මේ විදියට බිත්තර කාල බර අඩුකර ගමු

අපේ ශරීරයේ අනවශ්‍ය බර අඩු කරන ප්‍රෝටීන බහුල ආහාර ගැන කතා කරද්දී අපි බොහෝදෙනෙක්ට එක්වරම මතක් වෙන කෑමක් තමයි බිත්තර කියන්නෙ. 

පිසගැනීමේ තියෙන පහසුව, රස, පෝෂණ ගුණයෙන් අනූන වීම, දැරිය හැකි මිල සහ සපයා ගැනීමේ පහසුව වගේ කාරණා නිසා බිත්තර කියන්නෙ ආහාර පාලනය කරන බොහෝදෙනෙක් අතරේ ඉතාම ජනප්‍රිය ආහාරයක් කියල හඳුන්වන්න පුළුවන්. 

පරීවෘත්තීය ක්‍රියා පහසු කරන්න වගේම අනෙකුත් ආහාර වලට වඩා ඉක්මණින් සහ සෞඛ්‍යාරක්ෂිතව ශරීරයේ අනවශ්‍ය බර අඩු කරන්න බිත්තර වලට හැකියාව තියෙන බව මේ සම්බන්ධව පරීක්ෂණ කරන පර්‍යේෂකයන් සඳහන් කරනව වගේම බිත්තර ආහාරයට ගැනීමේදී අපි බොහෝදෙනෙක් අනුගමනය කරන වැරදි පුරුදු කීපයක් නිසා බිත්තර වලින් ලැබෙන නිසි ප්‍රතිලාභ අපිට අහිමි වෙනව කියලත් ඔවුන් මේ ගැන අදහස් දක්වමින් ප්‍රකාශ කරනව. 

ඉතිං අන්න ඒ වැරදි පුරුදු වලින් වැළකිලා සෞඛ්‍යාරක්ෂිතව ශරීරයේ බර අඩු කරගන්න බිත්තර ආහාරයට ගන්නෙ කොහොමද කියල ඔබට කියල දෙන්න smart lady අපි තීරණය කරා. 

එහෙනම් ඒ ගැන දැනගන්න මේ ලිපියෙන් අපිත් එක්ක එකතු වෙන්න කියල අපි ඔබට බොහොම ආදරෙන් ආරාධනා කරනව.

කහ මදය නරකද? 

බිත්තර ගැන කතා කරද්දී බොහෝදෙනෙක් අතර තියෙන වැරදි මතයක් තමයි බිත්තර කහ මදයේ සෞඛ්‍යාරක්ෂිත නොවන මේදය අන්තර්ගතයි කියන කාරණාව.

බිත්තර කහ මදයේ කොලෙස්ටරෝල් ඉහළ ප්‍රමාණයක් පවතිනව වුනත්, මාගරින්, බටර්, ක්ෂණික ආහාර වගේ ආහාර වල අඩංගු trans fat එහෙමත් නැත්නම්‍ රසායනික සංයෝග අඩංගු මේදය සහ බටර්, චීස්, රතු පැහැති මස් වගේ ආහාර වල අඩංගු සංතෘප්ත මේදය වගේ ඉහළ ප්‍රමාණවලින් රුධිරයේ කොලෙස්ටරෝල් මට්ටම ඉහළ නංවන්න බිත්තර කහමදයේ ඇති කොලෙස්ටරෝල් බලපාන්නෙ නැති බව ඔබට මතක් කර යුතුයි. 

ඊටත් අමතරව, බිත්තර කහමදයේ විටමින් B12, B2, විටමින් D, ෆෝලේට්, පොස්පරස්, සෙලිනියම්, කැල්සියම් සහ සින්ක් වගේ පෝෂ්‍ය පදාර්ථයන් රාශියක් අඩංගු වෙලා තියෙනව. 

ඒ නිසා යකා හිතන තරම් කලු නෑ කියනව වගේ බිත්තර කහ මදයටත් ඔබ හිතන තරම් බිය විය යුතු නෑ. 

බිත්‍තර හදන්නෙ කොහොමද? 

මාගරින්, බටර් වගේ බිත්තර හදද්දි අපි පාවිච්චි කරන අමුද්‍රව්‍ය වල රුධිරගත කොලෙස්ටරෝල් මට්ටම ඉතාම ඉක්මනින් ඉහළ නංවන trans මේදය අඩංගුයි කියල අපි කලින් කතා කරානෙ. 

ඉතිං තම්බපු බිත්තර පෝච් ක්‍රමයට සකසගත්ත බිත්තර වෙනුවට බටර් හෝ මාගරින් පාවිච්චි කරල බැඳගත්ත එහෙමත් නැත්නම් ස්කැම්බල් කරගත්ත බිත්තර ඔබ ආහාරයට ගන්නව නම් බිත්තර ආහාරයට ගැනීමෙන් ඔබ බලාපොරොත්තු වෙන ප්‍රතිඵලය ලබා ගන්න ඔබට අසීරුයි කියල අපි ඔබට මතක් කරන්න කැමතියි. 

ඒ වෙනුවට රුධිරගත කොලෙස්ටරෝල් මට්ටම ඉහළ යාම නිසා හෘදයාබාධ වගේ හදවත් රෝග සෑදීමේ අවධානමක් ඇති වෙන්නත් පුළුවන්. 

රසයි තමයි ඒත් ඔබේ සෞඛ්‍ය වඩා වැදගත්නේ. ඒ නිසා හැකිතරම් සෞඛ්‍යාරක්ෂිතව ඔබේ බිත්තරය පිළියෙල කරගන්න ඔබ සැළකිලිමත් වෙන්නම ඕන. 

බිත්තර කන්නෙ මොනවත් එක්කද?

පාන්, බත් වගේ කාබ්ස් වැඩි ප්‍රමාණයක් අඩංගු ආහාර වර්ග එක්ක බිත්තර කනවට වඩා ෆයිබර් සහ අනෙකුත් පෝෂක අඩංගු නිවිති, තක්කාලි, කැප්සිකම්, බිම්මල් වගේ එළවළු වර්ග කීපයක් එක්ක බිත්තර ආහාරයට ගන්න පුළුවන් නම් බිත්තර වලින් ලබාගන්න ඔබ අපේක්ෂා කරන පෝෂණ ගුණය ඒ විදිහටම ආරක්ෂා කරගන්න ඔබට පුළුවන්. 

ගොඩක් වෙලා උයනවද?

බිත්තර සකසා ගනිද්දී බොහෝදෙනෙක් අනුගමනය කරන තවත් වැරදි පියවරක් විදිහට වැඩි වේලාවක් බිත්තර පිස ගැනීම හඳුන්වන්න පුළුවන්. 

බිත්තර කියන්නෙ සාමාන්‍යයෙන් පිස ගැනීමට ගතවෙන කාලය ඉතාම සීමිත ආහාර වර්ගයක්.

වැඩි වේලාවක් පිස ගැනීම සහ වැඩි උෂ්ණත්වයක පිසගැනීමෙන් බිත්තර වල තියෙන සමහර පෝෂක වලට හානිවෙන්න පුළුවන්. 

ඒ අතරින් විටමින් A සහ ප්‍රතිඔක්සිකාරක ප්‍රධාන ස්ථානයක් හිමිකර ගන්නවා.  

ඒ වගේම වැඩි උෂ්ණත්වයේ පිසගනිද්දී බිත්තර වල අඩංගු කොලෙස්ටරෝල් ඔබේ හදවතට හානිකරන oxysterols නැමති සංයෝගයක් සාදාන්නත් කටයුතු කරන නිසා බිත්තර පිසගන්න ගතවෙන කාලය සහ උෂ්ණත්වය ගැනත් ඔබ සැළකිලිමත් වෙන්නම ඕන. 

කැලරි ගණන හරියටම ගැන්නද? 

ආහාර පාලනයේදී අපි ආහාරයට ගන්න ආහාර වල අඩංගු කැලරි ප්‍රමාණය ගැන දළ වශයෙන් හෝ අවබෝධයක් තිබීම ඉතාම වැදගත්නෙ. 

කැලරි ප්‍රමාණය හැකිතරම් අඩු කරන්න පුළුවන් විදිහට බිත්තර පිස ගැනීම වඩා සෞඛ්‍යාරක්ෂිතයි වගේම ශරීරයේ අනවශ්‍ය බර අඩු කරගන්නත් හොඳ සහයෝගයක් ලබාදෙනවා. 

ඒ නිසා බිත්තර ඔම්ලට්, බුල්ස් අයි, ස්ක්‍රැම්බ්ල් කරනවට වඩා බිත්තර තම්බලා හෝ පෝච් ක්‍රමයට සකසල ආහාරයට ගන්න පුළුවන් නම් එය වඩාත් පහසුයි. 

Smart lady අපේ https://smartlady.lk/article/33802/health-8/ ලිපියෙනුත් මේ ගැන ඔබට තවත් තොරතුරු බොහොමයක් දැනගන්න පුළුවන්. 

එහෙනම් අද ලිපිය ඔබට ප්‍රයෝජනවත් වන්නට ඇතැයි අපි විශ්වාස කරනව. මේ වගේම තවත් ලිපියකින් ඔබව හමුවෙන බලාපොරොත්තුවෙන් අපි අද සමුගන්නම්.

සටහන – දුලානි නවෝද්‍යා