දිව්‍යා ලන්ච් රූම් එකට වෙලා තනියම කෑම කමින් ඉන්නකොට එතනට ආවෙ රුවනි
” ඔන්න ඔයාගේ තනියට මාත් ආවා අද ”
රුවනි එහෙම කියන ගමන් කෑම එක දිගෑරියා. දිව්‍යා මද හිනාවක් පාලා රුවනිට කට්ලට් එකකුත් අල බැදුමෙන් ටිකකුත් බෙදුවා.
දිව්‍යා කාර්යාලයට ආවේ මාස දෙකකට විතර කලින් . ඉතාම හොඳට අඳින පළඳින බැලූ බැල්මට වත් පොහොසත්කම් තියෙන පෙනුමක් තියෙන දිව්‍යා වැඩිපුර කාත් එක්කවත් හිතවත්කම් පාන්න ගියේ නැහැ.
” මහා උද්දච්ච කෙල්ලෙක් ”
කාර්යාලයේ තරමක් වැඩිමල් සේවිකාවක් වුන අනූෂා දවසක් එහෙම කිව්වේ දිව්‍යා කාර්යාල කාමරයෙන් එළියට යනකොට.
” හැබැයි ඉතින් දිව්‍යා ඉන්න විදිය තමයි හරි. එහෙම නැතුව මේක ඇතුලේ ඉහ ගහගෙන ඉන්න අමාරුයිනේ ”
එහෙම කිව්වෙ සමීර.
” ඇයි සමීර එහෙම කතාවක් කිව්වේ? මේකේ දැන් කාත් එක්කද ඔයාට ඉහ ගහගෙන ඉන්න බැරි ”
තමන්ට වඩා වයසින් බාල සමීරට උස් හඬින් කතා කරන අනූෂා දිහා හැමෝම වගේ බැලුවේ තරමක් පිළිකුලෙන්. කිසිම දෙයක හොඳක් නොදකින අනූෂා කාර්යාලයේ වැඩිම කාලයක් සේවය කරපු නිසා හිටියේ තරමක මාන්නයකින්. හැමෝම ඇයට ගරු කළත් ඇගේ සමහර හැසිරීම් කවුරුවත් අනුමත කළේ නැහැ.
” නෑ මං කිව්වේ ඉතින් ඕනෙම office එකක කැපිලි කෙටිලි තියෙනවනේ. දිව්‍යා ඔය ඉන්න විදිහට ඉන්නකොට වැඩිය ඕවට අහුවෙන්නේ නැතුව ඉන්න පුළුවන් ”
” බලමුකෝ ඔය දිව්‍යාංගනාව තව කොච්චර කල් මේකෙ ඉඳීද කියලා ඔය විදිහට ”
අනූෂාගේ මුහුණේ තිබුණේ අපහාසාත්මක හිනාවක්.
අවශ්‍යම දෙයකට ඇරෙන්න දිව්‍යා කාත් එකවත් වැඩිය කතා බහට ආවේ නැහැ. ඒත් ඉඳහිට කෑම පැයේදී හමුවෙන දිව්‍යා ඉතාම සුහදශීලී තරුණියක් බව රුවනිට වටහා ගන්න ගත වුණේ දින කිහිපයක් විතරයි
” මං හරි බයයි මිනිස්සුත් එක්ක හිතවත්කම් හදාගන්න.විශේෂයෙන්ම වැඩ කරන තැනක. මොකද මං කලින් වැඩ කරපු තැන හිටපු මගේ හොඳම යාළුවා තමයි බොස්ට මං ගැන වැඩිපුරම කේලම් කියලා තිබුණේ ”
දිව්‍යා ඇහෙන නෑහෙන ගානට කෑම කන අතරේ එහෙම කියද්දී රුවනිට ඇත්තටම ඇය ගැන දුක හිතුනා.
” අර අනූෂා කියන මිස් මං ගැන එක එක දේවල් කියනවා කියලා මම දන්නවා.ඒ මම වැඩිපුර කතාබහ නොකරන නිසා වෙන්න ඇති. ඒත් මම එහෙම ඉන්නේ ඕගොල්ලන් එක්ක තරහකට නෙමෙයි අනේ ”
දිව්‍යා රුවනි එක්ක හිනා වෙවී කරපු ඒ කතාබහ ගැන දුර තියා දැක්ක අනූෂාට ඒ ගැන කියන්නත් කතාවක් තිබුණා.
” ඒ අම්මණ්ඩි හදන්නේ රුවනිව අල්ල ගන්න “
අනූෂා කිව්වේ දිව්‍ය වොශ් රූම් එකට යනකම් බලාගෙන ඉඳලා.ඒ කතාවට නම් රුවනිට හිනා ගියා.
” මාව අල්ලගෙන ඒ කෙල්ල මේ ඔෆිස් එකේ මොනවා කරගන්නද ඇත්තට ? මාත් තාම මේකට ඇවිල්ල අවුරුද්දක් විතරනේ අනූෂා මිස් ”
ඇත්තටම ඒ කතාවට දෙන්න උත්තරයක් අනූෂාට තිබුණෙ නැහැ.
” ඕක මට කිව්වනං හිත හදාගන්න තිබ්බ අඩුම ගානේ මං කොල්ලෙක් නිසා ”
සමීරත් රුවනිගේ හිනාවට එකතු වෙද්දි අනූෂා කෝපයෙන් පිපිරෙන්න ඒ හැටි වෙලාවක් ගියේ නැහැ.
දිව්‍යාගේ උපන්දිනේ ආවේ ඔය අතරේ. කාර්යාලයේ හැමෝටම කේක් වගේම තවත් රස කැවිලි කිහිපයක් එක්ක වෙන කවුරුත් නොකරපු ආකාරයේ සංග්‍රහයක් දිව්‍යා ලෑස්ති කරගෙන ඇවිල්ලා තිබුණා
” මේ සැන්විචස් නම් මාර රහයි දිව්‍යා කවුද හැදුවේ? ”
සමීර ඇහුවෙ තවත් එක පාන් පෙත්තක් අතට ගන්න ගමන්
” අපේ ගෙදර සර්වන්ට්. එයාගේ කෑම නම් කොහොමත් රහයි තමයි. මොනව හැදුවත් කන්න පුළුවන් ”
දිව්‍යා පුරුදු හිනාවෙන් කියද්දී අනූෂා කේක් කෑල්ලක් අරගෙන රුවනි දිහාවට හැරුණා.
” සර්වන්ට් කෙනෙක් ඉන්න තරං එයාට සල්ලි තියෙනවා කියලා වෙන්න ඇති පෙන්නන්න ඕන වෙලා ඇත්තේ “
අනූෂා එහෙම කිව්වේ හඬ බාල කරලා. ඒක දිව්‍යාට ඇහුනද කියලා රුවනි ආයෙමත් වතාවක් හැරිලා බැලුවේ දිව්‍යා ඒ වගේ තමන් ගැන වර්ණනා කරගන්න කෙනෙක් නොවෙන බව දන්න නිසා.
” ඒ ළමයා ගෙනාපු කේක් කෑල්ල කන්නත් කලින් කියන කතන්දර ”
රුවනි එහෙම හිතුවේ ඇත්තටම අප්‍රසන්න හැඟීමකින්. ඒත් රුවනි ඒක වචන වලට පෙරලන්න ගියේ නැහැ.
” උපන් දින වලට මෙච්චර විච්චූරණ කරන්න ඕනෙ නෑ ඔෆිස් එකක. කේක් එකක් විතරක් ගෙනාවම මදෑ ”
අනූෂා කිව්වේ කාටත් ඇහෙන්න. ගොඩක් දෙනා මූනෙන් මූණ බලා ගත්තේ ඒක ඇත්තටම නොකියන්න ඕන කතාවක් නිසා.
” ඒක ඇත්ත තමයි මිස්. ඒ වුනාට මගේ අම්මා ආස වුනේ ඔයාලට මෙහෙම ට්‍රීට් එකක් දෙන්න. මේක ඉතිං මහ ලොකු දෙයක් නෙමෙයිනේ.ජාති දෙක තුනක් වැඩි වුණා විතරයි නේ ”
දිව්‍යා උත්තර දුන්නේ හරිම අව්‍යාජ විදියට. ඇයට ඕන වුනේ ඇත්තටම හැමෝටම හොඳට සංග්‍රහ කරන්න කියලා තේරුම් ගන්න අනුෂාට ඇරෙන්න අනෙක් කාටත් පුළුවන් වුණා.
” මේකප් උලාගෙන හැමදාම එන්නේ කාට පේන්නද දන්නේ නෑ. එකත් එකටම මේකේ කාව හරි දැලේ දාගන්න තමයි ඔය ලෑස්ති වෙන්නේ ”
ඊළඟට අනුශාගේ කතාව වුනේ ඒක. මේ කතන්දර දිව්‍යාට නෑහෙන තරමට හොඳයි කියලා තමයි හැමෝම හිතුවේ. ඒත් කොහෙන් කොහොම හරි දිව්‍යාට මේ කතා ආරංචි වෙලා තිබුනත් ඇය වචනෙකින්වත් ඒ කතා වලට උත්තර දෙන්න ගියේ නැහැ. තමන්ගේ පාඩුවේ වැඩ කරගෙන ඉන්න දිව්‍යාව කාගෙත් පැසසුමට ලක් වෙද්දී ඊට වඩා වයසින් සෑහෙන්න වැඩිමල් අනුශාව කාගෙත් උපහාසයට වගේම පිළිකුලට ලක්වුනා.
” මේ. තේරෙන්නේ නැද්ද අනූෂා ගේ වෙනසක් ? ”
සමීර රුවනිට එහෙම කිව්වේ දවස් දෙකක් විතර අනූෂා දිව්‍යාට කිසිම ඇනුම් පදයක් වත් නොකියපු නිසා.
” දිව්‍යාගේ මුකුත් ඇදයක් හොයා ගන්න බැරි වෙන්න ඇති ”
රුවනි උත්තර දුන්නා. ඒත් ඇත්තටම අනූෂාගේ මොකක්දෝ නිහඬ දින ගණනාවක්ම දැක්ක නිසා ඇය ඉන්නෙ මොකක්දෝ ප්‍රශ්නයක කියල රුවනි ට නිකමට වගේ හිතුනා.
” අනූෂා මිස් “
කාර්යාලයේ කිහිපදෙනා එහෙ මෙහෙ වෙනකන් ඉඳලා රුවනි හිමින් සීරුවේ අනූෂා ළඟට ලං වුණා
” මිස් මොකක් හරි ප්‍රශ්නක නේද ඉන්නේ? ”
රුවනි ඇහුවේ පුළුවන් තරම් කරුණාවෙන්. අනුෂාගේ දෑස් වල කඳුළු පිරුණේ බලාගෙන ඉද්දිමයි.
” ඇයි මේ ? ”
රුවනි අනූෂාගේ අතින් අල්ල ගත්තා. දන්න දා ඉඳලම තරමක් සැර පරුෂ කෙනෙක් වුන අනූෂාගේ ඇස්වලින් කඳුළු වැටෙන එක රුවනි ට බලාගෙන ඉන්න බැරි වුණා.
” මගේ දුව එයා යාළු වෙලා හිටපු කොල්ලත් එක්ක ගිහින් ”
අනූෂා ලොකු සුසුමක් එක්ක ඒ වචන ටික මුදාහැරියා.
” මොකක් ? ”
” මං පහුගිය ටිකේම එයාට ටිකක් තරවටු කරා. ඒ උනාට ඒ කොල්ලා ඒ තරම් නරක කෙනෙකුත් නෙමෙයි. දුවත් ජොබ් එකක් කරනවනේ. තරුණ වයසෙ ළමයෙක්ට මේ වගේ දෙයක් ගහ බැනල කියන්න බෑ කියලා මට තේරෙනකොට මම පරක්කු වැඩියි රුවනි ”
අනූෂා හෙමින් සීරුවේ කඳුළු පිහි දැම්මා.
” දිව්‍යාගේ වැරදි හොය හොය ඉඳලා අනූෂාට එයාගේම දුවව මග ඇරිලා ”
රුවනි එහෙම හිතුවේ අනූෂා ගැන ඇත්තටම උපන්න දුකකින්.
………………………………………………………………………
අපේ smartlady.lk වෙබ් පිටුවේ පළවන අලුත්ම රසබර ලිපි කියවන්න පහත සබැඳිය හරහා එකතු වෙන්න අපේ WhatsApp Group එකත් එක්ක…….
 | ReplyForwardAdd reaction |
![Pinterest](https://pinterest.com/pin/create/button/?url=https://smartlady.lk/article/41163/short-story-191/&media=https://smartlady.lk/wp-content/uploads/2025/03/Shoet-Story-Thumbnail-3.3.jpg&description=" බලමුකෝ ඔය දිව්‍යාංගනාව තව කොච්චර කල් මේකෙ ඉඳීද කියලා ඔය විදිහට " අනූෂාගේ මුහුණේ තිබුණේ අපහාසාත්මක හිනාවක්.){kind=link}