Glennon Doyle ගේ Untamed කියන පොතේ මරු කතාවක් තියෙනවා. එයා කියනවා:
“අලුතින්ම ගමනක් පටන් ගන්න අයට පාවිච්චි කරන්න හදපු මැප් නෑ. ඔයා මීට කලින් කවුරුත් නොගිය අලුත් පාරක යන්න හදන, තමන්ගේම දෙයක් ගොඩනගන්න හදන කෙනෙක් නම්, ඔයා තේරුම් ගන්න ඕන දේවල් ටිකක් තියෙනවා.”
ජීවිතේ එක එක වෙලාවට ඔයාට ඔයාගේ ශක්තිය ගැන සැක හිතෙනවා නම්, “මට මේක කරන්න පුළුවන් වෙයිද?” කියලා හිතෙනවා නම්, අන්න ඒ වෙලාවට මෙන්න මේ කතා ටික ආයෙත් මතක් කරගන්න.
1. පරම්පරාවෙන්ම පළමුවැනියා වෙන එක බයක් තමයි; ඒත් ඔයා මේ වෙනස් කරන්නේ මුළු පරම්පරාවේම දෛවය!
අපිට රිස්ක් එකක් ගන්න තියෙන හැකියාවට අපේ වටපිටාව ලොකුවටම බලපානවා. අපේ පවුලේ අය, නෑදෑයෝ හරි වටපිටාවේ ඉන්න අය හරි මීට කලින් ලොකු දෙයක් කරලා තියෙනවා නම්, අපිට ඒ දිහා බලාගෙන අඩියක් ඉස්සරහට තියන්න ලේසියි.
ඒත් පොඩ්ඩක් හිතන්න ඔයාට එහෙම උදාහරණයකට ගන්න කවුරුත්ම නැත්නම්?
අන්න එතැනදී ඔයා මේ කරන්නේ මුළු පරම්පරාවම, වටපිටාවම අබිබවා යන එකක්. එතැනදී ඔයාට මීට කලින් ඔයාගේ පවුලේ කාටවත් නොතිබුණු විදියේ යකඩ වගේ විනයක්, ඉවසීමක් සහ මහ පුදුම ධෛර්යයක් ගොඩනගාගන්න වෙනවා. ඔයාගේ මොළේ හරි වටපිටාවේ අය හරි “ඔයාට මේක කරන්න බෑ, ඕක නවත්තන්න” කියලා කෑගහද්දී, ඒ සද්ද ඇහුණේ නෑ වගේ ඉස්සරහට යන්නම වෙනවා.
Digital Entrepreneur කෙනෙක් වෙන Deepak Kanakaraju කියන්නේ, “තමන්ට හොඳටම පුරුදු Comfort Zone එකෙන් එළියට යන එක තමයි කරියර් එකේ ගන්න පුළුවන් හොඳම මූව් එක” කියලා. මොකද ඔයාව හොඳටම දන්න සමහර අය ඔයාගේ අනාගත හීන විශ්වාස කරන්නේ නැති වෙන්න පුළුවන්. ඒ වගේම, ඔයාගේ ඇත්තම ශක්තිය අඳුරගෙන ඔයාට පාර හදලා දෙන්නේ මීට කලින් ඔයාව දැකලවත් නැති පිටස්තර මිනිස්සු වෙන්නත් පුළුවන්.
මෙන්න මේක මතක තියාගන්න. ඔයා අමාරුවෙන් හරි හරි තීරණ අරන් ඉස්සරහට යද්දී, ඔයා වෙනස් කරන්නේ ඔයාගේ විතරක් නෙවෙයි ඔයාගෙන් පස්සේ එන්න ඉන්න මුළු පරම්පරාවේම දෛවය!
2. ඔයා වෙනස් කෙනෙක් කියලා තේරුම් ගන්න; ගෙදර අයගෙන් 100%ක් පිළිගැනීම් බලාපොරොත්තු වෙන්න එපා
ඔයා මොකක් හරි සාර්ථකත්වයක් ලැබුවා කියලා, ගෙදර අයට හරි වටපිටාවේ අයට හරි “ඔයාලත් මං වගේ වෙන්න” කියලා ලොකු ප්රෙෂර් එකක් දෙන්න යන්න එපා. එයාලට හොඳ උදාහරණයක් වෙන්න, එයාලව දිරිමත් කරන්න. හැබැයි එයාලව එයාලගේ විදියට බාරගන්න. ඒක කරන්න අමාරුයි තමයි, ඒත් ඔයා ඒක කරන්න පුරුදු වුණොත් ඔයාගේ ඔළුවට මාර නිදහසක් දැනෙයි.
අනික, ඔයාගේ අදහස් පවුලේ අයට තේරෙන්නේ නැති වුණාම “එයාලා මට ආදරේ නෑ” කියලා හිතන්න එපා.
මිනිස්සු කියන්නේ අවුරුදු ගාණක් තිස්සේ ගෝත්ර විදියට, කණ්ඩායම් පිටින් ජීවත් වෙච්ච ජාතියක්. එදා ගෝත්රයේ පිළිගැනීම නැති වුණොත් ගෝත්රයෙන් එලවලා මැරිලා යන්න වෙනවා කියන බය අදටත් අපේ ඇඟ ඇතුළේ තියෙනවා. ඒ නිසයි නෑදෑයෝ හරි යාළුවෝ හරි අපේ අදහස්වලට එකඟ නැති වුණාම අපිට ලොකුවටම ඒක දැනෙන්නෙ.
එයාලා ඔයාට අකමැති නෙවෙයි, එයාලා ඔයාට බයයි. මොකද ඔයා එයාලට වඩා වෙනස්, එයාලගේ සීමාවලින් එළියට ගිය වෙනස්ම කෙනෙක් නිසා!
3. දවස ගානේ ස්ටියරින් වීල් එක දශම ගණනින් හරි පැත්තට හරවන්න
අරාබි Influencer කෙනෙක් වෙන Layla Khasib එයාගේ නැවියෙක් වුණු තාත්තා කියපු කතාවක් මතක් කරනවා:
“නැවක් පදවද්දී යා යුතු පාරෙන් දශම ගණනක පුංචි වෙනසක් වුණත්, කිලෝමීටර් ගාණක් යද්දී ඒ නැව නවතින්නේ යන්න ඕන තැන නෙවෙයි, සම්පූර්ණයෙන්ම වෙන කොහේ හරි!”
මේ කතාවම තමයි James Clear එයාගේ Atomic Habits පොතේ “1% Rule” එකෙන් කියන්නේ. දවසකට 1%ක විතර පුංචි වෙනසක් හරි පැත්තට කරගත්තොත්, කාලයක් යද්දී ඔයා ඉන්නේ මාරම තැනක.
වැඩ කරද්දී ඔයාගේ අවධානය වෙන කොහේ හරි යනවා නම්, දවස ගානේ ඔයාගේ ස්ටියරින් වීල් එක ආයෙත් ඔයාගේ ඉලක්කය පැත්තට හරවගන්න එක ඔයාම කරන්න ඕන දෙයක්.
4. Micro Challenges දිනන්න: ලොකු හීන කුඩා කෑලිවලට කඩන්න
ලොකු හීනයක් දිහා එකපාර බලද්දී බය හිතෙන එක සාමාන්යයි. ඒ හින්දා මෙන්න මේ ට්රික් එක දාන්න:
- කොළයක් සහ පෑනක් ගන්න: ඔයාගේ ලොකුම හීනය උඩින්ම ලියන්න.
- බාධක ලියාගන්න: ඒ හීනයට යන්න ඔයාට දැනට තියෙන බාධක එකින් එක පහළට ලියන්න (උදා: ටයිම් මදි වීම, යම් Skill එකක් නැතිකම, බය).
- Micro Challenges හදාගන්න: ඒ බාධක කඩන්න දවසට කරන්න පුළුවන් පුංචි වැඩ (Micro-tasks) වෙන් කරගන්න.
දවසකට පැය භාගයක් හරි ඒ වෙනුවෙන් වෙන් කරන්න. ඔයාට දිනන්න තියෙන්නේ මුළු ලෝකෙම නෙවෙයි; අද දවසේ තියෙන ඒ පුංචි Micro Challenge එක විතරයි!
5. හැමෝටම ඔයාව Prove කරන්න යන එක නවත්තන්න
ලෝකේ අනිත් අයට වඩා වෙනස් තැනකට යන්නේ 1%ක් තරම් ඉතාම පොඩි පිරිසක්. එතැනට යන්න හැමෝටම ඕන වුණාට, කැපවෙන්න හැමෝටම බෑ.
ඔයා යන ගමනේදී වටේ ඉන්න අයගෙන් අගය කිරීම් හරි දිරිගැන්වීම් හරි බලාපොරොත්තු වෙන්න එපා. එයාලා ඔයාගේ අතීතයේ කරපු වැරදි, අඩුපාඩු දැකලා තියෙන නිසා එයාලගේ ඇස්වල තියෙන්නේ ඔයා ගැන සැකයක් වෙන්න පුළුවන්.
එයාලා ඔයාව විශ්වාස කරන්නේ නැති තැනකදීත්, ඔයා එයාලගෙන් අගය කිරීමක් බලාපොරොත්තු වෙනවා නම් වැරැද්ද තියෙන්නේ එයාලගේ නෙවෙයි, ඔයාගේ බලාපොරොත්තුවේ!
6. නිහඬව වැඩ කරන්න; “The Turning Point” එක එකපාරටම එනවා!
අපි කවුරුත් දැක්කේ නැතත්, සද්ද නැතුව දවස ගානේ කැපවෙද්දී එක මොහොතක් එනවා මුළු ලෝකයම අපි දිහා හැරිලා බලන.
Simon Sinek: එයා මීට අවුරුදු ගාණකට කලින් කරපු TED Talk එක එකපාරටම මිලියන ගණනක් බලන්න ගත්තා. එයා ඊට කලිනුත් කතාකරුවෙක්. හැබැයි ඒ එක මොහොතින් එයාගේ මුළු ලයිෆ් එකම වෙනස් වුණා.
Barack Obama: එයාගේ Dreams from My Father පොත ලියලා අවුරුදු ගාණක් යනකම් කවුරුවත් දැනන් හිටියේ නෑ. හැබැයි එයා ප්රසිද්ධ වුණු එක ඉන්ටර්විව් එකකින් පස්සේ, ඒ පරණ පොත New York Times Best Seller එකක් වුණා.
ඔයාටත් අන්න ඒ වගේ “Turning Point” එකක් එනවා. හැබැයි ඒ මොහොත එන්න නම්, කවුරුවත් බලන් නැති වෙලාවෙත් ඔයා නොකඩවා මහන්සි වෙන්න ඕන.
7. සියවෙනි කුළුගෙඩි පහර වදින්නේ පළමු පහරවල් 99 නිසා බව මතක තියාගන්න
හිතන්න ඔයාට ලොකු බිත්තියක් කඩන්න තියෙනවා කියලා. ඔයා කුළුගෙඩියෙන් එක දිගට ගහනවා.
- 1 වෙනි පාර – බිත්තියට මුකුත් වුණේ නෑ.
- 10 වෙනි පාර – කිසිම වෙනසක් නෑ.
- 50 වෙනි පාර – තාමත් බිත්තිය තියෙනවා.
- 100 වෙනි පාර – බිත්තිය කුඩු පට්ටම් වෙලා යනවා!
දැන් හිතන්න, බිත්තිය කැඩුණේ 100 වෙනි පහර නිසා විතරද? නෑ! කලින් ගහපු පහරවල් 99ම එකතු වෙලා තමයි 100 වෙනි පහරේදී බිත්තිය කැඩෙන්න අඩිතාලම හැදුවේ.
ඔයා කරන වැඩවල ප්රතිඵල දවසෙන් දෙකෙන් පෙනුණේ නැතත්, ඔයා තියෙන සෑම අඩියක්ම, කරන සෑම කැපවීමක්ම අනාගත සාර්ථකත්වයට පදනම හදනවා. ඒ හින්දා ගේම අතහැරගන්නේ නැතුව ඉස්සරහටම යන්න!
