රයිඩ් රයිස් කියන්නෙ අද වෙද්දි ලංකාවේ හරීම ජනප්‍රිය කෑමක්නෙ.
රෑ කෑමක් විදිහට වගේම දවල් කෑමක් විදිහටත් බඩගිනි එන ඕනැම වෙලාවක තියෙන තියෙන දේවල් ටිකක් එකතු කරල ඉක්මණින් හදාගන්න පුළුවන් ෆ්‍රයිඩ් රයිස් හදන්න අනිවාර්යයෙන් එකතු කරන්න ඕනෑ කියලවත් මෙන්න මේමයි කියලවත් සම්මත විදිහක් නැති නිසා චිකන් ෆ්‍රයිඩ් රයිස්, එග් ෆ්‍රයිඩ් රයිස්, වෙජිටබල් වගේම සී ෆුට් ෆ්‍රයිඩ් රයිස් වගේ විවිධ ක්‍රම වලින් අද වෙද්දි ෆ්‍රයිඩ් රයිස් පිළියෙල කරගන්න අපි බොහෝදෙනෙක් පෙළඹිලා තියෙනව.
ඉතිං ඔන්න අද smart lady අපි ඔබ එක්ක බෙදාගන්න සූදානම් වෙන්නෙ හැමදාම කාල පුරුදු චිකන් ෆ්‍රයිඩ් රයිස් එක වෙනුවට හදාගන්න පුළුවන් පැණි රස මුසු කරපු කුකුළු මස් සහ සුදුළූණු හැපෙන රසම රස ෆ්‍රයිඩ් රයිස් එකක් හදාගන්න විදිහයි.
එහෙනම් අවශ්‍ය කළමණා ටික මුලින්ම ලෑස්ති කරන් ඉමු.
අවශ්‍ය ද්‍රව්‍ය
කටු ඉවත් කරගෙන කුඩා කොටු හැඩයට කපාගත් කුකුළු මස් වල පපුව කොටසින් භාගයක්
කැට හැඩයට කපාගත් ඔබ කැමති එළවළු වර්ග කීපයකින් කෝප්ප 01 ක් (කැරට්, බෝංචි, අල, ග්‍රීන්පීස්)
පිසගත් බත් කෝප්ප 02 ක් (බාස්මතී සහලෙන් පිසගත් බත් නම් වඩා හොඳයි)
කුඩා කොටු හැඩයට කපාගත් සුදුළූණු බික් 05 ක් 06 ක් (ඔබ කැමති ප්‍රමාණයට අඩු වැඩි කරගන්න පුළුවන්)
කුඩා කොටු හැඩයට කපාගත් ලොකු ලූණු ගෙඩි භාගයක්
පැණි මේස හැඳි 01 ක් හෝ 02 ක්
බිත්තර 03 ක්
සෝයා සෝස් මේස හැඳි 02 ක්
තෙල් (තල තෙල් නම් වඩා හොඳයි)
ගම්මිරිස් කුඩු
ලුණු කුඩු
කපාගත් ලූණු හෝ ලීක්ස් කොළ 04 ක් 05 ක්
තලතෙල් / බටර් / මාජරින් මේස හැඳි 01 ක්
සාදාගන්නා ආකාරය
මුලින්ම, කුකුළු මස් කැබලි ටික භාජනයකට දමා එයට ලුණු සහ ගම්මිරිස් කුඩු ස්වල්පයක් එකතු කර හොඳින් කලවම් කරගන්න.
දැන් ෆ්‍රයිඩ් රයිස් සෑදීමට යොදා ගන්නා වෝක් එක හෝ පෑන් එක මඳගින්නෙ ලිප තබා භාජනය රත්වෙන විට තෙල් මේස හැඳි 02 ක් එකතු කර තෙල් රත්වෙන විට ලුණු ගම්මිරිස් එකතු කරගත් චිකන් කැබලි ටික තෙලට දමාගෙන තත්පර 05 ක් පමණ තබා හොඳින් තෙල් වල දැවටෙන සේ කලවම් කරගන්න.
විටින් විටේ පැත්තෙන් පැත්ත පෙරළමින් චිකන් ටිකේ පාට වෙනස් වී රන්වන් පාටට බැදීගෙන එනවිට කොටු කපාගත් ලූණු සුදුළූණු ටික එකතු කර නැවත කලවම් කරගන්න.
ලූණු ටික මැලවී ගෙන විට කුකුළු මස් ලූණු මිශ්‍රණය භාජනයේ පැත්තකට කර අනෙක් පැත්තට නැවත තෙල් ස්වල්පයක් එකතු කර තෙල් ටික රත්වීගෙන එන විට කඩාගත් බිත්තර තුන තෙලට එකතු කරගන්න.
තත්පර 03 ක් පමණ තබා බිත්තර ටික සෙමින් හැඳිගාමින් කුඩා කැබලි වලට වෙන්කරගෙන (ස්ක්‍රැම්බල් කරගෙන) පැත්තකට කරගත් කුකුළු මස් ටිකත් සමඟ හොඳින් කලවම් කරගන්න.
දැන්, අපි කොටු කපාගත් එළවළු ටික එයට එකතු කර විටින් විට හැඳිගාමින් එළවළු ටිකත් පිසගන්න.
ඉන්පසු පිසගත් බත් ටිකත් එකතු කර එළවළු සහ කුකුළු මස් මිශ්‍රණය සමඟ නැවත හොඳින් කලවම් කරගන්න.
දැන් මෙයට සෝයා සෝස්, පැණි සහ තලතෙල්/ මාජරින් හෝ බටර් එකතු කර කලවම් කරගන්න.
විනාඩි 04 ක් 05 ක් පමණ තබා ලීක්ස් හෝ ලූණු කොළ එක්කර නැවත කලවම් කරමින් විනාඩි 04 හෝ 05 ක් පමණ තබාගන්න. (ලීක්ස් හෝ ලූණු කොළ වල පාට මැලවී යන තුරු තබන්න එපා)
දැන් ලිප නිවා රසම රස ගාලික් චිකන් හනී ෆ්‍රයිස් රයිස් එකක් උණු උණුවෙම රස බලන්න ඔන්න ඔබට පුළුවන්.
එහෙනම් මේ විදිහට හදල බලල අපි එක්කත් රස බෙදාගන්න අමතක කරන්න එපා.
