ඇඳුමට ගැළපෙන ලිප්ස්ටික් එක හරියටම තෝරගන්නේ කොහොමද?

සමහර වෙලාවට ඔයා ලස්සනට ඇඳලා, මේකප් කරල හිටියත් මොකක් හරි අඩුවක් වගේ දැනෙනවා නේද? 

ඇත්තටම ඒ වැරැද්ද තියෙන්නේ ඔයා ඇඳපු ඇඳුමේ නෙවෙයි.

වැරැද්ද තියෙන්නේ ඔයා ගාපු ලිප්ස්ටික් එකේ.

ගොඩක් අය කරන ලොකුම වැරැද්දක් තමයි හැම ඇඳුමකටම එකම ලිප්ස්ටික් පාටක් පාවිච්චි කරන්න හදන එක. මතක තියාගන්න, හරියටම ගැළපෙන ලිප්ස්ටික් එකක් කියන්නේ ඇඳුමේ පාටට සෙට් වෙන එක විතරක් නෙවෙයි. ඒකෙන් ඔයාගේ මුළු පෙනුමම ඔප්නංවලා, අමුතුම ලස්සනක් දෙන්න ඕනේ.

ඇත්තටම ස්ටයිල් කරනවා කියන එක ඇඳුමෙන් විතරක් ඉවර වෙන්නේ නැහැ.

ඒක සම්පූර්ණ වෙන්නේ ඔයාගේ තොල් වල තියෙන පාටෙන්.

ලිප්ස්ටික් කියන්නේ ඇත්තටම “ෆිනිෂින් ටච්” එකක් ද?

මේකප් කරනකොට ලිප්ස්ටික් කියන්නේ හරිම සරල, හැබැයි මුළු පෙනුමම වෙනස් කරන්න පුළුවන් ප්‍රබලම පියවරක්. පොඩි උත්සාහයකින් ලිප්ස්ටික් එකකට පුළුවන් මෙන්න මේ දේවල් කරන්න.

• ඔයාගේ මූණට හොඳ දීප්තිමත් පෙනුමක් දෙන්න.
• හරිම සාමාන්‍ය ඇඳුමකට වුණත් ලොකු වටිනාකමක් දෙන්න.
• සාමාන්‍ය පෙනුමක් ක්ෂණිකවම පිළිවෙළට තියෙන පෙනුමකට හරවන්න.
• මොහොතින් ඔයාගේ ආත්මවිශ්වාසය වැඩි කරන්න.

ඒක මැට් වුණත්, ක්‍රීම් වුණත්, එහෙමත් නැත්නම් ශියර් වුණත් ඔයාගේ මුළු පෙනුම තීරණය කරන්නේ ඔයා ගාන ලිප්ස්ටික් එක. ලිප්ස්ටික් ගාන්නේ නැතුව ඉන්න එක හරියට වාක්‍යයක් භාගෙට නතර කරනවා වගේ වැඩක්. එතකොට ඔයා කොච්චර මහන්සිවෙලා, කොච්චර වෙලා අරගෙන දාපු මේකප් එකකට උනත් නියම ෆිනිෂින් එකක් හම්බෙන්නෙ නෑ.

ලිප්ස්ටික් වල “ෆිනිෂ්” එක තෝරගන්නේ කොහොමද?

සමහර ලිප්ස්ටික් තොල් වල ගෑවාම දිලිසෙනවා, සමහර ඒවා වේලිච්ච පෙනුමක් දෙනවා. මේ එක එක වර්ගයෙන් ඔයාගේ මූණට ලැබෙන පෙනුම වෙනස්.

මැට් ලිප්ස්ටික්  – මේවායේ කිසිම දිලිසීමක් නැහැ. පාට හරිම තදට පේනවා. ඔයාට හරිම ප්‍රබල, ආත්මවිශ්වාසයෙන් පිරුණු පෙනුමක් ගන්න ඕනේ නම් මැට් ලිප්ස්ටික් තමයි හොඳම. විශේෂ උත්සවයකට යනකොට හෝ ඔයාගේ මේකප් එක ටිකක් කැපී පේන්න ඕනේ වෙලාවට මේක නියමයි.

ක්‍රීම් ලිප්ස්ටික්  – මේවා මැට් ලිප්ස්ටික් සහ ග්ලොස් අතර මැද තියෙන වර්ගයක්. මේකෙන් තොල් වලට මෘදු, තෙතමනය තියෙන පෙනුමක් ලැබෙනවා. ඔයාට ඕනෑවට වඩා තදටත් නැති, ඒත් පිළිවෙළට තියෙන පෙනුමක් ගන්න ඕනේ නම් හැමදාම පාවිච්චි කරන්න මේක හරිම පහසුයි.

ශියර් ලිප්ස්ටික් – මේකෙන් ලැබෙන්නේ හරිම ලා පාටක්. ඔයාගේ තොල් වල ස්වාභාවික පාටත් එක්ක මේක ලස්සනට පේනවා. මේකප් වැඩිය පේන්න නැතිව හරිම “නැචුරල්” විදිහට ඉන්න ඕනේ දවස් වලට සහ දවල් කාලයේ ගමන් බිමන් වලට මේක ගැළපෙනවා.

Skin Tone සහ Undertone කියන මේ දෙකම වැදගත් ඇයි?

හරිම ලිප්ස්ටික් පාට තෝරගන්නවා කියන්නේ නිකම්ම ඔයා කැමති පාටක් තෝරන එක නෙවෙයි. 

Skin Tone – මේක තමයි අපේ ඇහැට පේන පාට. ඒ කියන්නේ ඔයා තලෙළුද, සුදුද, නැත්නම් කළුද කියන එක. අව්වේ ගියාම මේ පාට ටිකක් වෙනස් වෙන්න පුළුවන්.

Undertone- මේක තමයි ඔයාගේ හමට යටින් තියෙන පාට. ඔයා කොච්චර අව්වේ කළු වුණත් මේ පාට කවදාවත් වෙනස් වෙන්නේ නැහැ.

හමේ පාට කියන්නේ රෙදි කෑල්ලක් නම්, Undertone කියන්නේ ඒ රෙද්ද වියන්න පාවිච්චි කරපු නූල් වල පාට. රෙද්දේ මතුපිට මොන වගේ පෙනුණත්, ඒක ඇතුළේ තියෙන නූල් වල පාට තමයි ඇඳුමේ නියම ලස්සන තීරණය කරන්නේ.

ඔයාගේ හමේ පාට හඳුනාගන්නේ කොහොමද?

හමේ පාට හඳුනාගන්න එක ඔයාට ගැළපෙන ලිප්ස්ටික් එක තෝරගන්න තියෙන පළමු පියවර. සාමාන්‍යයෙන් හමේ පාට ප්‍රධාන කොටස් හතරකට බෙදන්න පුළුවන්.

• Fair (හරිම සුදු) – හරිම ලා පාට හමක්. අව්වේ ගියාම ලේසියෙන්ම හම රතු වෙනවා හෝ පිච්චෙනවා.
• Light (ලා පැහැති) –  සුදු පාටට හුරුයි, හැබැයි හමට පොඩි උණුසුම් පෙනුමක් තියෙනවා.
• Medium (තලෙළු) – ගොඩක් වෙලාවට රන්වන් පාටක් හෝ ඔලිව් පාටක් තියෙන්නේ. අව්වේ ගියාම ලේසියෙන්ම හම තඹ පාට (Tan) වෙනවා.
• Dark (තද පැහැති) –  තද සහ ගැඹුරු පැහැයක් තියෙන හමක්.

ඔයාගේ හමේ පාට හරියටම බලාගන්න ඕනේ නම් කම්මුල් දිහා බලන්න එපා. මොකද කම්මුල් වල තියෙන රතු ගතිය හෝ ලප කැළැල් නිසා පාට මාරු වෙලා පේන්න පුළුවන්. ඒ වෙනුවට ඔයාගේ Jawline එක  බලලා හමේ පාට තීරණය කරන්න.

ඔයාගේ Undertone එක අඳුරගන්නේ කොහොමද?

ලිප්ස්ටික් එකක් ඔයාගේ මූණට ගැළපෙනවද නැද්ද කියලා තීරණය කරන ප්‍රධානම දේ තමයි ඔයාගේ හමේ තියෙන  Undertone එක. අපි මුලින්ම බලමු Cool Undertone එකක් තියෙන්නේ කාටද සහ ඒ අයට ගැළපෙන ලිප්ස්ටික් මොනවද කියලා.

Cool Undertones – ඔයාගේ හමට යටින් පේන්නේ රෝස, රතු හෝ නිල් පාටට හුරු ගතියක් නම් ඔයාට තියෙන්නේ මේ වර්ගයේ undertone එකක්. මේක ලේසියෙන්ම හොයාගන්න ක්‍රම දෙකක් තියෙනවා.

නහර වල පාට: මැණික් කටුව ගාව තියෙන නහර දිහා බැලුවම ඒවා නිල් හෝ දම් පාටට පේනවා නම්, ඔයා Cool Undertone කෙනෙක්.

ආභරණ: ඔයාට රන් ආභරණ වලට වඩා රිදී පාට ආභරණ පැළඳුවාම මූණට වැඩි ලස්සනක් එනවා නම්, ඔයා මේ වර්ගයේ කෙනෙක්.

මේ වගේ යටි පාටක් තියෙන අයට නිල් පාට පදනම් වුණු (Blue-based) ලිප්ස්ටික් හරිම ලස්සනට ගැළපෙනවා.

• සීතල රෝස පාට (Cool pinks)
• බෙරි වර්ගවල පාට (Berries)
• මෝව් (Mauve – ලා දම් පාටට හුරු පාට)
• නිල් පාට මිශ්‍ර තද රතු පාට (Blue-based reds)
• ලා ප්ලම් පාට (Soft plums)

Warm Undertones  තියෙන අය

ඔයාගේ හමට යටින් පේන්නේ රන්වන්, කහ හෝ ඔලිව් පාටට හුරු ගතියක් නම් ඔයාට තියෙන්නේ මේ වර්ගයේ යටි පාටක්. මේක අඳුරගන්න ලේසිම ක්‍රම තමයි

නහර වල පාට – මැණික් කටුව ගාව නහර දිහා බැලුවම ඒවා කොළ පාටට පේනවා නම්, ඔයා අනිවාර්යයෙන්ම “Warm Undertone” කෙනෙක්.

ආභරණ – ඔයාට රිදී පාට ඒවට වඩා රන් ආභරණ පැළඳුවාම වැඩි ලස්සනක් ලැබෙනවා නම්, ඔයා මේ වර්ගයට අයිතියි.

මේ වගේ යටි පාටක් තියෙන අයට Warm colors හරිම ලස්සනට ගැළපෙනවා.

• වෝම් නියුඩ් (Warm nudes)
• පීච් පාට (Peachy tones)
• ටෙරකොටා (Terracotta – ගඩොල් පාටට හුරු පාට)
• කොරල් (Coral)
• වෝම් බ්‍රවුන් (Warm browns – තද දුඹුරු පාට)
• තැඹිලි පාට මිශ්‍ර රතු පාට (Orange-based reds)

දැන් මේ වර්ග දෙකටම අයිති නැති තවත් පිරිසක් ඉන්නවා. ඒ තමයි Neutral Undertone එක තියෙන අය. ඒ කියන්නේ නහර කොළ පාටත් වගේ, නිල් පාටත් වගේ පේන අය.

Neutral Undertones තියෙන අය

ඔයාගේ හමේ undertone එක රෝස සහ කහ කියන පාටවල් දෙකේම එකතුවක් වගේ නම්, ඔයාට තියෙන්නේ නියුට්‍රල් undertone එකක්. මේක අඳුරගන්නේ මෙහෙමයි.

නහර වල පාට- මැණික් කටුව ගාව නහර දිහා බැලුවම ඒවා කොළ පාටද නිල් පාටද කියලා හරියටම කියන්න බැරි නම්, නැත්නම් නිල්-කොළ මිශ්‍ර පාටක් පේනවා නම් ඔයා මේ වර්ගයට අයිතියි.

ආභරණ –  ඔයාට රන් වගේම රිදී ආභරණ දෙවර්ගයම එක වගේ ලස්සනට ගැළපෙනවා නම් ඔයා වාසනාවන්තයි, ඔයා නියුට්‍රල් කෙනෙක්.

ඇත්තටම මේ වර්ගයේ අයට හරිම ලේසියි. මොකද ඔයාට ඕනෑම පාටක් ලස්සනට ගැළපෙනවා.

ලා නියුඩ් (Soft nudes) පාටවල් වල ඉඳන් තද රතු පාටවල් (Classic reds) වෙනකම් ඕනෑම එකක් ගාන්න පුළුවන්.

ඇඳුමේ පාට අනුව ඔයාට වෝම් හෝ කූල් ඕනෑම ලිප්ස්ටික් එකක් තෝරගන්න නිදහස තියෙනවා.

ගොඩක් අය කරන ලොකුම වැරැද්ද තමයි, හැමදේම කරලා ඉවර වෙලා අන්තිමට නිකම්ම ලිප්ස්ටික් එකක් තෝරන එක. හැබැයි ඔයා ඇඳගෙන ඉන්න ඇඳුමේ පාට අනුව ලිප්ස්ටික් එක තෝරන එක ඔයාගේ ලස්සන සම්පූර්ණයෙන්ම වෙනස් කරනවා.

ඇඳුමට ගැළපෙන ලිප්ස්ටික් එක තෝරගන්නේ කොහොමද?

ඔයාගේ ඇඳුමේ පාටටත් “උණුසුම්” හෝ “සීතල” කියලා ගතියක් තියෙනවා. ලිප්ස්ටික් එකෙන් කරන්න ඕනේ ඒ ඇඳුමේ පාට එක්ක සමබර වෙන එකයි. 

• නිල්, අළු හෝ රිදී වගේ සීතල (Cool-toned) ඇඳුම් – මේ වගේ ඇඳුම් ඇන්දම කූල් (Cool) හෝ නියුට්‍රල් (Neutral) ලිප්ස්ටික් එකක් පාවිච්චි කරන්න.
• රතු, කහ, තැඹිලි වගේ උණුසුම් (Warm-toned) ඇඳුම් – මේ වගේ ඇඳුම් වලට වෝම් (Warm) ලිප්ස්ටික් පාටවල් හරිම ලස්සනට දිදුලන පෙනුමක් දෙනවා.
• කළු, සුදු හෝ නිවුඩ් (Neutral) ඇඳුම් –  මේ වගේ ඇඳුම් අඳින වෙලාවට ඔයාට ඕනෑම අත්හදා බැලීමක් කරන්න පුළුවන්. එතකොට ලිප්ස්ටික් එකට පුළුවන් ඔයාගේ මුළු පෙනුමේම ප්‍රධානම අංගය වෙන්න.

මේ සමබරතාවය හරියට තිබුණොත්, ඔයා ඇඳලා ඉන්නේ හරිම සරල ඇඳුමක් වුණත්, ඒක හරිම පිළිවෙළට සහ හිතාමතාම ස්ටයිල් කරපු පෙනුමක් හැමෝටම පෙනේවි.

මතක තියාගන්න, ඔයාගේ ලස්සන සම්පූර්ණ වෙන්න තව එකම එක step එකක් විතරයි ඉතිරි වෙලා තියෙන්නේ.

ඒ තමයි, හරියටම ගැළපෙන ලිප්ස්ටික් එක තෝරගන්න එක.