අයියෝ.. මට රෑට නින්ද යන්නෙ නැහැනේ. ඒ නිසා දවල් දවස ම හරිම වෙහෙසකරයි. මට කිසිම අසනීපයක් ඇත්තෙත් නැහැ. ඒත් මම මේ ගැන කියලා ඩොක්ටර්ගෙන් නිදිපෙතිත් ඉල්ලුවා. ඩොක්ටර් කියන්නේ මේක බෙහෙත් බොන්න ඕන තත්වයක් නෙවෙයි කියලයි…
මේ පැමිණිල්ල කරන අය ඔබ අතරෙත් ඉන්නව ද? සමහරවිට ඔබත් මේ පැමිණිල්ල කරන කෙනෙක් වෙන්න බැරි නැහැ. කොහොම වුණත් දිගින් දිගට ම මෙහෙම තත්වයක් පවත්වාගෙන යන එක නම් ඔබේ කායික සෞඛ්‍යයට විතරක් නෙමෙයි මානසික සෞඛ්‍යයටත් කිසිසේත් ම සුදුසු නැහැ.
නිරෝගී පුද්ගලයෙක් සාමාන්‍යයෙන් දිනකට පැය 8ක් පමණ සුව නින්දක් ලැබීම අත්‍යවශ්‍යයි. එහෙම නොවුණොත් පසුදින උදෑසන ප්‍රබෝධමත්ව අවදිවන්නට අපහසුයි. දවසේ වැඩකටයුතු සැලසුම්කරගත් ආකාරයට කාර්යක්ෂමව කරගන්නටත් මේ නිසා ඔබට අපහසු වෙන්න පුළුවනි. ඒ විතරක් නෙවෙයි, වාහනය පදවන අතරතුර නින්ද යාම, කාර්යාලයේ රාජකාරි අතරතුර නින්ද යාම, බස් රථවල හෝ ප්‍රසිද්ධ ස්ථානවල දී නින්ද යාම, වගේ අකරතැබ්බවලට ලක්වන්නටත් සමහරවිට ඔබට සිදුවේවි.
ඇත්තට ම ඔබට රෑට නින්ද යන්නේ නැත්තේ ඇයි?
අමතක කරන්න අසීරු යම් කිසි මතකයක්
සමහරවිට පැරණි ප්‍රේමයක නටබුන්, ඔබ කවර හෝ අවස්ථාවක දී මුහුණ දුන් හෝ ඇසින් දුටු හදිසි අනතුරක්, එහෙමත් නැත්නම් ඔබේ සමීපතමයෙකුගේ වියෝවීමක්, ඔබට කවරාකාරයෙන් හෝ ඇතිවූ දරුණු සිත් රිදීමක් නැවත නැවත සිහිපත් වීම නිසා ඔබට නින්ද යන්නේ නැතිවෙන්න පුළුවනි. ඔබේ නින්ද උදුරාගෙන ඇත්තේ එවැනි කරුණක් නම් එය දිගින් දිගට ම සිහිපත් වීම වළක්වාගන්න. ඔබේ මනස ඒ සඳහා ඔරොත්තු දෙන අයුරින් ශක්තිමත් කරගන්න.
රාත්‍රියට ගන්නා ආහාර වර්ගවල හෝ ආහාර ගැනීමේ ප්‍රමාණයේ හෝ වේලාවෙහි අක්‍රමවත් බවක්
රාත්‍රියට ඔබ සාමාන්‍යයෙන් ගන්නා ආහාර වර්ග සහ ප්‍රමාණය ගැන සැලකිලිමත් ද? ඒවගේ ම ඔබ නින්දට පැය දෙකකටවත් පෙර රාත්‍රී ආහාරය ගන්නවා ද? මේ හැම දෙයක් ම ඔබේ නින්දට බලපාන බව අමතක කරන්න එපා. රාත්‍රී කාලයේ දී ඔබ තරමක් සැහැල්ලු ආහාරයක් සරල ප්‍රමාණයකින් ගැනීම තමයි වඩාත් සුදුසු වන්නේ. දිරවීමට අපහසු, බර ආහාර වර්ග ගැනීම, බඩට ඔරොත්තු නොදෙන තරම් අධික ප්‍රමාණයක් ආහාර ගැනීම රාත්‍රී කාලයේ දී ඔබේ සැහැල්ලුව නැති කරන්නට වගේම නින්ද නැති කරන්නටත් ඉඩ තිබෙනවා.
ඔබේ ඇඳුම්, ඇඳේ මෙට්ටය, ඇඳ ඇතිරිලි, කාමරයේ පැහැය, ආලෝක තත්වය ආදියෙහි අපහසුතා
නින්ද පහසු කරවන්නටත් සැපවත්කරන්නටත් ඔබ රාත්‍රියට අඳින ඇඳුම සැහැල්ලු වීම බලපානවා.කපු මිශ්‍ර, ඇඟට අවහිර නැති ඇඳුම් රාත්‍රීකාලයට ඇඳීම වඩාත් සුදුසුයි. ඒ වගේම ඒවා පිරිසිදු වීමත් ඉතා වැදගත්. දින දෙක තුනක් නොසෝදා එකම රාත්‍රී ඇඳුම් අඳින්න හුරුවන්න එපා. සතියකට වරක් අනිවාර්යෙන්ම ඔබේ ඇඳ ඇතිරිලි කොට්ට උර සෝදාගන්න. සමහරවිට ඔබ නිදාගන්නා ඇඳේ මෙට්ටය දැන් මාරුකරන්න කාලෙ හරි ඇති. එහෙමත් නැත්නම් එය සති අන්තයේ දී හොඳින් අව්වේ දමා වේලාගැනීම හෝ සිදුකරන්න. ඔබේ කාමරයේ ආලේප කර ඇති තීන්ත පවා සැහැල්ලු නින්දකට උපකාර වන බව ඔබ දන්නවා ද? ඒ වගේ ම සමහර අය රාත්‍රී නින්දේ දී මඳ ආලෝකයක් හෝ තිබෙනවාට කැමතියි. නමුත් සමහර අයට මඳ ආලෝකයත් නින්දට බාධාවක්. විශේෂයෙන් ම සැමියා සහ බිරිඳ මේ සම්බන්ධයේ එකඟතාවක් නැත්නම් කෙනෙක් නිදියන අතරෙ අනිත් කෙනාට අවදියෙන් ඉන්නට සිදුවේවි.
හුස්ම ගැනීමේ අපහසුතා, පපුවේ සෙම්ගතිය, කැස්ස, හන්දිපත් වේදනා හෝ වෙනත් ශරීරගත අපහසුතා
සමහර දෙනෙකුට විවිධ මානසික සංකූලතා නිසා හුස්ම ගැනීමේ අපහසුතා ඇති වෙන අවස්ථාවන් තියෙනවා. විශේෂයෙන්ම දවල් කාලයේ තමන් අධික ලෙස වෙහෙසකාරීව නොසන්සුන්ව, කැළඹිලිසහගතව එසේත් නැත්නම් අධික ලෙස අවිවේකීව ගත කළ විට රාත්‍රී කාලයේ දී යම් යම් ශරීර අපහසුතා ඔබට ඇතිවන්නට පුළුවනි. කොන්ද කැක්කුම, හිසරදය, බඩ පපුව දැවිල්ල මානසික ආතතිය නිසාත් ඇතිවෙනවා. මේ සියල්ල ම නින්දට බාධාවක්. ඔබේ නින්ද නැති කරන්නේ මේ ආකාරයේ හේතුවක් නම් වහාම වෛද්‍ය උපදෙස් සහ ප්‍රතිකාර ලබාගැනීම තමයි හොඳම විසඳුම.
මදුරුවන් මැස්සන් කූඹින්, කැරපොත්තන්,හූනන්, සහ මීයන් රෑ තිස්සේ වද දෙනවාද?
සමහර ගෙවල්වල දවල්ට විතරක් නෙවෙයි රෑටත් මැස්සෝ පිරිලා. නෙට් දැම්මට නෙට් එක ඇතුළෙත් මදුරුවො පිරිලා. හේතුව නෙට් එකේ තැන් තැන්වල සිදුරු හැදිලා. හූනො කැරපොත්තො කොයිවෙලාවෙ කොහේ ඉඳල ඇඟට එයි ද කියල දන්නෙ නෑ. මීයන්ගේ සද්දෙ තැන් තැන්වලින් ඇහෙන්න පටන්ගන්නවා. මේ ඔක්කොම එක්ක කොහොම නිදාගන්න ද… ඒත් මේ හැමදෙයක් ම ඔබට ඔබ විසින්ම පාලනය කරගත හැකි තත්වයන්. ඔබ මේ හැමදෙයක් ගැනම වගකීමෙන් සැලකිල්ලෙන් කටයුත් කරන්න. නෙට් එකේ සිදුරු ටික සති අන්තයේ දී මහගන්න. දවල් දවසේ ඇරලා තියෙන දොර ජනෙල් හුඟක් හවස් වෙන්න කලින් වහන්න පුරුදු වෙන්න. තැන් තැන්වල ඇර දැමූ කෑම පිඟන්, ඉඳුල් බඳුන් වහාම පිරිසිදු කරන්න. එක පිම්මට සැහැල්ලුවෙන් නිදාගන්න ඔබට අවශ්‍ය නම් ගෙදරදොරේ පිරිසිදුකම, පිළිවෙළ ගැන සැලකිලිමත් වෙන්න.
දවල් දවසේ ටිකක් වැඩිපුර නිදාගන්න කෙනෙකුට රාත්‍රියට නින්ද නොයන එක අසාමාන්‍ය තත්වයක් නොවෙයි. විශේෂයෙන්ම නිවෙසට ම වී සිටින රෝගීන්, වැඩිහිටියන්, ගැබිනි කාන්තාවන්, කුඩා දරුවන් මවුකිරි දෙන කාන්තාවන් දවල් කාලයේදීත් කෙටි නින්දක් ලබාගැනීම සෞඛ්‍යාරක්ෂිත බවයි වෛද්‍යවරුන් සඳහන් කරන්නේ. සොර සතුරු බිය, ගංවතුර, නායයාම් ගැන බිය, ලෙඩ රෝග ගැන ඇතිකරගන්නා අනිසි බිය සමහර විට ඔබේ නින්ද නොයාමට හේතුව වෙන්න ඇති. එහෙම හේතුවක් නිසා ඔබේ නින්ද දිගින් දිගටම කැප කිරීම නම් කොහෙත් ම යහපත් නැහැ. නිවැසියන්, නෑ හිතමිතුරන් සියලු දොනගේ සහාය ලබාගෙන වහාම ඔබේ බිය තුරන් කරගන්නට අවශ්‍ය පිළියම් යොදන්න. නින්ද ඔබේ යහපත් සෞඛ්‍යයට අත්‍යවශ්‍යයි. නිසි නින්දක් නොලැබුණොත් ඔබ අකාලයේ වයස්ගත වන්නටත් එය හේතුවක් වේවි.
යෝග අභ්‍යාස, භාවනා, පිරිත්, සහ වෙනත් ආගමික ක්‍රියාකාරකම්, පොත්පත් කියවීම වැනි හුරුපුරුදු එකතු කරගැනීමෙන් මේ සඳහා යම් සහනයක් ලැබේදැයි අත්හදා බලන්න. එසේ නොවුණොත් ඔබේ පවුලේ වෛද්‍යවරයා හෝ මනෝවෛද්‍ය උපදේශකවරයාගේ නිවැරදිමඟපෙන්වීමෙන් ඔබට මේ ගැටළුවම ඉතා පහසුවෙන් විසඳාගන්නට පුළුවන් වේවි.
නින්ද නොයාම ගැන කල්පනා කරන්න ගිහින් තව තවත් මානසිකව පීඩා විඳිනවා වෙනුවට නින්ද නොයන්න ඔබට බලපා ඇති හේතු නිවැරදිව හඳුනාගෙන, ඒවා විසඳාගන්න අද ඉඳල ඔබත් හුරුවුණොත් හොඳයි නේද?
– නිරංජලා –
