හුළඟට වැලි කඳුවල හැඩේ වෙනස් වෙනවා. ඒත් කාන්තාරේ වෙනස් වෙන්නේ නෑ.එකිනෙකා ගැන අපේ තියෙන ආදරෙත් අන්න ඒ වගෙයි. “
“The Alchemist” කෘතිය රචනා වන්නේ පාවුලෝ කොයියෝ නම් විශිෂ්ට රචකයා අතින්. ඔබට උද්‍යෝගයේ භාෂාව රස විඳින්නට අවැසි නම් මේ කෘතිය කියවිය යුතුම බව විචාරක අදහසයි.
කොයියෝ යනු ලතින් ඇමරිකානු ලේඛකයෙක්. ඉතා විශිෂ්ට කෘති බොහෝ ප්‍රමාණයක් රචනා කර ඇති ඔහුගේ අග්‍ර කෘතිය ලෙස “The Alchemist” හැඳින්විය හැකියි. මේ කෘතිය ලෝකයේ වැඩියෙන් ම අලෙවි වන කෘති අතරට එක් වී තිබෙන අතර මේ වෙද්දී භාෂා හැත්තෑවකට අධික ප්‍රමාණයකට පරිවර්තනය වී තිබෙනවා.
මෙහි සිංහල පරිවර්තනය චූලානන්ද සමරනායක මහතා අතින් “සන්තියාගෝ නම් සැරිසරන්නා” ලෙස සිංහලට පරිවර්තනය වී තිබෙනවා.
සන්තියාගෝ ස්පාඤ්ඤයේ වාසය කල සෙමනේරියක ඉගෙන ගත් සංචාරයට ප්‍රිය නිසාම එඩේර ජීවිතයකට ඇතුල් වූ පොත පත කියවන්නෙක්; විශ්ව භාෂාවට ඇලුම් කරන්නෙක්;සොබාදහම සමඟ මනසින් ගනුදෙනු කරන්නෙක්;තම සිහින ඉටු කර ගැනීමට වෙහෙසෙන්නෙක්. ඔහු නින්දෙන් නැවත නැවත දකින සිහිනයක් නිසා තම ඉරණම ලුහුබැඳ යන ගමනේ ඔහුගේ අත්දැකීම් මේ කෘතියේ විස්තර වෙනවා.
“ආදරේ කියන්නේ කොහොම දෙයක් ද? ´කාන්තාරය ප්‍රශ්න කළේය.
`ආදරය කියන්නේඔබ මතින් සරනා උකුස්සාගේ පියාසැරියටයි.මොකද උකුස්සන්ට හැම වෙලාවෙම දඩයම් සමඟින් ආපහු එන්න ඉඩ හදලා දෙන ඔබ ,ඌට හරිත වර්ණ කෙතක් වගේ.ඌ ඔබේ ගල් කඳු වැලිපර වගේම කඳු පංතීන් ගැන දන්නවා.ඒ වගේම ඔබත් ඌට ත්‍යාගශීලීත්වය දක්වනවා”
මේ නවකතාවේ තේමාව වෙන්නේ “යමෙක් සිය ඉරණම ලුහුබැඳ යාමට එඩිතර වන්නේ නම් ඔහුට එය ජය ගැනීමට උපකාරි වීම පිණිස මුළු ලොවම පෙළ ගැසෙයි” යන්නයි.
මායාව සමඟ චිත්ත ශක්තිය, දාර්ශනික බව, කැපවීම, වීරත්වය ගැන කියැවෙන මේ කෘතියේ මිනිසෙකුගේ ජීවන රටාවට පවා සාධනීය බලපෑම් කළ හැකි තරම් කාරණා අඩංගුයි.
අමතක කරන්න එපා..ජීවිතේ තියෙන්නේ හීන ලුහුබැඳ යන්න.ඒවා හැබෑ කර ගන්න.
