෙනය. එහෙත් සිදු වූයේ අනෙකකි.
” මගේ තාත්ත ගේ කීමට මේ කසාදෙටයි ඔයාටයි කැමති වුණේ ඇයි කියලා ඔයා නොදන්නවා නෙමෙයිනෙ දේවක. එහෙම වෙලා ඔයා වෙනස් වෙද්දිත් මං දරා ගෙන බලා ගෙන හිටියේ වෙන කරන්න දෙයක් නැති කමට. මගේ දරුවෝ දෙන්නා වෙනුවෙන් මං ජීවත් වෙන්න ඕන නිසා.මං ආදරය කළේ වෙන මනුස්සයෙකුට උනාට ඔයාව කසාද බැන්දට පස්සේ මං ජීවත් උනේ ඔයා වෙනුවෙන්මයි කියලා ඔයා දන්නවා ”
තමා අසාධාරණ ලෙස සැලකූයේ එවන් ගැහැණියකටය. ජීවිතයේ කුමන සැප සම්පත තිබුණත් තමාට හිතේ සැනසීම අදටත් හිමිව නැත්තේ ඒ නිසා විය හැකිය. සිදු වූ වැරදි කොහෙන් කොහොම නිවැරදි කර ගන්නට දැයි සිතමින් දේවක පසු වූයේ දෙගිඩියාවෙනි.
” මං එහෙම හැසිරුනේ ඇයි කියන්න මම දන්නෙ නෑ අශිකා. ඒත් මට තේරෙනවා ඒ හැමදේම වැරදියි කියලා.ඒවායින් විඳෙව්වේ ඔයා විතරක් නෙමෙයි. මගේ දරුවෝ දෙන්නත් විදෙව්වා ”
මේ එක්තරා ආකාරයක පාපොච්චාරණයකි. ඒ පාපොච්චාරණයට කළ වැරදි සම්පූර්ණයෙන්ම නිවැරදි කළ නොහැක. එහෙත් අඩුම තරමේ තමා අතින් වරදක් සිදු වූ බව පිළිගැනීම වත් එක අතකට හොඳ දෙයකි.
” ආදිත්‍යයට මේ වෙච්ච දේත් එක්ක මං හුඟක් දේවල් තේරුම් ගත්ත අශිකා. නොකිව්වට මම දන්නවා ආදිත්‍යය මේ ප්‍රශ්නය නිසා කොච්චර විඳවනවද කියල. කසාදයක් කැඩෙන එක ඒ තරම් විඳවන්න දෙයක් කියලා මං දැක්කේ මගේ දරුවා ගෙන්. ඒ වගේම මං ඔයා ගෙන් ඈත් වෙනකොට ඔයත් විඳවන්න ඇති කියලා මට දැන් තේරෙනවා අශිකා ”
අශිකා දෑස් වලට නැගුණු කඳුළු පිස දැම්මාය. මෙවැනි කතාබහක් තමා හා දේවක අතර සිදුවේ යැයි අශිකා බලාපොරොත්තු වී සිටියේම නැත. විවාහ වූ කාලයේ පටන් ඇති වූ ගැටලු වලදී සහ බහින්බස්වීම් වලදී දේවකට ජයග්‍රහණය ලබා ගන්නට හැර තමා පසෙකට වී කඳුළු සැලුවා මිසක කිසි දිනකවත් මේ ආකාරයෙන් මුහුණට මුහුණලා වාඩි වී තමා සහ දේවක ගැටලු සාකච්ඡා කර තිබුණේ නැත.
” මේ කතාව අපිට කරන්න තිබුනේ මීට අවුරුදු ගානකට කලින් දේවක. එහෙනම් හුඟක් දේවල් වෙනස් වෙන්න තිබුණා ”
අශිකා කඳුළු අතරින් මිමිනුවාය. අතීතයේ ලෙසම ඇය තවමත් තමාට ජයග්‍රහණය ලබා ගන්නට හැර ඉවසා බලා හිඳින්නීය.
” මාව විශ්වාස කරලා මාව කසාද බැඳපු ඔයාට මං කළේ ලොකු අසාධාරණයක් අශිකා. මං ඒක දන්නවා. ඒත් ඒ වැරැද්ද කොහෙන් කොහොම හදා ගන්නද කියලා තමයි මට තේරෙන්නේ නැත්තේ. වෙලාවකට ආපහු මේ ගෙදරට ඇවිල්ලා හැමදේම විසඳ ගෙන ජීවත් වෙන්න හිතෙනවා. වෙලාවකට සදහටම දෙපැත්තට වෙලා ඔයාට ඔයාගේ ජීවිතේ හදා ගන්න ඉඩ දෙන්න හිතෙනවා. ඒත් එහෙම වුණොත් මගේ දරුවෝ දෙන්නා කවදාවත් මට සමාව දෙන එකක් නෑ අශිකා ”
” ඔයාට මගෙන් ඩිවෝස් වෙන්න ඕනෙද දේවක ? ”
