තම ළමා අවධියේ මතක සටහන් ඇසුරු කොටගෙන ජපන් ජාතික කාන්තාවක වූ ටෙට්සුකෝ කුරොයානගී මහත්මිය “මදොගිවා නො ටොට්ටෝ චං” කෘතිය රචනා කරන්නේ 1981 දී ය. ප්‍රකාශන වාර්තා තබමින් මාස දහසයකින් ලක්ෂ පනහක පමණ පිටපත් අලෙවි වූ මේ කෘතිය 1982 වර්ෂයේ දී ඩොරති බ්‍රිටන් මහත්මිය විසින් ඉංග්‍රීසි භාෂාවට පරිවර්තනය කර පළ කළ පසු ලෝකය පුරා අධ්‍යාපනවේදීන්ගේ නො මඳ අවධානයට ලක් වී තිබෙනවා.
දෙවන ලෝක සංග්‍රාමය කාලයේ දී ජපානයේ ටෝකියෝ නගරය ආශ්‍රිතව තිබූ පර්යේෂණ පාසලක සොඳුරු සිදුවීම් සහ කතුවරිය එහි දී ලැබූ අත්දැකීම් මේ කෘතියෙන් විස්තර කරනවා. නිදහස, ආදරය සහ විනෝදය පිරුණු ටොමෝවේ පාසලේ පන්ති කාමර දුම්රිය මැදිරි වල පිහිටා තිබීම ද විශේෂත්වයක්. සොසාකු කොබයාෂි නැමති අපූරු මුල්ගුරුතුමා මේ පාසල ඉතා ආදරයෙන් පාලනය කළා.
“ළමයින්ගේ උතුම් බලාපොරොත්තු නොනසන්න. ඔවුන්ගේ සිහින ඔබගේ සිහිනවලට වඩා විශාල ය”
යන්න කොබයාෂි මහතාගේ අවවාදය වුණා.
“ටොමෝවේ ඉස්කෝලෙ – හරි පුදුම ඉස්කෝලෙ
පිටත මෙන් ඇතුලතත් – හරි පුදුම ඉස්කෝලෙ”
ඔවුන්ගේ ගායනය පාසලේ කාර්යාලයේ හිඳ ගෙන අසා සිටි මුල් ගුරුතුමාට කෙබඳු සතුටක් ඇති කළේ දැයි ඇත්තටම ඔවුහු නොදත්හ.
වෙසෙසින් දරුවන් ගැනම සිතා පාසලක් පවත්වන ඕනෑම අධ්‍යාපනඥයකුට ඒ සතුට උරුමය.එවැන්නකු දිනපතා මුහුණ දෙන පීඩා නිමක් නැත. සියල්ල අමුතුම අමුතුය. ටොමෝව පිළිබඳව සැලකුවහොත් එය වඩාත් සත්‍ය වේ. වඩාත් සම්ප්‍රදායික අධ්‍යාපන ක්‍රමයකට හුරුවී සිටින පිරිස් වෙතින් එල්ල වන විවේචන වලින් ගැලවීම පහසු නොවේ.
මේ වටපිටාව තුල, සිසුන් හඬගෑ ගීය මුල් ගුරුතුමාට පිරිනැමිය හැකි අගනාම තුටු පඬුර විය.
හරි පුදුම ඉස්කෝලේ -153 පිටුව
දරුවාට විනෝදය,නිදහස සහ ආදරය ලබා දී පාසල තුළ ඒ ගුණාංග වර්ධනය කිරීමෙන් මානව ප්‍රේමය කුඩා හිතක වගා කළ හැකි බවත් සවන් දීම සහ නොනවත්වා ආදරය ලබා දීම මඟින් දරුවෙකු වඩා හොඳ ගතිගුණ සහිතව උස්මහත් කළ හැකි බවත් කියා දෙන මේ අපූරු කෘතිය ලීලානන්ද ගමාච්චි මහතා “හරි පුදුම ඉස්කෝලෙ”ලෙස පරිවර්තනය කර තිබෙනවා.
අධ්‍යාපන තරගයට දරුවෙකු ඇද දමන්නට පෙර ඔබ කියවිය යුතු මේ කෘතිය ටොට්ටෝ චං මෙන් නිදහස් නිවහල් සුන්දර දරුවෙකු තනන්නට ඔබට ලැබෙන පිටුවහලක් බව නොකියාම බැහැ.
එන්න!
ටොට්ටෝ චං එක්ක ටොමෝවේ රවුමක් යමු..
