ඕට්ස් කියන්නෙ හදවතේ නීරෝගී ක්‍රියාකාරීත්වය පවත්වා ගන්න, ශරීරයේ අනවශ්‍ය බර පාලනය කරන්න, ආහාර ජීර්ණය ක්‍රමවත් කරන්න වගේම රුධිරයේ සීනි ප්‍රමාණය පාලනය කරන්න උදව් වෙන පෝෂ්‍යදායී කෑම වර්ගයක් කියල smart lady අපේ ලිපි කියවන ඔබ දන්නවා.
කොච්චර පෝෂ්‍යදායී වුනත් එකම විදිහට ආහාරයට ගනිද්දි ඒ කෑම වර්ග වලට අපේ තියෙන කැමැත්ත නැතුව යනවනේ.
ඒ නිසා වෙනස්ම ක්‍රම අත් හදා බලන්න අපි හරිම කැමතියි.
අන්න ඒ වගේ ඕට්ස් පිළියෙල කරගන්න පුළුවන් වෙනස්ම ක්‍රමයක් ගැන ඔබට කියල දෙන්නයි අපි අද සූදානම් වෙන්නෙ.
මුං ඇට, කැරට්, ගාගත් පොල් එකතු කරල ලේසියෙන්ම පෝෂ්‍යදායී ඕට්ස් පිට්ටුවක් හදන විදිහ අපි බලමු.
අවශ්‍ය ද්‍රව්‍ය
ඕට්ස් කෝප්ප 01 ක්
ලුණු කුඩු
වතුර
ගාගත් කැරට් අලයක්
තම්බාගත් මුං ඇට අඩු කෝප්පයක් පමණ
ගාගත් පොල් අඬු කෝප්පයක් පමණ
සාදාගන්නා ආකාරය
මුලින්ම, තරමක භාජනයක් ගෙන එයට ඕට්ස් කෝප්පයක් සහ රස අනුව ලුණු එකතු කර හොඳින් කලවම් කරගන්න.
කලවම් කරගත් ඕට්ස් මතට අත්ලට ගෙන වතුර ඉස කලවම් කරමින් ඕට්ස් කැබලි යාන්තමින් තෙත් කරගන්න.
එයට ගාගත් කැරට් මේස හැන්ඳක්, ගාගත් පොල් මේස හැන්ඳක් සහ තම්බාගත් මුං ඇට මේස හැන්ඳක් එකතු කර හොඳින් කලවම් කරගන්න.
දැන් පිට්ටු බම්බුවේ යට කොටසට වතුර පුරවා වතුර රත්වීමට තබාගන්න.
පිට්ටු බම්බුවේ උඩ කොටසේ අඩියටම මුලින්ම ගාගත් පොල් මේස හැන්ඳක් එකතු කර ඊට උඩින් පිළිවෙලින් තම්බාගත් මුං ඇට සහ ගාගත් කැරට් එකතු කරගන්න.
ඊට උඩින් සාදගත් ඕට්ස් මිශ්‍රණය දමා ඕට්ස් මිශ්‍රණයට උඩින් කලින් පිළිවෙලටම ගාගත් පොල්, ගාගත් කැරට් සහ තම්බාගත් මුං ඇට එකතු කරගන්න.
මේ පිළිවෙලට පිට්ටු බම්බුව පිරෙන තෙක් අසුරා පිට්ටු බම්බුව වසා නටන උණු වතුර සහිත පිට්ටු බම්බුවේ යට කොටස මත තබා විනාඩි 05 පමණ හොඳින් තම්බා ගන්න.
ලිපෙන් ඉවත් කරගෙන ප්‍රවේශමෙන් පිට්ටු බම්බුවෙන් ඕට්ස් පිට්ටුව ඉවත් කරගන්න දැන් ඔබට පුළුවන්.
එහෙනම්, හදල බලන්න අමතක කරන්න එපා.
සටහන – දුලානි නවෝද්‍යා
 | ReplyForwardAdd reaction |
